LUC TSANGO EAMOSOBA EMATENDA 8 - New Testament in Mitsogo

Ageto amakea na Jésus nzéepo

¹ Jésus amakea gô misenge na gô mbôkaye gôéékéda Tsangô Eamôsôba éokumu aNzambé. Aneengi edi nzima n’abaé amakea n’edi.

² N’avo ageto amakea dôta n’edi. Ahngô te ane amakusédu édidi ébévani na amadôngédu mabeea maô. Môvo te Marie, môsi Magdala amakusédu édidi tsambué ébévani.

³ Môvo te Jeanne môgaya aGuza, ône amabaka môtômine ava ngima aHérode. Môvo te Suzanne n’akedi avo amayanza n’okitie waô gôéwedéa Jésus n’aneengi edi.

Tsava éamômuaki amibie (Bono na Matt. 13:1–9

⁴ Asi mbôka yetso amaviga na gôndé Jésus. Gômakôvana oma ayekani Jésus amagunya ahngô tsava mbe:

⁵ Mômuaki amakea gôémuaka mibie. Vamamuakangô, mivo mimaaga va nzéa. Mimayetuku na makôdô. Nyoyi dimamibôkéda.

⁶ Mivo mimaaga va tungu éamataé. Vamaba miangô mimabandôa éhgeenya mimasinégéa gôsibaké totone na meba.

⁷ Mivo mibie mimaaga va tungu éakavanga. Na kavangaye na mbôtône émakanda géômbé. Kavangaye dimapika mbôtône na dimasinégéda yangô. Mbôtône émawa.

⁸ Mivo mibie mimaaga gô toto éamôsôba. Mimakanda na mimabôta ga kaka miagétabé. Vamamana Jésus égunya tsavane, angô mbe: Anye nôndé na matô gôéôkô, ka te nôôkôkô-ma.

?Gôébégô ndé Jésus amagunya tsava? (Bono na Matt. 13:10–17 )

⁹ Aneengie aJésus amawesea na vandé angô gôémôévôa mbe: Tsavane égunyi éwe ékegea nayee?

¹⁰ Jésus amaabéa ahngô mbe: Mabégô masinigôgéôni na mbeego mokumu aNzambé mameetsô anye te mbe anye nômanigôgéô. Ivô gôndé avo ookô mangô te gô tsava yagétimbôanédu. Te gatôtanga gô Matendeo MaNzambé mbe: Ahngô abono, ivô aseena. Ahngô ookô, ivô asanigôgéô.

Jésus amatimbôanéda tsavane éamibie (Bono na Matt. 13:18–23 )

¹¹ Oôkôni gakegea tsavane éamibie. Mibiemie te Mabégô MaNzambé.

¹² Mine mimaaga gô nzéa te gandé oma ookôni. Ivô yabédé aviga gôéwata gô mitéma miaô éne éôkiô ahngô kabaga anigôgéô na kabaga ahdiia monyo.

¹³ Mibiemie miagô mataé te gandé oma ookô meekédume na ahsinga mangô na gényônga. Na mabégô masasipa gô mitéma miaô. Ahkenea mabégôme te pesu andéô. Nyaa apanda ôkanégu angô ahtsika mangô na ahnika na gô ngima.

¹⁴ Mine mimaaga va tungu éakavanga, te gandé oma ookô Mabégô MaNzambé na vadigaahngô mamapikaméô na matasa matsengene na ônzôô okitie, na gényônga satsengene. Gôndé ahngô Mabégô MaNzambé masaba na ngudi mbe ahngadiia ésima éamisôba.

¹⁵ Mine mimaaga gô totone éamôsôba te ane ookô Mabégô MaNzambé na ahmakuya gô mitéma miaô miamisôba na mimavômani. Ahngô aka oma obibo na mitéma miaô mikuséda ésima éamisôba.

Tsava éadambi (Bono na )

¹⁶ Môma asatumba dambi mbe amipika na môdômbô, na mbe amisuéga gô tsina ekoko. Môma atumba dambi gôémitsakéga gô gévumbéôge sava ngongo, gômbé ane angeengéani angeena na vede.

¹⁷ Metso masuéguni mangaba mamatsutsuuni. Na metso mav’esooe mangaba mav’ekanga na mamamenyanganôni.

¹⁸ Wemani keneani mane mookiô anye mane. Gôébégô ône andé na sôma te ône angoomba éétsôni. Ivô ône asabani, abéyee na vipesu, vingasuméa te watôgô.

Iyee n’adimi aJésus ahmamôbuta (Bono na Matt. 12:46–50 )

¹⁹ Iyee na adimi aJésus amamôbuta. Gômayeka oma va kôbangô edi, ahsiôngôé ébuéa na vandé angô.

²⁰ Jésus amabeendu mbe: Oôkiô, yoo n’anayoo andé v’ombaa. Anyôngéô égôena.

²¹ Jésus amavovo na muetso mbe: Iya, n’aneya, te ane ookô ôgi aNzambé na agobeda angô.

Jésus amadékéda gékunga (Bono na Matt. 8:23–27 )

²² Nyovo Jésus n’aneengie edi amapeka gô mbôngô. Amavovo n’ahngô mbe: Okani na gô dipo tsényé yamubu. Ahmatenôa mbôngône.

²³ Vamabaka aneengie gôénuga mbôngône, Jésus te andé gô vio. Tsina na tsina gékungage gémakungéda miyôkiyôkimie. Mbôngône émabaka mbe émayôa na meba na mbe ématôtô.

²⁴ Vane aneengie amawesea na vandé Jésus gôémôtimôa. Amavovo n’edi mbe: Kumu, deo tôngawa. Vamatimôga Jésus amakaméa gékungage na amadékéda miyôkiyôkimie. Na mimasikama. Gômaba na yôkôyôkô.

²⁵ Jésus ameevôa aneengie mbe: ?Anye mitémamie mianyô nômiitsa na gôndé ndaa? Ivô aneengie amaba te na gomo ôtévo. Amasôbasôbana na ameevôana anguene n’anguene mbe: ?Oô mônongo amôma andé nayee? Atôma buéyé ti na gékungage na miyôkiyôkimie na éangô émôôkéô.

Jésus amadôngéda môsi gédidi gébévani (Bono na Matt. 8:28–34 )

²⁶ Jésus n’aneengi edi amabuéa gô tsenge yane eendô mbe Agérasénien. Te gô dipo tsényé yamubu, tsényé na tsényé na Galilée.

²⁷ Vamasutuméa Jésus gô mbôngône, môma môvo, kumu ambôka amaviga gôémôena. Mômôgôô nône amabaka n’edidi ébévani. Bandôa mbeego asiaatéké môkanda na asidigéé gô eba ivô amadigaaka te gô pesi.

²⁸ Vameenangô Jésus amaamugana na amagudama va makôdô medi. Amavovo n’ogie agô ngongo mbe: ?Obé nayee n’ami? éwe Jésus muana ANzambé, kumu épôni ag’ôba. Nagôgondo, kokoo yewe ômbieetsa me tsôgôô.

²⁹ Amavovo nane te vamatôma Jésus mbe: Gédidi gébévani kusa gôndé môma nône. Gédidige géne gémeengéa gôndé angô kuka yetso. Na oma amamôkataka mogome na panga na miônga gô makôdô gôémôkenea. Ivô kuka yetso amapaba ésengoe. Na gédidige gémamôkeda na gô tunguye yagébé oma.

³⁰ Vane Jésus ameevôa mômôgôô nône mbe: ?Inoo ndaa? Angô mbe: Inami te menga na menga. Amavovo nane gôébégô édidi éyekani émeengéa na gôndé angô.

³¹ Edidie éne émagondo Jésus mbe: Ombiakeda we na gô éduku éamongodi.

³² Vamabaka ôbua ôvôni angudu ômakiaka ôaa môyakô aô va tungu éamôkôdi. Edidi émavovo na Jésus mbe: Keda we tôengéa gô ngudu yedi. Tôdigaa gô yangô. Jésus amasingéa éangô.

³³ Vane édidi ébévani émakusa gôndé mômôgôô nône na émeengéa gô nguduye. Obuee wetso ômavéndama môkôdie na gô mubu. Wetso ômatôndôméa.

³⁴ Vameena akeneyie anguduye éne émabuéani, ahmayavôga ékea gôébeenda oma gô mbôka na gô mitsaba mbe: Nguduye digudi.

³⁵ Oma ahmaviga gôéena éne émabuéani. Ahmatsiga na vandé Jésus. Ahmeena mômôgôô akusédiô édidi ébévani andé digaa va makôdô maJésus. Amaata maduani medi, na môtémedidô ômaba ômadigaaganani. Oma muetso amookô gomo.

³⁶ Ane ameena éetso émabuéani, ahmanigôa akaô gamadôngédu mômôgôô nône amatômuku na édidi ébévani.

³⁷ Vane oma muetso asi tsengene éaGérgéséne amookô gomo na amagondo Jésus mbe: Nôtoga gô tsenge éasô. Jésus amapeka gô mbôngône mbe akiaka.

³⁸ Mômôgôô amakusédéô édidi ébévani amabambéa Jésus mbe: Singa me nadigaa n’ewe. Ivô Jésus amakina mbe:

³⁹ Kiaka, nika na gô eboo. Nigôé éne ééndiô éwe na Nzambé. Vane mômôgôô nône amakea anigôa môsenge wetso éne émayanzéa Jésus gôndé angô.

Muanee amôgeto aJaïrus, na môvo môgeto amadôngéduni (Bono na Matt. 9:18–26 )

⁴⁰ Jésus amanikea éabôga na mbôngône na gô dipo tsényé. Géômbé gévôni gémakôkangana gôémôenéa.

⁴¹ Tsesune eba agéwanyéô sAjuif amaviga. Inedi te Jaïrus. Amasiba mabongo medi va makôdô maJésus na amamôgondo mbe: Viga na gô ebami.

⁴² Muanami ékika amôgeto aka nzima na mipuma mibaé atsikanéda ti tsikanéda. Vamakea Jésus, géômbége gémakea gébébana gôégôngana n’édi.

⁴³ Vamabaka môgeto môvo amabeea môvôva môsingi nzima ema n’ema ébaé. Amadimbanéda ôkitie wedi wetso gôévana ngangaye. Gôsibaké ta na môvo amamôdôngédani.

⁴⁴ Amaviga atsongono gô ngima aJésus gôébanda géondoge samôkandee ômaatangô. Vamabandangô môkandee, ôgi yadingani, môvôvee ômabeea môgeto nône ômadônga.

⁴⁵ Jésus ameevôa géômbége mbe: ?One abandi me indaa? Muetso amatôna. Pierre amavovo mbe: ?Kumu ôseena gasetu éwe na géômbége gégôbanda na gésa na gésa-a?

⁴⁶ Ivô Jésus amanigôa mbe: Nabandiô na môma. Nookiô dipo ngudi yami yedôngéda oma dikusi gôndé me.

⁴⁷ Môgetone amabangôa mbe: Me namenyanganiô tsangadôongôa ésomo. Amawesea atatéa na gomo gôégudama va makôdô maJésus. Amamema va miso moma muetso gamabeeangô na gamabandangô géondoge samôkanda aJésus na gamadôngangô tsina na tsina.

⁴⁸ Jésus amavovo n’edi mbe: Muanami, ôdôngédiô te gôsitsumé éwe ngudi yami paga. Kiaka na gétabé.

⁴⁹ Ogi aJésus ôsisutumé, kimane émaviga gô eba aJaïrus gôémôbeenda mbe: Muanoo awéyi. Ombiayungéda môékédi.

⁵⁰ Ivô Jésus n’eôkô nane, amavovo na Jaïrus mbe: Onakebangana. Okô ôsitsuma ngudi yami paga, muanee angadônga.

⁵¹ Vamabuéangô gô eba, Jésus asisingé ene goéengéa n’edi, buétsé te Pierre na Jean na Jacques, na tétene n’eyeene éamuanee.

⁵² Muetso amadéa na mindônga gôndé muanee. Jésus amadékéda ahngô mbe: Nônadéa. Asiwa. Andé gô vio.

⁵³ Oma amakeenga Jésus. Muetso asibômu mbe muanee awéyi ti wakaga.

⁵⁴ Ivô Jésus amamôtsôpa g’ôgogo na amavovo na gô ngongo mbe: Muana, timôga.

⁵⁵ Muanee amakunduga g’ôwa na amatimôga v’ekoko. Jésus amatôma oma mbe: Itsani angô môyakô.

⁵⁶ Yeedi na tétedi amasôbasôbana na gényônga. Jésus amadékéda ahngô mbe: Nômbiabeenda môma éne ébuéini.