Marc 10 - New Testament in Mitsogo

Meekédu maJésus gôébégô éeyôha yômba (Bono na Matt. 19:1–12 )

¹ Jésus amatimôga gômabakangô. Amakea na gô tsenge éaJudée. Amaabôga na gô dipo tsényé yaJourdain. Eômbé éyékani émaviga na vandé angô. Jésus ameekéda ahngô geekédangô na mbeego.

² Avo Apharisien ahmawesea na vandé Jésus gôémôtambéa pagô na nyivôye gôémôkubéda. Ahngô mbe: ?Gô mige mimakitsô mbe mômôgôô géyôhé yômba‐a?

³ Jésus amaabéa ahngô gô nyivô mbe: ?Môge ndé ômookô anye na Moïse?

⁴ Apharisien angô mbe: Moïse amatsikéa we mbe mômôgôô atenda gésangô seyôha yômba na apatsé môgayeda.

⁵ Vane Jésus amaabéa mbe: Moïse amatsikéa anye ôgie ône te gô disôba yanyô.

⁶ ?Ivô v’ebandô éatsenge, Nzambé amavanga nayee? Matendeo maNzambé matôbeenda mbe: Nzambé amavanga mômôgôô na môgeto.

⁷ Te gô ébégôe éne mômôgôô atsika tétedi na yeedi gôedigaa na môgayedi.

⁸ Ahngô abaé aka te ôtô ôvo. Jésus amoomba mbe: T’ebandô ahngô asabadô abaé, aka te ôtô ôvô na koo.

⁹ Tambô môma asatatôa éne émavambéda Nzambé.

¹⁰ Vamabakahngô ahndé digaa gô eba, aneengie amoomba éévôa Jésus gô ébégôe éne.

¹¹ Jésus angô mbe: Okô mômôgôô akini môgayedi gôébongo muene môgeto akeyi te gésasô. Abévédi ône amapanga.

¹² Gôndé môgeto te mônongovo. Okô angô ayôha yômba akebaaô na muene mômôgôô, angô akeyi te gésasô.

Jésus ameetsa anéngé mate (Bono na Matt. 19:13–15

¹³ Oma amakea n’anaô na gôndé Jésus mbe akebanda ahngô. N’aneengie ahmadékéda ahngô mbe: Nônakea n’ana na gôndé Jésus.

¹⁴ Vamookô Jésus nane asiene buedi na amavovo n’aneengie mbe: Tsikani anee avigéké na gôndé me. Nômbioobma édékéda ahngô. Okumu aNzambé ôndéké gôndé muetso andé mônongo ône.

¹⁵ Me nanôbeenda na gô pie mbe ône asasinga ôtômu aNzambé gasingéa ana angô, asangeengéa g’ôkumu aNzambé

¹⁶ Vane Jésus amavata anee va mitanda miedi. Amaatsakéga mogo medi gôéétsa ahngô mate na mavovia medi.

Gékiti gémaviga na gôndé Jésus (Bono na Matt. 19:16–30 )

¹⁷ Vamaba Jésus aka gô keaga gô nzéa, mômôgôô amaviga pita na gôndé angô. Amasiba mabongome va mbene aJésus. Angô mbe: Ewe môékédi ôndé ti môékédi amôsoba, aabéa me. ?Gôéba na monyo amôbô na môbô nangeenda nayee?

¹⁸ Jésus amamônikéda mbe: ?Oteta me mbe môma amôsoba nayee? Gôsaba môma amôsôba buétsé te Nzambé amuene.

¹⁹ Ewe ôsabômu mitôma na mige miaNzambé mbe: Ombiayôa. Ombiakea gésasô. Ombieesua. Ombiapatéa môma noo. Ombiabôméda akoo. Gobeda tétoo na yoo.

²⁰ Mômôgôô nône amaabéa Jésus mbe: Môékédi, me bandôa g’ôanéngé ami, nakenea mige miemi mietso.

²¹ Jésus amamôbono na gényônga. Angô mbe: Gôndé éwe gôsanéyi ébégô évo. Kiaka sômbédé éetso éndé n’ewe. Bonge dodeye ôkekabanéa misuga. N’ewe ôngaba n’okiti g’ôba. Na vane ôviga. Oka nzéepo n’ami.

²² Vamookô mômôgôô ôgie ône, gédimô sedi gémadita. Na amakea na mônyongo. Môtémedi ômeena panda gôébégô amabaka n’okiti edi ôvôni.

²³ Jésus amabono aneegie andé va kôbangô edi. Angô mbe: Endé ti édagani gôndé ékiti gôéasugéa anguene gôéengéa g’ôkumu aNzambé.

²⁴ Aneengie amatsapéô gô mavovia mema. Na Jésus amapandôéda mbe: Anami, éndé ti édagani gôndé môma eetsa môtémedi g’ôkitie gôéengéa g’ôkumu aNzambé.

²⁵ Amaguna tsava mbe: Te édagani nyama épôni ééndô mbe chameau gôédugu gô épôdéké éatsôngi. Amatimbôanéda mbe: Eôtéa ti édagani gékiti gôéengéa g’ôkumu aNzambé.

²⁶ Aneengie amasôbasôbana g’ôgie ône. Ameevôana anguene n’anguene mbe: ?Akasô gôngaba môma angoobogoni‐a?

²⁷ Jésus amabono ahngô. Amavovo n’ahngô mbe: Gô ngudi yamôma amuene gôédiia géobogeo, géndégégé. Buétsé te gô ndugi yaNzambé. Amuene Nzambé asadagéô ta n’ebégô évo.

²⁸ Pierre amavovo n’edi mbe: Aanaka Kumu, we tômatsika éetso, ti we adua. Na tôndé ti gôékea nzéepo n’ewe.

²⁹ Jésus amaabéa ahngô mbe: Nanôbeenda na gô pie mbe ône atsika ebedi na anayeedi na yeedi na tétedi, n’anedi, na tsaga yedi, atsika éangô gô inami na gô Tsangône Eamôsôba édué,

³⁰ angô angootéa édiia gô pitsi yedi. Vamatsikangô eba ôvo, angaba na môkama ayeba. Amatsika muanayeedi môvo, angaba na môkama aneyee. Na iyee te mônongovo. N’anee te mônongovo. Na tsagaye, te nane. Angadiia dôta gékuanô. Gô pitsiye yagô mbene angaba na monyo amôbô na môbô.

³¹ Ayekani andé gô mbene angaba gô ngima. Na vane gémbene amootu na géngima.

Jésus amoomba ébeenda éne éamôtatô ôwedi na gékundugéô sedi (Bono na Matt. 20:17–19 )

³² Jésus n’ane amabaka n’edi ahmakea gô nzéa étsiga na gô Jérusalem. Jésus amoota gô mbene. N’aneengi edi ahmakebanganakani ahmaviga gô ngima. N’avo ahmabaka va ngima aô ahmookô gomo asinyôngéô émôévôa nivyô. Jésus amoomba éweseda aneengi edi nzima n’abaé gôévovo n’ahngô mane mangabuéa gôndé amuene Jésus.

³³ Angô mbe: Oôkôni édué. Wa n’anyô tôkea na gô Jérusalem. Te gône gôngakabô me Muana Amôma, na gôndé tsesu yadeekedi adigondoku n’anigôi amige miaNzambé. Nangeesédu gôéyôhu. Nangadeekedu na gôndé oma ahsavamba na Nzambé.

³⁴ Ahngô ahngadeta me. Ahngatuéa me mate. Ahngabita me na mibitô mievongo. Ahngayôha me. Va mbene apitsi dibaé, éne éamôtatô nangakunduga.

Môduke aJacques na Jean (Bono na Matt. 20:20–28 )

³⁵ Vane Jacques na Jean anee abaé aZébédée, ahmaviga na vandé Jésus. Ahngô mbe: Tônyôngéô mbe éwe ôéndéa we éne éduka we.

³⁶ Jésus amabambéa ahngô mbe: ?Nônyôngéô nanôénda nayee?

³⁷ Ahngô mbe: Vangaba éwe gô ényangee okumaka, ôbongo we tôngaba va kôbangô oô. Môvo gésa gémôgôô. Môvo gésa gégeto.

³⁸ Jésus angô mbe: Anye nôsamenya éne éduka anye. ?Gébunguge gétubéda magugame mangeena me, anye nôngoonôa ényua sangô‐a? ?Batemene étubéda panda éngeenôô me, anye nôngoongôa éenaméa yangô‐a?

³⁹ N’ahngô ahmaabéa mbe: We tôngoongôa. Jésus angô mbe: Na gô pie anye nônganyua gébunguge génganyua me. Na nôngeenôô batemene éngeenôô me.

⁴⁰ Gôndé me gôénôsevôéa édigaa, vo géeyo gégeto vo géeyo gémôgôô, ésaba gôndé me. Tunguye dindé yaane amakônzéô yangô na Nzambé.

⁴¹ Vamookô avo nzima aneengi mavoviame mane ahmakambôgéa Jacques na Jean.

⁴² Jésus amabaméa ahngô muetso gôébeenda ahngô mbe: Anye nôsabômu mbe ane akumédu gô tsengene mbe: tsesu, te ahngô atôma omee waô gandé avéga. N’oma avôni atubéda ngudi yaô gô mane matômahngô.

⁴³ Géé gôndé anye ésaba nane. Okô môvo va gatse anyô anyôngéô éba môma môvôni, abaké môyanzi aakedi.

⁴⁴ Gôndé anye, ône anyôngéô étubéda ényangee éedi abaké môvéga aakedi muetso.

⁴⁵ Béyé me Muana Amôma, vamaviga me tsivutéé mogo mami gôétôma oma, ivô namatôma namabanda na mogo mami. Nameetsa memuene monyo ami ngu na g’ôwa, te môvano gôeoboo oma ayekani.

Jésus amadôngéda Bartimée, môsi pogu (Bono na Matt. 20:29–34 )

⁴⁶ Jésus n’aneengi edi na géômbé gévôni ahmatsiga gô Jéricho. Vamootahngô mbôkane ahmadenga gékonzo, môsi pogu na miduke, andé digaa va kôbangô anzéa. Inedi te Bartimée, muanee aTimée.

⁴⁷ Vamookô Bartimée mbe ône ootini te Jésus môsi Nazareth, amamôbambéa mbe: Ewe Jésus, Muana aDavid eena me ngeba.

⁴⁸ Ayekani ahmamôsemba na ahmamôdékéda mbe: Kôda. Ivô Bartimée amoomba éadôngana na gô ngongo mbe: Ewe Muana aDavid eena me ngeba.

⁴⁹ Jésus amasikama na amavovo mbe: Bambéani angô. Ahngô ahmabambéa môsi pogu mbe: Suméda môtémee. Timôgaka. Jésus agôbambéa.

⁵⁰ Vane amagunya ngoyine yedi épôni na amayavôga étimôga. Amakea na vandé Jésus.

⁵¹ Jésus ameevôa angô mbe: ?Onyôngéô mbe nagôénda nayee? Môsi pogu angô mbe: Kumu ami. Nanyôngéô mbe ôpoeda me miso mema.

⁵² Jésus amamôbeenda mbe: Kiaka. Odôngédiô te gôsitsumewe ngudi yami paga. Tsina na tsina miso medi mamapoga. Na amakea na Jésus nzéepo.