Marc 13 - New Testament in Mitsogo

Jésus ameevéda gépanzédéô seba aNzambé (Bono na Matt. 24:1–2 )

¹ Vamakusa Jésus gô eba aNzambé, môneengi môvo amasôbasôbana mbe: Môékédi, bonoko ganyepa yeba yedi. Gamasaô yangô. Na gavunda yangô. Ti ôô mônongo ayeba.

² Jésus amaabéa angô mbe: ?Oeni yeba yedi dipôni‐a? Veena éwe vane gôsangasanéa ta n’etaé évo gô ngongo amôkedi. Metso mangapanzô.

Maguga mapitsi yamôyusumédu (Bono na Matt. 24:3–14

³ Jésus amadigaa va ngongo amôkôdi ôtetu mbe Olivier. Môkôdie ône ôndé tsényé na tsényé na eba aNzambé. Avo aneengi te Pierre, na Jacques na Jean na André ahmabaka n’edi. Ahngô anguene gébé na muene môma ahmabambéa Jésus v’esooe mbe:

⁴ Beenda we ndéône éngabuéa ébégô évovi éwe éne. ?Gémbégéa ndé géngatubéda we mbe ndéône éka gôpégôpé gôébuéa‐a?

⁵ Vane Jésus amanigôa ahngô. Amakeneda ahngô mbe: Nôwema kabaga anye nôbômédu n’ene oma.

⁶ Oma angaviga atsua inami na angapata anguene mbe: Me te Christ. Ahnga bôméda oma ayekani.

⁷ Nôngookô nzongodi yamabadi mandé gôpégôpé n’anyô, na tsangô yamabadi magôdagôda n’anyô. Nômbieena gomo. Mabadi mema mangabuéa. Ivô ésangaba ékôdéô éatsenge.

⁸ Eongo évo éngagenya na évo éongo. Tsenge épo éngagenya na épo tsenge. Tsina éngatatéa gô dipo tsenge disitaté yangô na mbeego. Ayekani ahngookô nzaa gôsangabahngô na môyakô. Te gandé gégôngôta géôkô môgeto gébeenda mbe: muanee amahviga.

⁹ Ivô anye bakani n’eodo gôndé anyene. Oma ahngakeda anye na gô yeba yamisoso. Ahnganôbômôa gô yeba yewanyéô. Nôngabuédu gô inami va mbene ane atômani, na va mbene amuene kumu éatsenge. Angookô inami vanganigôanye ahngô ômbanzanyô apie.

¹⁰ Buedi mbe Tsangô Eami Eamôsôba épangé éékédu gôndé oma muetso.

¹¹ Vangatsôpu anye na gôndé atsundédi, nômbiapanga ékebangana éne éngaba n’anye gôévovo. Vangaba anye va mbene atsundédi, vovoni éne éngabeendu anye na Nzambé. Esangavovo anye éngavovo te Gédidi SaNzambé.

¹² Oma ahngakaba anayaô gôéahyôhéda. Tétee ahngakaba anaô te mônongovo. Anee ahngakoga aka avingi atétaô na ayaô na ahngahyôhéda.

¹³ Oma muetso ahngavinga anye gôébégô nôndéké omami. One angasipa gô gékuanô ngu na v’ekôdéô, angoobou.

Ebégô éaSôma Géôtéa Ebévani (Bono na Matt. 24:15–28 )

¹⁴ Nôngeena ône atetu mbe, Sôma géôtéa Ebévani angatemedu va tungune ésaba yedi éedigaa. (One atangani aditégé ébégô édué.) Vane ane ahngaba gô Judée abusuga na gô ngongo amikôdi.

¹⁵ One angaba gô ngongo eba, vasutuméa ahngô gôébusuga aseengéa na gô ebedi gôébongo éômedi gôétsua éangô na gôkeangô.

¹⁶ Na ône angaba gô tsaga éedi asanika na gô mbôka gôébongo ngoyine éedi.

¹⁷ Te ngeba épôni gô panda dingeena ageto pitsiye dine, ane ahngadenganô andé na mimé, na ane angadenganô anyuéséda ana.

¹⁸ Dukani Nzambé mbe mabégô mema masangabuéa va ndéône éasodi gévôni.

¹⁹ Gôébégô gô pitsiye dine oma ahngeena maguga mamootéani. Ti mônongo amaguga madeo masienanôni g’ekanéa Nzambé tsina n’oba, madeo gôsienanô mene maguga ga mane. Na gôsavienanô mene ga mane.

²⁰ Mbeka mbe Kumu amatasa mbe: Nasusué pitsiye, mbe gôsangasanéa môma adôngani. Ivô Kumu angasusua pitsiye te gôndé omedi amasevôa angô.

²¹ Okô nôbeendiô mbe: Bononi, Christ ône amatômu na Nzambé te angôô, vo Christ te angôône. Nômbiookô mane.

²² Gôngaviga eekédi adiboe angapata mbe: Me te Christ. Avo dôta angapata mbe: Me te môpandôédi amatasa maNzambé. Ahngatubéda émbégéa na angayanza mabégô manganyônganéôni masoongôa môma ésupua. Eetso éne gôébôméda oma. Buéyé ti na ane ahmasevôu na Nzambé.

²³ Tambô anye, bakani n’ekena. Namani éevéda anye mabégô mema madeo masibuéa.

Génikéô saMuana Amôma (Bono na Matt. 24:29–31 )

²⁴ Gô pitsiye dine, va mbene andéône éamaguga, kômbéne éngeemédu na ngondene ésangadôétsigéda midanga.

²⁵ Minangamie mingaaga g’ôba na bobokoboboko. Ane ahtôma ngudiye yava gatse atsina n’oba ahngatatéa.

²⁶ Vane nôngeena me, Muana Amôma natsutsuga va gatse adibôngé yag’ôba. Nangaviga na ngudi dipôni n’obébayi ondômbami.

²⁷ Nangavigéda ayanzi aNzambé asi g’ôba gôékôkéga muetso ane ahmasevôu na Nzambé. Ahngaviga gôtsiga kômbéne na gô pénda yangô na gésa na gésa.

Meekédu mag’ôfiguier (Bono na Matt. 24:32–35 )

²⁸ Menyani gémbégéage gétubéda géétété gééndô mbe ôfiguier. Mitabé miedi mibandôa égeenya na yabiye dipunzua, nôsabômu mbe mbuuaye dimoba.

²⁹ Te mônongovo veenanye mabégôme metso ema mabuéa, menyani mbe amuene aka gôpégôpé. Asabadô gôpégôpé, aka ti v’ombaa.

³⁰ Me nanôbeenda na gô pie mbe muetso ahndé adôngani asangawa mbe mabégô mema masatsigaka.

³¹ Diôba na tsina dingoota na dingadimbana. Ivô Mabégô mami te môgunanza.

Nzambé amuene asabômu pitsiye (Bono na Matt. 24:36–44 )

³² Gôsaba môma angoongôa émemya pitsi vo ndéô éngabuéa mabégô mema ivô te gô mbene n’okendô. Béyé n’asi g’ôba ayanzi aNzambé asamenya. Na me, Muana ANzambé tsamenya. Te amuene Téta asabômuni.

³³ Nôwema. Bakani géembemba géebogé. Nôsamenya nyee ôngabuéa mabégô mema.

³⁴ Jésus angô mbe: Te gandé môma akea môtôô. Atsika ebedi na ayanzi edi. Eetsa ahngô ényangee. Atsikéa môma na môma n’edi éyanza. Avovo na môkenene ombee mbe: Ombieeboga vio.

³⁵ Tambô anye bakani misiki nôsamenya ndéône éngaviga kumu eba. Anganika, buétsé na dikoo, buétsé va gatse apitsi vo va tsôsône éamapanga, vo n’ongôngôe wetso.

³⁶ Nôwema kabaga aviga tsina na tsina anôdenga nôndé gô vio.

³⁷ Ene évovo me n’anye navovo te n’oma muetso mbe: Bakani n’ebagé géebaé.