LUC TSANGO EAMOSOBA EMATENDA 23 - New Testament in Mitsogo

Jésus amatsundédu na Pilate (Bono na Matt. 27:1–2 11–14 )

¹ Muetso amatimôga na amakeda Jésus na vandé Pilate.

² Amatsua môsunda na gôndé Pilate mbe: Tôdengi môma noo Jésus, adékéda oma mbe: Nômbienda mane mavovo môtômi atsenge. Ebakanéda oma gôéétsa môtômi atsenge César, depu. Na eenza Nzambé mbe: Me te Christ môtômine wanyô.

³ Pilate amatsundéda Jésus mbe: ?Ewe te môtômine aAjuif-a? Jésus amamôaabéa mbe: Te gavovi éwe.

⁴ Pilate amavovo na tsesu yadeekedi adigondoku na géômbége mbe: Me tseena ébégô éeséda Jésus.

⁵ Ivô géômbége gémavovo na gébaki mbe: Ayungéda mitéma miasi tsenge gô éne éékédangô, bandôa gô tsengene nyetso éaJudée, na éaGalilée, ngu n’eva.

Jésus amatsundédu na Hérode

⁶ Vamookô Pilate ina éaGalilée étetu, ameevôa oma mbe: ?Tambô mômôgôône ôdôô te môsi Galilée-a?

⁷ Pilate n’eôkô mbe Jésus andé g’ôtômu aHérode amamôkudéga na gôndé Hérode amabaka dôta gô Jérusalem pitsiye dine.

⁸ Vamatsiga Jésus gô ebedi, Hérode ameena buedi. Va mbeego vamookô Hérode mabégô mameenda Jésus amanyôngéô émôena. Hérode amatasaka mbe: Buétsé nangeena Jésus atubéda émbégéa éangudi yedi.

⁹ Hérode ameevôa Jésus pingô yanyivô ivô Jésus asimôbiké.

¹⁰ Tsesu yadeekedi adigondoku, n’anigôi amige miaNzambé amabaka vangô. Amasunda Jésus n’oési.

¹¹ Hérode na migode miedi amamôénza na amamôseka. Gô dienza yaô amamôaatéda ngoyi éokumaka na amanikéda émôkudéga na gôndé Pilate.

¹² Pilate na Hérode amabaka adudeo, ivô bandôa nyoone amavamba.

Jésus ameesédu n’oma gôéyôhu (Bono na Matt. 27:15–26 )

¹³ Pilate amabambéa tsesu yadeekedi adigondoku na peeye yAjuif, n’asi mbôka. Amavovo mbe:

¹⁴ Nômaviga na gôndé me na mômôgôône ôdôô. Nômôsundi mbe: Abeenda oma gôékina mane mavovo môtômi atsenge. Nôeni, me namôtsundédi va mbene anyô. Na me tsimôena ta n’oési ôvo gô mane masundi anye angô.

¹⁵ Buéyé na Hérode, te mônongovo. ?Nôseena ganikéyi angô émôkudéga-a? Nôeni, mômôgôô noo asindé ébégô mbe angayôhu.

¹⁶ Tambô me nangeenda mbe abitô na mibitô na vane nangamônzeegeda. [

¹⁷ Gô sueti yetso yaPâque, te gésima samôtômi atsenge gôékuséda môvo môsi gô tsôgôô.]

¹⁸ Muetso amaadôngana ôgi ôvo mbe: Yôhéda Jésus. Kusédéa we Barabbas.

¹⁹ (Tambô Barabbas ameengedu gô eba atsôgôô gômakékôangô ôtômu amôtômi atsenge, na gômayôhangô môma.)

²⁰ Pilate, gômookôangô tsôvé éenzeegeda Jésus, amoomba évovo na géômbége.

²¹ Muetso amaadôngana mbe: Yôhani angô. Komedani angô gô gésumu sowa.

²² Pilate amavovo kukane éamôtatô mbe: ?Ebégô ndé ébévani éendi Jésus ôdôô? Tseena ta n’ebégô évo mbe ayôhu. Tambô namôénda mbe abitô na mibitô na vane anganzeegedu.

²³ Géômbége asitsiké éadôngana mbe: Komedani angô gô gésumuge. Mindônga miaô mimookano.

²⁴ Pilate amasôdôa mbe: Ene ényôngéô anye éngeendô.

²⁵ Pilate amakuséda Barabbas. Te ône amabaka gô eba atsôgôô gômakékôangô ôtômu amôtômi atsenge na gômayôhangô môma. Te ône amanyôngéôkô géômbége mbe akusédu. Pilate ameetsa géômbége Jésus gôémôénda gamanyôngéôkô ahngô.

Jésus amakomedu va gésumu sowa (Bono na Matt. 27:32–44

²⁶ Vamakedahngô Jésus na gôngayôhu angô, môma môvo amavigaka gô tsaga yedi, te Simon môsi Cyrène. Oma amabambéa Simon gôétsua gésumuge géngayôhu Jésus. Amagétsua na amaanda Jésus gô ngima.

²⁷ Jésus amaandôkô gô ngima na géômbé gévôni. Ageto amakea adéa na abômôa mbôma yaô gôébégô éaJésus.

²⁸ Jésus amanikéda misome na gôndé ahngô na amavovo mbe: Ageto agô Jérusalem, nônadéa me. Déani anyene n’anee wanyô.

²⁹ Nôeni, pitsiye dingavigani vangeendô mbe: Anye ékômba, ti gô gényônga géndé n’anye. Mabuyi masibôténi na mabéne masinyuésédani, tsôkeani na gényônga.

³⁰ Oma angagondo mikôdi mivôni mbe: Pékôgéani we. Na mine migemige mbe: Pikaméani we.

³¹ ?Okô oma eenda mabégô mema gô géétété gédôngani angeenda nayee gô géne gémawani?

³² Migode mimakeda dôta asi môkôbé abaé gôéyôhu géômbé na Jésus.

³³ Vamabueahngô gô gétungu gééndô mbe kooko amôtsé, amakomeda Jésus va gésumu sowa. Ahmakomeda dôta asi môkôbé abaé, môvo gésa gémôgôô, môvo gésa gégeto.

³⁴ Jésus amasambéda mbe: Téta, singéa ahngô kokoo. Ahsamenya éne ééndahngô. Migode mimatséva na nzéké gôésevoa éduani éaJésus énganyôngéô angô.

³⁵ Géômbége amaba vangô na amabono Jésus. Peeye yAjuif amadeta Jésus mbe: Amanôtôa akedi gô panda yaô, anôtôdégôvôdé amuene ôkô mbe angô te Christ amasevou na Nzambé.

³⁶ Migodemie dôta mimamôdeta. Mimawesea na gôndé angô gôémôétsa meba manganye.

³⁷ Migode mimamôdeta mbe: Okô mbe éwe te môtômine aAjuif, nôtôga gô panda yoo.

³⁸ Va ngongo aJésus gômatenduku mbe: Odôô te môtômine aAjuif.

³⁹ Môsi môkôbé môvo amakomeduni amamôdeta mbe: ?Ewe, kaka te Christ-a? Nôtôga ômuene gô gésumuge na ônôtôa dôta we.

⁴⁰ Ivô môvo môsi môkôbé amasemba môkedi mbe: ?Tambô éwe, ôseena Nzambé gomo-a? ?Anye na Jésus ôdôô nôsaba gésisédéô gévo-a?

⁴¹ Môtsundue asô n’oo te kuanakue. Tôdii diési gô mabégô masô n’oo mabévani. Ivô Jésus asiinda ta n’ebégô évo ébévani.

⁴² Na amavovo na Jésus mbe: Vangavigewe n’enyangee yoo yetso gôétôma, ôneeba me.

⁴³ Jésus amaabéa angô mbe: Me nagôbeenda na gô pie mbe deo noo ôngaba n’ami g’ôba gô gédigaa samôsôba gékea me.

Jésus amawa (Bono na Matt. 27:45–56 )

^44-45 Emabaka éka ndéône étsakama kômbéne. Evitsie émasuma tsengene nyetso ngu na ndéône étengama kômbéne. Gô eba aNzambé ômbô amôkanda ôebeda tsongo éadisambô édigaa Nzambé, ômaatôga va ngenge.

⁴⁶ Jésus amaadôngana n’ogi atsikanédana mbe: Téta, me nadeekeda gédidi sami gô mogo moo. Vamamana angô évovo nane, amawa.

⁴⁷ Môtômi amôkama amigode amatema va kôbangô agésumuge. Vameenangô mane mabuéni amakuméda Nzambé mbe: Na gô pie, mômôgôô noo asibévéké.

⁴⁸ Géômbé gévôni gémakôvana gôéena gangoota ébégôe, na ameena metso. Ahmanika abômôa mbôma yaô gô panda dimeenahngô.

⁴⁹ Muetso ane amavamba na Jésus, n’agetoe amavigaka n’edi gô Galilée, amatema gôdagôda gôébono mane mamabuéani.

Jésus amagunyu gô ngii (Bono na Matt. 27:57–61 )

^50-51 Gômabaka gévovi sagô kundu épôni éaJuif. Inedi Joseph, môsi mbôka éAjuif ééndô mbe Arimathée. Asigésangané n’akedi étasevo gô mane mamasunda ahngô Jésus. Amabaka môma amôsôba amavôma. Môtémedi wetso ômaba gôéenéa ôkumu aNzambé.

⁵² Mômôgôô nône amakea na gôndé Pilate gôéduka angô ôtôe aJésus.

⁵³ Joseph amapôtôô nzumbine gô gésumuge. Amamidipôa na môkanda avembo amôsôba. Amagunya nzumbine gô éduku éamôdungutu émasigô gô tsina amôkôdie. Gô édukue éangô madeo ésigunyu môma.

⁵⁴ Ebégô éangô émabuéa te gô pitsine ékônza Ajuif mabégô masueti. Nyee edunda Ajuif ômahbuéa.

⁵⁵ Agetoe amaviga na Jésus gô Galilée amakea na Joseph gôéena ngiine na mônogovo gamagunyangô nzumbine.

⁵⁶ Vamanika agetoe na gô yeba yaô amakônza madi na miyombo mingasôgahngô nzumbine. Na ahmadunda gô nyee edunda gamatômu ahngô gô mitôma miaNzambé.