LUC TSANGO EAMOSOBA EMATENDA 6 - New Testament in Mitsogo

Jésus na mabégô manyee edunda (Bono na Matt. 12:1–8 )

¹ Nyee edunda Jésus n’aneengi edi ahmakitsangana tsaga apôtô. Aneengie aJésus ahmakea ahkudua aduka pôtô. Ahmookôa yangô na amaa.

² Apharisien ahmeevôa Jésus mbe: ?Aneengie woo eenda gô nyee edunda éne émakitsô môge mbe, gééndô nyee edunda nayee?

³ Jésus amaabéa ahngô mbe: ?Anye madeo nôsitanga éne émeenda David, angô n’ane ahmabaka n’edi vamookô ahngô nzaa-a?

⁴ David ameengéa na gô eba aNzambé gôébongo mipemba. Ameetsa akedi na ahmaa muetso mipemba miamôge misaaka oma muetso, buétsé te anguene adeekedi adigondoku.

⁵ Menyani mbe: Me Muana Amôma te Kumu anyee adunda.

Gômabaka mômôgôô n’ogogo ômasombegani (Bono na Matt. 12:9–14 )

⁶ Ovo enyaa edunda, Jésus ameengéa na gô eba agéwanyéô gôéékéda. Wangô amadenga mômôgôô andé n’ogogo ômôgôô ômasombegani.

⁷ Anigôi amige miaNzambé n’Apharisien amamôsingégéda gôémôbono mbe mavooe angamôdôngéda nyee edunda. Ahmeenda nana te gôémôsoseda.

⁸ Ivô Jésus asibômu matasa maô. Amatôma môsi ôgogoe mbe: Timôga. Tema môtie va miso momeaa muetso. Mômôgôô nône amatimôga va miso moma.

⁹ Vane Jésus amavovo mbe: Me nanôévôa mbe: ?Nyee edunda na gôéyanza mamisôba na gôéyanza mabévani, éne éabuedi yééni? ?Na gôédôngéda môma na gôéyôha môma, éne éabuedi yééni?

¹⁰ Jésus amabono muetso amadenganôni na amatôma mômôgôô nône mbe: Konyo ôgogoe woo. Vamakonyo angô ôgogoe, ômadônga.

¹¹ Ivô avo amakambôga na ameevôana anguene n’anguene mbe: ?Tôvangéa Jésus pangô ndé?

Jésus amasevôa aneengi edi nzima n’abaé (Bono na Matt. 10:1–4

¹² Gô ndéô nene, Jésus amabata gô ngongo amôkôdi gôévovo na Nzambé. Pitsi amôbongo asiebogé vio, amavovo na Nzambé.

¹³ Vamaagiia nyee amabambéa aneengie edi amasevoa nzima n’abaé. Amateta angô mbe, ane amasevouni na amatômuni.

¹⁴ Angô nzima n’abaé, miname maô te Simon. Jésus amoogaka angô mbe, Pierre. Na muanaya aPierre, André. Na dôta Jacques na Jean na Philippe na Barthélemy.

¹⁵ Na Matthieu na Thomas na Jacques muana aAlphée, na épo Simon, (ône amabaka gétômbiatômbia gô mabégô matsengene).

¹⁶ Na Judas dibaé. Epo te muana aJacques. Na épo te Judas Iscariote, ône amakoga môkabi aJésus.

Jésus ameekéda na amadôngéda oma (Bono na Matt. 4:23–25 )

¹⁷ Jésus n’aneengi edi nzima n’abaé amasuma gô môkôdie gôébuéa na gô tungu éagéndamba. Gône amadengana n’avo aneengi ayekani. Vamabaka dôta na pingô yoma amaviga gô tsengene nyetso éaJudée na misenge miaJérusalem na Tyr na Sidon.

¹⁸ Muetso amaviga gôéôkô gameekéda Jésus na gôédôngédu mabeeame maô. Na ane dôta amayungéduku n’edidi ébévani amadôngédu.

¹⁹ Muetso amayôngéô ébanda Jésus gôébégô gôndé angô gômakusa ngudi yedôngéda muetso.

Mate na môkôkôu (Bono na Matt. 5:1–12 )

²⁰ Jésus amabono aneengie edi na amavovo n’ahngô mbe: Ti gô gényônga géndé n’anye nôndé gébé na sôma. Okumu aNzambé ôndé gôndé anye.

²¹ Ti gô gényônga géndé n’anye nôôkô nzaa ndéô yedi. Anye nôngaba nômangutéda na gébutédô môyakô. Ti gô gényônga géndé n’anye nôdéani ndéô yedi. Anye nôngaséka na gényônga.

²² Ti gô gényônga géndé n’anye vadudanô anye n’oma gôébégô éami, me Muana Amôma. Tsôkéakani ôkô oma anôkina, na anôbuanya, na anôdeta mbe anye oma aJésus nôsanyepa.

²³ Tsôkéakani vabuéa mônongo amabégô. Tsédani gô mangô na gényônga gôébégô nôngadiia misenda g’ôba. Va mbeego anye madeo nôsibôtu, apandôédi amatasa maNzambé amakuanô te nane na téteye yane anôkuanani.

²⁴ Ti gô maguga mandé n’anye nôdônga g’ôkitie wanyô. Gényôngage sanyô, nômani égéena.

²⁵ Ti gô maguga mandé n’anye nôsabuta sôma. Anye nôngôôkô nzaa épôni. Ti gô maguga mandé n’anye nôsékani pitsi yedi. Anye nôngaba na mitéma miditani na nôngadéa miéngé.

²⁶ Ti gô maguga mandé n’anye nôkumédu n’akanyô. Anye madeo nôsibôtu eekédi adiboe amakumédu te nane.

Nyôngéôni adudeoe wanyô (Bono na Matt. 5:38–48 7:12a

²⁷ Jésus angô mbe: Me navovo te n’anye nôôkôni mbe: Nyôngéôni adudeoe wanyô. Indani mamisôba gôndé ane anôduduni.

²⁸ Istani mate gôndé ane anôkokooni. Vovoni na Nzambé mamisôba gôndé ane anôkuanani.

²⁹ Okô môma agôbômôyi gô ébaku évo, itsa angô agôbômôa dôta gô évo. Okô môma anyôngéô ébongo ngoyine yoo épôni, kôndéga angô na gényônga buéyé na kapane nyetso.

³⁰ Gôndé ône agôduka sôma, buedi gôémôétsa sangô. Okô môma abongi sômage soo, ômbiamôwata sangô.

³¹ Indéakani akanyô ngu na éne ényôngéô anye mbe akanyô anôéndéa.

³² Okô anye nônyôngéô ane anônyôngéôni ?nômenya mbe Nzambé anganôkuméda-a? Asanganôkuméda. Buéyé n’oma abévani asadagéô ényôngéô ane avamba n’ahngô.

³³ Okô anye nôénda mamisôba gôndé ane anôéndéa mamisôba ?nômenya mbe Nzambé anganôkuméda-a? Asanganôkuméda. Buéyé n’oma abévani eenda te nane.

³⁴ Okô nôsombeda te gôndé ane anganikédéa anye tsômbine nyetso, gésombede gôndé ane asanganônikédéani ?nômenya mbe Nzambé anganôkuméda-a? Asanganôkuméda. Buéyé oma abévani asombeda gôndé oma n’aô abévani ane anganikédéa tsômbine nyetso.

³⁵ Géé anye, nyôngéôni ane anôduduni. Indani ahngô mamisôba. Sombedani ahngô gébé n’etasa mbe nôngavanéô. Vane nôngeetsô na Nzambé môsenda ôvôni na nôngamenyanganô mbe ana aNzambé ône andé Kumu angudi yetso. Gôébégô amuene Nzambé eenda mamisôba gôndé ane abévani na asamôkumédani.

³⁶ Bakani na ngeba gandé Tétanyô angô kumu angeba.

Nômbiatsuava akanyô (Bono na Matt. 7:1–5 )

³⁷ Nômbiatsuava akanyô kabaga anye nôtsundédu na Nzambé. Nômbieeséda akanyô, kabaga Nzambé anôeséda. Singéani akanyô kokoo, na Nzambé anganôsingéa dôta kokoo.

³⁸ Itsani akanyô, na Nzambé anganôétsa. Gôngeetéô gô gébémbége soo gévôni, ôkabô ôvôni. Gébémbége soo géngayôa na géngatsukédu mbe géômba éyuésédu na nzôngô. G’ôkanee ôkanéga anye gôéétsa akanyô, Nzambé anganôkanégéa mane medi mobiia te mônongovo.

³⁹ Jésus amagunya ahngô tsava gô nyivo mbe: ?Môsi pogu anoongôa étévéda môkedi nzéa-ma? Aé, asangoongôa kabaga angô muetso abaé akuyaméa gô éduku.

⁴⁰ One eekéduni asangootéa môékédine wedi. Ivô ane eekédiôni ôkô amenya ti v’ekôdéô éamenyaga angaba ga môékédine waô.

⁴¹ Ewe ôena tsengesengene éndé gô éso éamôkoo na ?ôseena éengôe éndé gô ésoe yoo nayee?

⁴² Ewe ôseena éengô éndé gô ésoe yoo ?nayee ôongôa évovo na môkoo mbe: Wee ami, singéa me nagônôtôa tsengesengene éndé gô ésoe yoo? Ewe te môma enyepa éamônya, panga énôtôa éengôe éndé gô ésoe yoo. Vane ôngeena na vede gôénôtôa tsengesengene éndé gô éso éamôkoo.

Géétété na miônda mibôta sangô (Bono na Matt. 7:16–20 12:33–35 )

⁴³ Géétété samôsôba gésoongôa ébôta miônda mibévani na géétété gébévani gésoongôa ébôta miônda miamisôba.

⁴⁴ Eétété éetso émenyanganô te gô miôndamie mibôtangô. ?Môma aneenga masagu gô mônzembe-a? ?Môma aduka pivi gô kavanga-a?

⁴⁵ Môma amôsôba akuséda mane mamisôba g’ôkitie ômasuégangô gô môtéma. Môma môbévani akuséda mane mabévani g’ôkitie ômasuégangô gô môtéma. Menyani mbe éne éndé gô môtéma ékusa te gô mônya.

Tsava éasaayi ayeba (Bono na Matt. 7:24–27

⁴⁶ ?Anye nayee nôénda me mbe: Kumu, Kumu, na anye nôsagobeda me gô mane matôma me?

⁴⁷ Nanganônigôa gandé anye oma. Muetso ahviga na gôndé me na ahngô ookô mane mavovo me na ahkenea mangô nanôbeenda éne égono n’ahngô.

⁴⁸ Ahndé ga môma amasaa eba. Amasiga ngu na gô totene éamataé gôékônza ôbôgee. Géningôge gémaviga na mebame mamaguua totone. Na eba ôsipupé gômasaaô angô gô ngongo obobo.

⁴⁹ Na ône ookô mavovia mami na asakenea mangô agono na môvo môma amasaa ebedi va ngongo atoto gésigé ôbôgee. Géningôge gémaviga na gémaguua eba. Ebee ômakuéa. Eetso émabungana.