LUC TSANGO EAMOSOBA EMATENDA 24 - New Testament in Mitsogo

Jésus amakunduga g’ôwa (Bono na Matt. 28:1–10 )

¹ Vamageeô manyaa tsono ageto amakea na gô pesi. Amatsua miyombo mimakônzahngô.

² Ahmadenga étaé évôni émakandanganédu na va kôbangô ombee angiine éaJésus.

³ Ahmeengéa na asidenge ôtôe aKumu Jésus.

⁴ Ahmatsapéô gô ébégôe éangô. Te vane oma abaé amaata maduani mobébayi amatsiga gôndé agetoe.

⁵ Agetoe ahmeena gomo. Amakôtômô édimôe éaô na gô tsina. Omee abaé ane ameevôa angô mbe: ?Nôbuta ône adôngani va gatse ane amawani nayee?

⁶ Asabadô égô duégô. Akundugi g’ôwa. Bangôani gamavovo angô vamabakangô agébaka gô Galilée.

⁷ Amavovo mbe: Engaba mbe Muana Amôma angakabô gô mogo moma abévani. Angakomedu gô gésumuge na angakunduga g’ôwa pitsine éamôtatô.

⁸ Agetoe amabangôa mavoviame maJésus.

⁹ Vamanôtôgahngô gô pesi amakea gôébeenda mabégô mema metso gôndé nzima na môneengi môvo na gôndé akaô muetso.

¹⁰ Ane amanigôa aneengie mabégôme te Marie môsi Magdala, na Jeanne, na Marie yeene aJacques, n’avo ageto amabaka n’ahngô.

¹¹ Ivô aneengie amatsuma mane mamanigôa agetoe paga. Amamenya mbe amavaka te vakaga.

¹² Béyé nane, Pierre amatimôga gôékea pita na gô ngiine émagunyuku Jésus. Amakôtômô gôédokiméa. Ameena te mikanda mitévo mimadipôkô Jésus. Na amanika na gô ebedi akea asôbasôbana gô éne émeenangô.

Ebégô émabuéa gô nzéa va kaba aJérusalem na Emmaüs (Bono na )

¹³ Gô nyee ômakunduga Jésus, aneengi abaé amakea na gô mbôka étetu mbe Emmaüs. Etongoe amôtôô, ôtimôga gô Jérusalem na gô Emmaüs te ôkana anzima na kilometre épo.

¹⁴ Angô abaé amanigôanaka mane mamabuéaka gô ndéô nene.

¹⁵ Vamavovoko ahngô na vamanigôana ahngô, amuene Jésus amawesea na vandé ahngô na amakeanédana, ahngô muetso atatô nzéa épo.

¹⁶ Amôgôôe abaé ameena Jésus na miso maô, ivô asiôngôé ébangôa mbe, ôô te Jésus.

¹⁷ Jésus ameevôa ahngô mbe: ?Anye nôkea nôvovo ndé? Ahmasikama gôémôbono na mitéma miditani.

¹⁸ Va gatse angô abaé, môvo inedi Cléopas, amamôaabéa na nyivô mbe: ?Va gatse asi Jérusalem muetso te ômuene na koo ôsiôkô mane mabuéyi wangô pitsi yedi-a? Akoo amookô mangô.

¹⁹ Jésus angô mbe: ?Ene yebégô ndé? Ahngô amamônigôa mbe: Ebégôe te éne éaJésus, môsi Nazareth. Amabaka môpandôédi amatasa maNzambé na amayanzaka mabégô mamisôba va mbene aNzambé na va mbene oma.

²⁰ Ebégôe dôta te gameenda tsesu yadeekedi adigondoku, n’atômi atsenge. Ameeséda Jésus gôéyôhu na amamôyôha va gésumuge.

²¹ We tômaténdéda mbe angô te ône angayuua éongo éaIsraël gô panda yaô, tambô g’eebuéa mabégô mema, deo noo te pitsine éamôtatô.

²² Buéyé vane, n’ongôngô avo ageto avigi na tsangô étsapéyiô we. Agetoe amenegéyi n’ongôngôe wetso na gô ngii.

²³ Ivô asidenga nzumbine. Ahmaviga anigôa mbe: Môsi g’ôba amavigédu na Nzambé amatsutsuga na vandé ahngô gôéahbeenda mbe Jésus andé ti monyo.

²⁴ Avo va gatse asô, akeyi anguene na gô ngii na adengi ti mônongovo gavovi agetoe, ivô asiena Jésus.

²⁵ Vane Jésus amasemba ahngô mbe: Ah, anye oma agébé n’eodo. Mitéma mianyô mindé na paga gôésinga éetso émavovo apandôédi amatasa maNzambé.

²⁶ Christ, ône amatômu na Nzambé ?mbeka awa, mbe ameengéa g’ôndômbedi-a?

²⁷ Na vane, amasupua gô Matendeo MaNzambé metso maamuene Jésus, bandôa na meekédu maMoïse na mane mamatenda apandôédi amatasa maNzambé.

²⁸ Vamatsigahngô gô mbôka, Jésus amabaka mbe oota.

²⁹ Ivô akedi abaé amamôsikéga mbe: Dunda n’asô éva, évitsie évigi, nyoo ôédi. Angô ameengéa gôédigaa n’ahngô.

³⁰ Vamadigaahngô va tabudé, Jésus amabongo môpemba na amakuméda Nzambé gô angô. Amabukua angô, na ameetsa akedi.

³¹ Miso maô mamapôga na amamenya mbe te Jésus. Ivô Jésus amadimbana vandé ahngô.

³² Amavovo anguene n’anguene abaé mbe: Vamatônigôana gô nzéa ?we tôsiôkô gényônga na géviôviô ga soto gô mitéma miasô-a? Emabaka ti gényônga vamasupuéangô wa n’oo Matendeo MaNzambé.

³³ Ahngô abaé amatimôga na dikooye dine gôénika na gô Jérusalem. Amadenga nzima na môneengi môvo, n’avo amabaka n’ahngô vavo.

³⁴ Ahmavovo n’ane amaviga gô Emmaüs mbe: Na gô pie, Kumu akundugi g’ôwa, ameenanô na Simon.

³⁵ N’ahngô abaé dôta amanigôa éne émabuéa vamabahngô gô nzéa na gamabukuangô môpemba gôébangôéda aneengie mbe: Aakani, ôô te me Jésus.

Jésus amatsutsuga vandé nzima na môneengi môvo (Bono na Matt. 28:16–20 )

³⁶ Vamabakangô andé gôénigôana, amuene Jésus amatsutsuga vandé ahngô. Amavovo mbe: Gétabé gébaké gôndé anye.

³⁷ Onzenze ômatsôpa angô na amookô ti gomo mbe te môma amawani anikini.

³⁸ Ivô Jésus amasuméda ahngô mitémamie mbe: ?Anye nôkebangana ndé? ?Mitéma mianyô migébaka na paga gôndé?

³⁹ Bononi mogome mami na makôdôme mami. Nôngeena mbe na gô pie ôô te me Jésus. Bandakani na eenakani. ?Môma amawani anikéenanô andé n’otô na épa-a? Me nandé n’otô na épa.

⁴⁰ Amavovo nane te andé gôétubéda mogome na makôdôme medi.

⁴¹ Aneengie amabaka te agébaka na paga n’etsapéô n’ekasôga. Vane Jésus amaduka ahngô mbe: Itsani me môyakô, naa.

⁴² Ahmamôétsa gébéndéké sanyama éagô mbéyi gémabéku môganga.

⁴³ Jésus amagébongo na amagéaa va miso maô.

⁴⁴ Te vane Jésus amabangôéda ahngô mbe: Nôeni, metso mane mamavovo me vamabaka me n’anye, mane mamatendu gô miganda miaMoïse na mine miapandôédi, na mine miamimbô, mimeevédaka anye mbe gôndé Jésus éngaba te nane. Menyani mbe mamani éenanô.

⁴⁵ Jésus amakôndéga éodoe éaô mbe ahnganigôgéô Matendeo MaNzambé.

⁴⁶ Amanigôa ahngô mbe: Oôkôni éne ématenduni. Ematendu mbe: Christ, ône angasevou na Nzambé angeena maguga na angakunduga g’ôwa pitsine éamôtatô.

⁴⁷ Tsangône éedi éngatsuaô na gô tsengeye yetso gôéékédu te gô ngudi yainedi, bandôa gô Jérusalem. Tsangône éedi te mbeea éazambé ébambéa angô oma gôékoa mitéma miaô na mônongoe waô, gôsingéô ahngô na Nzambé kokoo gô ébévee éaô.

⁴⁸ Anye te mbangiye yamane mameenanye na mamookô anye gôndé me.

⁴⁹ Memuene nanganôkudégéa muene môwedi, ône amavanga Nzambé gôénôétsa géenza. Anye nômbianôtôga gô môsenge ôdôô buétsé te ngudi yone andé g’ôba dipanga ésutuméa na gôndé anye.

Jésus amabata na g’ôba (Bono na )

⁵⁰ Jésus n’aneengi edi amanôtôga gô Jérusalem gôékea na gô gésa saBéthanie. Jésus amakonyo mogome na ameetsa aneengie mate gô mavovia medi.

⁵¹ Jésus agébaka gôéénda nane, na amatômbu na g’ôba. Amaagana na amatsika aneengie.

⁵² Anguene aneengie asiene panda. Amamôneegeda na amanika na gô Jérusalem n’ekasôga éagényônga gévôni.

⁵³ Amabaka gô eba aNzambé na pitsi n’omanda gôékuméda na gôéneegeda Nzambé.