Marc 11 - New Testament in Mitsogo

Jésus amakea na gô Jérusalem (Bono na Matt. 21:1–11

¹ Jésus n’aneengie ambuéa na gô mbôkaye yaBethphagé na Béthanie, te mbôkaye disitongonéké na Jérusalem. Ahmatsiga gô môkôdi ôtetu mbe Olivier. Jésus amoobégéda aneengi abaé.

² Jésus amatôma ahngô mbe: Kiakani na gô mbôkane éndé gô mbene anyô. Vangabanye nôka gô buéaga, nôngadenga môpaga anyamane étetu mbe ânon éndé ditéga. Yangô madeo ésitsua môma. Tsôbôani yangô. Nôviga na yangô.

³ Okô môma anôévôi mbe: ?Nôénda ndé vane? Beendani angô mbe: Kumu asô andé n’eyanza na nyama nedué. Angaminikéda n’atsatsee.

⁴ Ahmakea na ahmadenga nyamane gô môkii éndé ditéga va môvénga eba. Amamitsôbôa.

⁵ Avo oma amadenganô vangô ameevôa ahngô mbe: ?Nôénda ndé vane? ?Anye nôtsôbôa nyamane éne nayee?

⁶ Ahmabeenda ahngô gamavovo Jésus. Na omee ane ahsimigémbané.

⁷ Ahmakea na nyamane na gôndé Jésus. Ahmatsakéga ngoyi yaô gô ngongo anyamane. Na Jésus amapeka gôédigaa gô yangô.

⁸ Oma ayekani ahmayaa yaô gô nzéa, gôégobeda ône avigani. Avo dôta ahmayaa mitabé midôngani mimakitsangô gô tsaga yaô.

⁹ Ane ahmakiaka va mbene aJésus na ane ahmaviga va ngima edi ahmadôngana na gényônga mbe: Tôkumédékéni Nzambé. Te mbe mate maNzambé mabaké gôndé môtômine môvôni na ôkumaka ôvigi n’edi.

¹⁰ Te ôkumu aTétasô David. Asi g’ôba n’asi gô tsina muetso, tôkumédékéni Nzambé.

¹¹ Jésus amatsiga gô Jérusalem na ameengéa na gô eba aNzambé. Amabono na gésa na gésa na amakusa. Amakea na gô Béthanie n’aneengie edi gôébégô nyee ômabaka ôka gô édaaga.

Jésus amakokoo géététége (Bono na Matt. 21:18–19

¹² Ovo enya ône vamatimôga ahngô gô Béthanie, Jésus amookô nzaa.

¹³ Ameena aviga gôdagôda géétété gétetu mbe ôfiguier. Géététége géne gémabaka na yabiye na tsaguma. Jésus amakea gôéseta mbe buétsé angadenga miônda. Vamabuéangô va sangô ameena te yabi ditévo gôébégô ndéô nene kaka éne ébôtaka sango.

¹⁴ Vane Jésus amakokoo géététége mbe: Ewe ôsavidôyéô miônda na gô épénde akômbé. Aneengie amookô.

Jésus amanyepeda eba aNzambé (Bono na Matt. 21:12–17 )

¹⁵ Ahmabuéa gô Jérusalem. Jésus ameengéa na gô eba aNzambé. Amadenga ayôkô ahsômba na ahsômbéda gô eba aNzambé. Amapatsa ahngô. Amakuéséda tabudéye yapukanédi adode. Amakuéséda na dikôndiye yasômbédi amabembi.

¹⁶ Na Jésus amadékéda ahngô mbe: Nômbioota gô eba aNzambé na yôma.

¹⁷ Vane ameekéda ahngô mbe: Matendeo maNzambé matôbeenda mbe: Ebami ôngamenyanganô mbe, eba oma muetso gôévovo na Nzambé. Ivô anye nôkoyi eba ôdôô ôka gésoméô seesui.

¹⁸ Tsesuye yakeekedi adigondoku, n’anigôi amige miaNzambé amookô ébégôe. Ahmabuta mônongo gôéyôha Jésus. Ivô ahmeena angô gomo gôébégô oma muetso ahmasôbasôbana gô mane mameekédaka Jésus.

¹⁹ Vamaba nyee ôka gô édaaga, Jésus n’aneengi edi ahmanôtôga gô Jérusalem.

Jésus amadenga géététége gémagoso (Bono na Matt. 21:20–22 )

²⁰ Ovo enya ône n’ongôngôe wetso, vamootahngô gô nzéa ahmeena ôfiguier. Géététége gémawa setso, bandôa gô mitamba ngu na gô mitabé.

²¹ Pierre amakôngéda éne ébuéikini. Amavovo na Jésus mbe: Môékédi, bonoko. Ofiguier ôkikoyi éwe ômani égoso.

²² Vane Jésus amavovo n’aneengi edi mbe: Nônatsuma ngudi yaNzambé paga. Na gô pie nanôbeenda mbe

²³ nôongôa évovo na môkôdi ôdôô mbe: Môtôga vane, kea ôkekuyaméa gô mubu. Okô anye nôsiba na buétsé gô mitéma mianyô na nômenya na gô pie mbe éne évovi anye éngeenanô. Menyani mbe nôngeena éangô éngaba.

²⁴ T’ebandô me navovo n’anye mbe vadukanye Nzambé ébégô, itsani na mitéma mianyô mietso mbe nômani éédiia. Na angô anganôétsa.

²⁵ Okô mbe ôndé na ébégô na môkoo, ômbiasuméa évovo na Nzambé. Buedi mbe ôpanga émôsingéa kokoo. Vane Tétoo, ône andé g’ôba angagôsingéa dôta kokoo gô mabégô moo mabévani. [

²⁶ Okô anye nôsisingéa akanyô kokoo, Tétanyô ône andé g’ôba asanganôsingéa dôta kokoo gô mabégô manyô mabévani.]

?Enyangee éndé na Jésus éviga gôni? (Bono na Matt. 21:23–27 )

²⁷ Ahmoomba énika na gô Jérusalem. Vamaseta Jésus eba aNzambé, te tsesuye yadeekedi adigondoku n’anigôi amige na peeye ahmaviga gôédenga angô.

²⁸ Ahmabambéa Jésus mbe: ?Enyangee éyanzewe mabégô mema, éviga gôni? ?One ameetsa éwe ôtômu gôéénda nane indaa?

²⁹ Jésus amaabéa ahngô mbe: Me dôta nanganôévôa yami nyivô. Okô anye nômiaabéyi, me nanganôbeenda dôta gésa géviga ényangee yami.

³⁰ ?One amatôma Jean gôébatésa oma indaa? ?Te Nzambé‐a? ?Vo te oma? Beendani me.

³¹ Ahmatsunda anguene n’anguene mbe: Okô tôvovo mbe te Nzambé amakudéga Jean. Angô angatôévôa mbe: ?Tambô ébégô ndé anye nôsisingé mabégô medi?

³² Okô tôvovo mbe te oma amatôma Jean ?ébégô éngaba nayee? (Ahmeena oma gomo gôébégô muetso asibômuku mbe Jean te pidi môpandôédi amatasa maNzambé.)

³³ Vane ahngô ahmaabéa Jésus mbe: We tôsamenya. Na Jésus amanikéda ahngô mbe: Na me muetso, tsoongôa énôbeenda gésa géviga ényangee yami éyanza me.