LUC TSANGO EAMOSOBA EMATENDA 2 - New Testament in Mitsogo

Obôtu aJésus (Bono na Matt. 1:18–25 )

¹ Gô ndéône yangô, môtômi atsenge César Auguste amatôma mbe: Gôngaba gétendanéô samina moma muetso gô tsengeye ditôma we asi Rome.

² Gétendanéô gegé samapanga gémeendô gô ndéône émabaka Quirinius môtômi aSyrie.

³ Môma na môma amakea na gô môsenge edi gôétendu.

⁴ Joseph amatimôga gô môsenge ôtetu mbe Nazareth, ôndé gô tsenge éaGalilée, gôékea na gô môsenge aDavid ôtetu mbe Bethléhem, ôndé gô Judée. Gôébégô angô amabaka môsi ébôta éaDavid.

⁵ Joseph te amamana éteteda Marie mbe angamôbaa. Amakea gôétendu n’edi, Marie te andé n’emée.

⁶ Vamabakahngô gô Bethléhem, ndéône émabuéa gôndé Marie gôébôta.

⁷ Amabôta muanee akuua amômôgôô. Amamôdipa na mikanda na amamôyaméda gô gésô gévôni gémaaka nyamaye. Gôébégô gôndé ahngô gôsibaké tungu gô eba agenda.

Môsi g’ôba amatsiga gôndé akeneyi amandombo

⁸ Gômabaka gô tsenge nene akeneyi amandombo. Ahmabaka gô kumune na pitsi gôékenea diôbua yaô.

⁹ Vamabakahngô vane, môsi g’ôba amavigédu na Kumu Nzambé, amatsutsuga na vandé ahngô. Gévede gévôni saKumu gématana n’obébayi ôtubéda ôndômba aNzambé vandé ahngô. Ahmatsôpu na mangongo.

¹⁰ Môsi g’ôba amabeenda ahngô mbe: Nômbiena gomo ta na pesu. Oôkôni me. Nanôtsuéa tsangô éamôsôba. Endé ti ébégô éagényônga gévôni éngatsôkéa oma muetso.

¹¹ Te deo noo, Mooboyi abôtiô gôndé anye gô môsenge aDavid. Angô te Christ, ône amatômu na Nzambé. Angô te Kumu.

¹² Bononi egé te gémbégéa mbe anye nôngamenya angô. Nôngadenga muana adipiô na mikanda andé yama gô gésô gévôni.

¹³ Tsina na tsina gômaviga géômbé gévôni sasi g’ôba amavigédu na Nzambé gôédenga môkaô. Amakuméda Nzambé mbe:

¹⁴ Kumédani Nzambé gô tungu yag’ôba na gô Tsina gôbaké gétabé gôndé oma anyôngéô angô.

Akeneyi amandombo amakea na gô Bethléhem

¹⁵ Vamanôtôga asi g’ôba vandé akeneyi gôénika na g’ôba, akeneyie ahmavovo anguene n’anguene mbe: Okani na gô Bethléhem. Tôkéena éne étsigi wangô, éne étômenyédiô na Kumu Nzambé.

¹⁶ Ahmayavôga ékea na wangô. Ahmadenga Marie na Joseph na muanee andé yama gô gésô.

¹⁷ Vameena akeneyie muanee, ahmanigôa mane mamuanee avembo mookiô ahngô n’asi g’ôba.

¹⁸ Muetso ahmookôni ahmatsapéô gô mane mamavovo akeneyie.

¹⁹ Ivô Marie ahmakenea mabégô mema gô môtémedi na amatanganéda mangô.

²⁰ Akeneyie ahmanika. Ahmaneegeda na ahmakuméda Nzambé gô mane mamookô ahngô na mane mameenahngô. Metso mamabaka gamabeendu ahngô na môsi g’ôba.

Jésus amoogu va mbene oma

²¹ Vamabuéa pitsine éagénana, ndéône émabuéa gôégeeta muanee. Te ndéône émoogu angô va mbene oma mbe, Jésus. Ene te inee émabeendu Marie na môsi g’ôba amavigédu na Nzambé, Marie madeo asitsua émee.

Jésus amadeekedu na gôndé Nzambé

²² Ndéône émabuéa gôndé Joseph na Marie gôégobeda gésôga segôgéda ôtôe gamatôma Moïse va mbeego. Amaviga na muanee na gô Jérusalem gôémôdeekeda na gôndé Kumu Nzambé.

²³ Gô mitôma miaNzambé gômatendu mbe: Muana muetso akuua amômôgôô, adeekedu na gôndé Nzambé gôéyanzéa angô.

²⁴ Joseph na Marie amadeekeda dôta ôgondoku ômatôma Kumu Nzambé mbe: Nôdeekeda mabembi mabaé, mômé na môgadi, kôndi nane ménga dibaé mômé na môgadi.

²⁵ Gô Jérusalem gômabaka mômôgôô atetu mbe Siméôn. Amabaka môma amôsôba. Amagobeda Nzambé na ameenéa gévigéô saMooboyine ana aIsraël. Gédidi SaNzambé gémabaka n’edi.

²⁶ Na sangô gémeevéda Siméon mbe: Ewe ôsangawa ta madeo ôsiena Mooboyi angakudégéa Kumu Nzambé anye.

²⁷ Nyovo, Gédidi SaNzambé gématôma Siméon gôékea na gô eba aNzambé. Nyoone te ômatsiga Joseph na Marie amaviga na Jésus, muanee waô avembo gôégobeda môtômee ômatômuku va mbeego.

²⁸ Siméon amadeeka Jésus gô mogo medi na amakuméda Nzambé mbe:

²⁹ Ah Kumu ami, neeni n’atsatsee éne émavangewe ébuéyi. Tambô singa me nawa na gétabé gegé.

³⁰ Gôébégô miso mami meeni Mooboyine akudégi éwe.

³¹ Angô te géobogeo gémakônzéa éwe oma muetso.

³² Angô te gévede gévôni géngatanéda éwe gôndé asi tsengeye yetso. Gôndé angô omee woo, ana aIsraël angakumédu.

Siméon amapandôéda matasa maNzambé

³³ Joseph na Marie amatsapéô gô mane mamavovo Siméon gôébégô éaJésus.

³⁴ Siméon ameetsa ahngô mate na mavovia medi. Amanigôa Marie, yeene aJésus mbe: Nzambé amasevôa muanee ôdôô gôékubéda avo ana aIsraël ayekani, na gôétômba avo ana aIsraël ayekani. Angô te gémbégéa gémeetsa Nzambé géngakinô n’avo oma.

³⁵ Matasa mamasuégu gô mitéma mioma ayekani mangatsutsua te muanee ôdôô. Na éwe, yeene amuanee, ébaga éapievia engatuma éwe gô môtémee.

Môpandôédi amatasa maNzambé Anne amabaka gô eba aNzambé

³⁶ Gômabaka dôta gô Jérusalem môgeto, môpandôédi amatasa maNzambé. Inedi Anne, muana aPhanuel, môsi ébôta éAsser. Amabaka amadômbéa pepe. G’ôtômbôe wedi amadigaa mipuma tsambué na mômôgôône amabaaka angô. Te mômôgôône wakaga.

³⁷ Anne amadigaa môkué gébaaô ngu na vamadômbéa angô aka nzima génana na mipuma minayi. Asinôtôgé gô eba aNzambé. Amayanzéa Nzambé na pitsi n’omanda. Amakina môyakô gôévovo na Nzambé.

³⁸ Anne amatsiga gô eba aNzambé na amadenga Siméon na Joseph na Marie andé wangô. Anne amakuméda Nzambé. Vane gôndé muetso ameenéa Mooboyine angatômu na Nzambé gôéoboo Jérusalem, Anne amanigôa gameenangô muanee, Jésus mbe atsigi.

Môtôô agô Nazareth

³⁹ Joseph na Marie amadugéda mitôma miaKumu Nzambé gôndé muanee. Na vane amanika na Jésus na gô mbôkane yaô éaNazareth gô tsenge étetu mbe Galilée.

⁴⁰ Muanee amoongôga na amoodo. Amabaka na môtéma agémôma. Eodo na mate maNzambé mamabaka gôndé angô.

Vamaba Jésus aka mônzambu amabuéa gô eba aNzambé

⁴¹ Mipuma mietso Joseph na Marie amakiaka na gô Jérusalem gô ndéô éneegedu sueti éaPâque.

⁴² Vamabaka Jésus aka nzima na mipuma mibaé amakea te muetso gamabaka gésima saô.

⁴³ Vamagôga suetine, Joseph na Marie amanika na gô mbôkaô. Ivô muanaô Jésus amasanéa gô Jérusalem. Yeedi na tétedi asimenye.

⁴⁴ Amamenya mbe Jésus andéké n’avo ana akaô amakiaka géômbé gô nzéa. Nyee amapanga amôtôôe ômeeda, amakea abuta muanee gôndé kindaô na wee yaô.

⁴⁵ Ivô asimôene. Amanika na gô Jérusalem akea amôbuta nzéane nyetso.

⁴⁶ Pitsine éamôtatô amamôdenga andé digaa gô eba aNzambé. Amabaka va gatse anigôi amige miaNzambé, gôéôkô gasupuangô na gôéévôa ahngô nyivôye.

⁴⁷ Muetso amookôni amatsapéô gô éodoe émabaka n’edi na gô mônongoe ômaabéa angô nyivôye yaô.

⁴⁸ Vameenanô Jésus na yeedi na tétedi, ahmatsapéô. Yeedi amamôsemba mbe: ?Ah muanami nayee ôéndi we nane? Wa na tétoo tôkebanganiki éwe. Tôbuti éwe ti butaga.

⁴⁹ Jésus amaabéa ahngô mbe: ?Anye nôbuti me gôndé? ?Anye nôsamenya mbe gésooge sami géndé te gô eba aTéta égô-a?

⁵⁰ Ivô ahngô asinigôgéô éne émavovo muanaô Jésus.

⁵¹ Vane Jésus amanika n’ahngô na gô Nazareth. Amagobeda tétedi na yeedi. Yeedi Marie amakenea mabégôme mane gô môtémedi na amamatanganéda.

⁵² Otô aJésus ômavunda na ômoongôga. Môtémedi dôta na matasa medi mamakôndama te kôndama. Amadigaa kuanakue va mbene aNzambé na va mbene oma.