Marc 1 - New Testament in Mitsogo

Mane mameekéda Jean‐Baptiste (Bono na Matt. 3:1–12 )

¹ Edué te Tsangône Eamôsôba éaJésus‐Christ Mauna ANzambé ébandôa mbe,

² te gamatenda Esaïe môpandôédi amatasa maNzambé, amatenda gô gésangô sedi mbe: Oôkôni éne évovo Nzambé. Angô mbe: Me Nzambé napanga ékudéga peegi éami Te ône angakônza nzéane yoo.

³ Ogi amôma ôngadôngana gô tsenge émagasani mbe: Tsimamédani buedi nzéa yedi.

⁴ Gamatenda Esaïe gô gésangô sedi te gamatsiga Jean gô tsenge émagasani. Jean amabatésa oma. Na ameekéda mbe: Koani mitéma mianyô mbe nôngaba wene mônongo. Diiani bateme gôétubéda gasingéyiô anye kokoo na Nzambé gô ébévee éanyô.

⁵ Asi Judée muetso n’asi Jérusalem muetso ahmakiaka na gôndé Jean. Gô ébévee éaô môma na môma ameeséda amuene va pingô oma na amadiia bateme gô mbéne étetu mbe Jourdain.

⁶ Jean amaataka madégô mamagomu na miyo mianyama étetu mbe chameau. Amaataka v’oninge édata éagégôbôkô. Amaaka te tônda na ômbo.

⁷ Jean ameekéda mbe: Gô ngimami gôviga muene ootéa me. Me te gétôkôtôkô. Angô te môtsé. Gétôkôtôkô ôgoeyee géôté môtsé. Ivô tsaba pengo gétôkôtôkô. Nandé ti gô tsina asangô.

⁸ Me nanôbatésa na meba, ivô angô anganôbatésa na Gédidi SaNzambé.

Jésus amabatésu na Jean na amakanégu na yabédé (Bono na Matt. 3:13—4:11 4:1–13 )

⁹ Gô ndéô nene Jésus amaviga gô Nazareth, gô tsenge étetu mbe Galilée. Amabatésu na Jean gô Jourdain.

¹⁰ Vameenôga Jésus gô mbéyi, oma ameena ôbee ôtatôga, na Gédidi SaNzambé gémasuma ga ménga na vande Jésus.

¹¹ Ogi ômookanô ôvovo g’ôba mbe: Ewe te Muanami amôtôma amisô. Me nagônyôngéô na nzoo na gô môtéma.

¹² Tsina na tsina Gédidi SaNzambé gémakeda Jésus na gô tsenge émagasani.

¹³ Jésus amadigaa wangô nzima dinayi yapitsi. Amakanégu na Satan. Jésus amaba va gatse anyama yagô pindi. Asi g’ôba amavigédu na Nzambé gôémôodeda.

Jésus amabambéa agunyi ambusa (Bono na Matt. 4:12–22 5:1–11 )

¹⁴ Jean ameengédu gô eba atsôgôô. Jésus amakea na gô Galilée gôéékéda Tsangô Eamôsôba émaviga gôndé Nzambé.

¹⁵ Amavovo mbe: Ndéône ébuéyi. Okumu aNzambé ôka gôpégôpé gôénôoboo. Koani mitéma mianyô gôéba wene mônongo oma. Itsani mitéma mianyô gô Tsangône Eamôsôba édué.

¹⁶ Jésus amakea gô nzéa éamogogu amubu ôndé gô Galilée. Ameena agunyi ambusa abaé. Te Simon na muanayeedi André ahmagunya mbusa yaô gô mubu.

¹⁷ Jésus amabambéa ahngô mbe: Vigani. Okani nzéepo n’ami. Anye agunyi ambusa, gavootanye nyama, me nanganôkoa avooti oma na gôndé me.

¹⁸ Tsina na tsina ahngô ahmatsika mbusa yaô na ahmakea géômbé gévo n’edi.

¹⁹ Jésus amoomba ékea éva n’eva, ameena Jacques muana aZébédée. Angô na muanayeedi Jean ahndé gô mbôngône gôétata mbusa yaô.

²⁰ Vane Jésus amabambéa ahngô. Ahmatsika Zébédée, tétaô n’ayanzie gô mbôngône, na ahmakea na Jésus.

Môma amayungédu n’edidi ébévani (Bono na

²¹ Ahmakea na gô môsenge ôéndô mbe Capernaüm. Gô nyee edunda Jésus asidingé ékea na gô eba agéwanyéô sAjuif. Gômeengéa angô, ameekéda.

²² Ane ahmookôni ahmatsapéô gô meekédu mamisôba maJésus. Meekédu medi gébômu mbe môma andé n’enyanga. Asiikédé gameekéda anigôi amige miaNzambé.

²³ Tsina na tsina gô eba agéwanyéô gômeengéa mômôgôô andé na gédidi gébévani. Amaadôngana mbe:

²⁴ ?Jésus môsi Nazareth ôbé nayee n’asô? ?Omaviga gôédimbanéda we‐a? Me tsabômu mbe éwe te Muana Amatsimamani ômakudégu na Nzambé.

²⁵ Jésus amadékéda sangô mbe: Kôda vane. Kusa gôndé môma nône.

²⁶ Sangô gémaginya môma nône ga môma abeea tsiiga. Gédidige gémaamugana môndônga na gémakusa.

²⁷ Oma muetso ahmasôbasôbana na ahmeevôana mbe: ?Eyéni‐éé? ?Odôô te wene mônongo ameekédu‐a? Atômaka ti n’edidi ébévani n’enyanga évôni na éangô dôta émôgobeda. Weniô.

²⁸ Tsina na tsina tsangô éenyangedi ématsanzabana gô Galilée nyetso.

Jésus amadôngéda pingô yabeeyi (Bono na Matt. 8:14–17 )

²⁹ Jésus na Jean na Jacques ahmakusa gô eba agéwanyéô sAjuif. Ahmeengéa gô eba aSimon na André.

³⁰ Jésus amabeendu mbe: Ogoyi aSimon ogeto te angône andé yama na beeagane, ookô nzônzônzô.

³¹ Vamawesea Jésus na vandé angô amamôtsôpa g’ôgogoe. Amamôtimôa. Tsina na tsina môgeto nône amadônga na amaambéa ahngô.

³² Na dikoo kômbéne émapénda, abeeyie muetso n’oma ahmatômu na édidi ébévani ahmatsuaô na gôndé Jésus.

³³ N’asi môsengee muetso ahmatandama v’ombaa eba ômabakangô.

³⁴ Jésus amadôngéda abeeyi ayekani ahmabaka na mabeea maminongo minongo. Ahmakuséda édidi ébévani gôndé oma. Asisingé éangô évovo mbe: Tôsabômu ôdôô te Jésus.

Jésus amaseta tsengene nyetso éaGalilée (Bono na )

³⁵ N’ongôngôe wetso, gôgébaka na vimavima, Jésus amatimôga. Amakusa. Amakea na gô tungu ésaba oma gôévovo na Nzambé.

³⁶ Simon na muetso ahmabaka n’edi ahmakea gôémôbuta.

³⁷ Na vameenahngô Jésus ahmamôbeenda mbe: Ewe te ôbutuni.

³⁸ Jésus amaabéa mbe: Okani na gô sene gésa gô tôvo tômbôka. Nakiaka neekéda wangô. Me navigi te gôéékda.

³⁹ Amakea éékéda gô yebaye yewanyéô éAjuif gô Galilée wetso na amakuséda édidi ébévani gôndé oma.

Jésus amadôngéda môsi ébeea éagega (Bono na Matt. 8:1–4 )

⁴⁰ Môsi ébeea éagega amaviga na gôndé Jésus. Amasiba mabongo medi va mbene aJésus na amamôgondo mbe: Kokooye éwe, ôkô mbe ônyôngéô, ôsadagéô édôngéda me.

⁴¹ Jésus amamôena ngeba. Amakonyo ôgogo edi gôémôbanda. Na amavovo mbe: Me nanyôngéô. Odôngi.

⁴² Tsina na tsina ébeea éagega émadimbana g’ôtôe wedi na amaba na tsôgô.

⁴³ Jésus amamôkangéa mbe: Kiaka.

⁴⁴ Owema ônabeenda môma. Kiaka ôketubéda môdeekedi adigondoku ôtôe woo gadôngédiô éwe. Oétsa te ôgondokue ône ômavovo Moïse mbe: Okô môma adôngédiô eetsa te nane. Ogondukue te gémbégéa mbe adôngédiô.

⁴⁵ Ivô vamakea angô amasuméa te tubaga mbe mônayi yedi môkodi. T’ebandô Jésus asiôngôé éenanô mbe atsigi gô misenge na misenge. Angô amatongonéa na môsenge gô tungu disaba oma ayekani. Ivô oma ahmakobonoko na gôndé Jésus.