LUC TSANGO EAMOSOBA EMATENDA 4 - New Testament in Mitsogo

Yabédé amakanéga Jésus (Bono na Matt. 4:1–11 )

¹ Jésus ameenôga gô Jourdain môtémedi ômayôa na Gédidi SaNzambé. Amakedu na sangô na gô tsenge émagasani ésadigaa oma.

² Amakanégu na yabédé gô nzima dinayi yapitsi. Pitsiye yetso dine asiéé môyakô. Vamoota yangô amookô nzaa.

³ Yabédé amamôkanéga mbe: Okô mbe éwe na gô pie Muana ANzambé, koa mataé mema maka mipemba.

⁴ Jésus amasiia mbe: Matendeo MaNzambé matônigôa mbe: Môma asadônga gô mipemba mitévo.

⁵ Yabédé amamôbatéda na gô ngongo ngongo. Amamôtubéda tsengeye yetso yava tsina gôémiena pesu andéô gakadima môkadikadi.

⁶ Yabédé amavooto Jésus mbe: Oeni, tsengeye yedi yetso, na ditômuye yaô, n’okitie wetso, ômeetsô te me. Me dôta nangamikaba n’one anganyôngéô me éétsa.

⁷ Okô ôsibi mabongome moo va tsina gôéneegeda me, éetso éngaba te éoo.

⁸ Jésus amamôsiia mbe: Matendeo MaNzambé matôbeenda mbe: Neegeda Kumu Nzambé éoo, na ôyanzéa te angô môtévo.

⁹ Yabédé amakea na Jésus na gô Jérusalem. Amabata n’edi na gô ngongo eba aNzambé. Amavovo na Jésus mbe: Okô mbe éwe na gô pie Muana ANzambé, tséda na gô tsina.

¹⁰ Matendeo MaNzambé matônigôa mbe: Nzambé angatôma ayanzi edi asi g’ôba aviga gôékenea éwe.

¹¹ Na Matendeo moomba évovo mbe: Asi g’ôba angagôtsua gô mogo maô. Kabaga makôdô moo mooka ébaku.

¹² Jésus amamônikéda mbe: Ematendu dôta mbe: Ombiakanéga Kumu Nzambé éoo.

¹³ Vamamana yabédé ékanéga Jésus gô minongo mietso, yabédé amatongonéa n’edi gôéenéa nyene ndéô.

Jésus amabandôa gésoo sedi gô Galilée (Bono na Matt. 4:12–17 )

¹⁴ Jésus amanika na gô Galilée. Amabaka na môtémedi ômayôa na ngudi yetso yaGédidi SaNzambé. Tsangône yedi ématsanzabana tsengene nyetso.

¹⁵ Ameekéda gô yebaye yewanyéô. Kumane yedi émookanô n’oma muetso.

Jésus amakinô gô mbôkedi (Bono na Matt. 13:53–58 )

¹⁶ Jésus amabuéa na gô Nazareth, te mbôkane émoongôgangô. Gô nyee edunda ameengéa na gô eba agéwanyéô gamabaka gésima sedi. Amatema gôétanga Matendeo MaNzambé.

¹⁷ Ameetsô gésangô gématenda Esaïe, môpandôédi amatasame maNzambé. Amakonyo môvutégue ômatenduni na amatanga mabégô mema. Angô mbe:

¹⁸ Gédidi SaKumu Nzambé géndéké gôndé me. Amasevôa me gôétsua Tsangône yedi Eamôsôba na gôndé misuga. Amatôma me gôédôngéda mitéma mindé gô panda. Amatôma me gôénigôa géobogeo sedi na gôndé asi tsôgôô. Amatôma me gôépôéda miso masi pogu, ôbiia. Amatôma me gôénzeegeda ane andé gô tsina otômu akumu édagani.

¹⁹ Amatôma me gôéevéda oma ndéône éngeenanô mabégô mamisôba maKumu Nzambé.

²⁰ Vane Jésus amanikéa évutéga môvutégue gôédeekeda angô môyanzine eba agéwanyéô. Amadigaa. Oma muetso amadenganôni amamôbono na nzôô.

²¹ Na vane Jésus amabandôa épandôéda mbe: Ene étangi me gô Matendeo MaNzambé nôeni éangô n’atsatsee vandé anye gôéokô éangô étangôni.

²² Muetso amasôbasôbana na gényônga gômanigôa angô nane. Na ahmatsapéô gô mavovia medi manyônganéôni. Ahngô mbe: ?Odôô ka te muanee aJoseph-ma?

²³ Jésus amaabéa ahngô mbe: Mavooe nôngagunya me tsava gatôvovo mbe: Môbôgine, panga éadôngéda ômuene. N’anye mavooe nôngeenda me mbe: Tômani éôkô metso mamayanzewe gô Capernaüm. Tambô indaka mangô mônogovo gô mbôkane yoo émabôtu éwe, tôena mangô.

²⁴ Jésus amoomba mbe: Me nanôbeenda ébégô édué éapie. Gôsaba môpandôédi amatasa maNzambé anyônganéô gô mbôkane émabôtu angô.

²⁵ Ekegea te nane. Gô ndéône émadônga tétasô Elie, mbuuane ésinyogé gô mipuma mitatô na gébéndéké. Asi tsengene nyetso amookô nzaa. Gô tsenge éaIsraël gômabaka mikué miyekani gô ndéô nene.

²⁶ Ivô Nzambé asitômé Elie na gôndé mikué miageto miagô tsengene yedi gôédiia môyakô. Elie amatômu na gôndé môkué amôgeto amadigaa gô mbôka éaSarepta gô tsenge éaSidon.

²⁷ Gô ndéône dôta émadônga Elisée, môpandôédi amatasa maNzambé, gômadenganô oma ayekani asi ébeea éagega gô tsengene yedi. Tambô gôndé ahngô gôsidôngédu ta na môvo. One amadôngéduni te Naaman, môsi tsenge étetu mbe Syrie.

²⁸ Muetso amadenganô gô eba agéwanyéô amakambôga n’opisa gô mane mamavovo Jésus.

²⁹ Ahmatimôga muetso na amakeda Jésus na gô ngongo amôkôdie av’etumba éambôkane yaô. Ahmanyôngéô émôtinda na gô dongu amôkôdie.

³⁰ Ivô Jésus amoota va gatse aô na amakea.

Môma amayungédu n’edidi ébévani (Bono na )

³¹ Jésus amakea na gô mbôka éaCapernaüm, éndéké gô Galilée. Gô nyee edunda ameekéda oma.

³² Ane ahmookôni amatsapéô gô meekédu mamisôba maJésus. Meekédu medi gébômu mbe môma andé n’enyanga.

³³ Gô eba agéwanyéô gômabaka mômôgôô na gédidi gébévani. Amaadôngana mbe:

³⁴ ?Ah Jésus môsi Nazareth ôbé nayee n’aso? ?Omaviga gôédimbanéda wea? Me tsabômu mbe éwe te Muana Amatsimamani ômatômu na Nzambé.

³⁵ Jésus amadékéda sangô mbe: Kôda vane. Kusa gôndé môma nône. Sangô gémagunya môma na va tsina va miso moma muetso. Na sangô gémakusa gôndé mômôgôô nône gésimôôkédu pievia.

³⁶ Muetso amatsapéô na ameevôana anguene n’anguene mbe: ?O te wene mônongo ameekédu-a? Mômane ôdôô atôma édidi ébévani ti n’enyangee na ngudiye, na éangô te kusaga.

³⁷ Tsangône éaJésus émapaa tsengene nyetso.

Jésus amadôngéda abeeyi ayekani (Bono na Matt. 8:14–17 )

³⁸ Jésus amanôtôga gô eba agéwanyéô gôékea na gô eba aSimon. Ogoyi aSimon, yeene amôgayedi, amabeea nzônzônzô. Amabambéa Jésus gôémôdôngéda.

³⁹ Jésus amakotomo vandé môbeene na amakangéa sodige mbe: Nôtôga gôndé môgetone ôdôô. Sodige gémanôtôga. Môgetone amatimôga tsina na tsina na amaambéa ahngô muetso môyakô.

⁴⁰ Na dikoo kômbéne émapénda, muetso ane amabaka n’abeeyi aô ahmatsua ahngô na gôndé Jésus. Jésus amatsakéga ahngô mogo, môvo môvo gôéahdôngéda.

⁴¹ Edidi ébévani émakusa gôndé abeeyi ayekani. Emakusa émaadôngana mbe: Ewe te Muana ANzambé. Jésus amadékéda éangô mbe: Nômbiavovo. Gôébégô édidie ésibômu mbe Jésus te Christ ône amatômu na Nzambé.

Jésus ameekéda gô Judée (Bono na

⁴² Vamaagiia nyee, Jésus amapénda gô môsenge gôékea na gô tungu ésibé oma. Ivô oma ayekani amabandôa émôbuta. Vamamôena ahngô amamôsikaméda mbe: Ombiakea na gô nyene tungu.

⁴³ Ivô Jésus amanigôa ahngô mbe: Tsikani me nakea dôta na gô mivo misenge gôéékéda Tsangô Eamôsôba éokumu aNzambé. Me namatômu na Nzambé te gô éne.

⁴⁴ Vane Jésus ameekéda gô yeba yewanyéô yagô Judée.