LUC TSANGO EAMOSOBA EMATENDA 19 - New Testament in Mitsogo

Jésus na Zachée

¹ Jésus amatsiga gô Jéricho na amakitsangana mbôkane.

² Gômabaka mômôgôô môvo inedi te Zachée. Angô te pene abongie muetso adepu. Amabaka gékiti.

³ Amanyôngéô éena Jésus. Ivô gômayeka pingône oma, na gômabaka Zachée mômane môpémôpé asimôene.

⁴ Vane Zachée amakea pita na gô mbene anzéa gôébata gô géétété gétetu mbe ôsycomore. Vamabangô gô géététége amadokiméa na gô tsina gôéena Jésus oota vangô.

⁵ Jésus amabuéa na va tsina agéététége, te Zachée andé gô ngongo asangô. Jésus amabôkaméa na amavovo na Zachée mbe: Ewe, Zachée yavôga ésuma. N’atsatsee me te môgendoo.

⁶ Zachée amayavôga ésuma na ameengéa na Jésus na gô ebedi na gényônga.

⁷ Muetso ane ameena ébégôe amagiangana mbe: ?Jésus akea akedigaa gô eba amômane môbévani ône nayee?

⁸ Zachée amatema gôévovo na Jésus mbe: Kumu ôôkôyee. Okitie wami wetso, nangatatôa angô va gatse. Ovô ôkabô nangôôkabanéa na misuga. Okô nabongi dode yamôma isuaga dodepo, nangeeséda memuene, nangamônikédéa dode dinayi.

⁹ Jésus amavovo na Zachée mbe: Géobogeo saNzambé géengéyi deo noo na gô ebee ôdôô. Na éwe kumu ebee ôndéké na gô pie muana aAbraham.

¹⁰ Me Muana Amôma namaviga gôébuta na gôéoboo ane amadimbanani.

Tsava éadode dimakabôni (Bono na Matt. 25:14–30 )

¹¹ Jésus amagunya épo tsava gôndé ane amaviga gôéôkô meekédume medi. Gômawesea ahngô môtôô na gô môsenge aJérusalem, muetso amamenya mbe, okumu aNzambé ôngatsutsuga pitsi yedi gôétôma.

¹² Jésus amavovo mbe: Gômabaka môma môvo, môsi gô mbumu éokumaka. Amakea na gô tsenge étongoni gôéétsô gône ényanga éetôma. Ameenda mbe: Nangoomba énika.

¹³ N’egékiaka amabambéa ayanzi edi nzima. Amakabanéa n’ahngô abi ôvo ôvo adode. Amatôma ahngô mbe: Yanzani ôyôkô na dodeye dine ngu na vangaviga me.

¹⁴ Tambô asi tsenge éedi asimônyôngéô. Amakudéga ôgie na gô tsenge émakeangô mbe: We tôsanyôngéô mômôgôô nône anika n’egô gôétôma we.

¹⁵ Ivô vameetsô môma nône ényangee gôétôma amanika na gô tsenge éedi. Amabambéa ayanzie amatsikéô dodeye gôéena gamayanzahngô gôédiyekeda gô ngimedi.

¹⁶ One amapanga amaabéa mbe: Kumu ami, gô abi ôvo ômeetsewe me, namadiia yene nzima ayabi. Môtômine amamôsénga ôséngu mbe:

¹⁷ Mamisôba. Ewe môyanzi agobedani. Omayanza mamisôba gô vibégô vigevige, nagôétsa ényanga gôétôma nzima amisenge.

¹⁸ One amôbaé amaviga. Amavovo mbe: Kumu ami, gô abie ôvo ômeetsewe me, namadiia yene ditayi.

¹⁹ Môtômine amavovo n’edi mbe: Nagôétsa ényanga gôétôma misenge mitayi.

²⁰ Môvo môyanzi amaviga gôénigôa mbe: Kumu ami, ii-ma abie woo adode. Namakenea yangô suéga gô môboto.

²¹ Nameena éwe gomo. Tsibômuku mbe môtômine wami te môma môdagani. Ewe ôbongo te éne ésivumbé éwe. Oaa môyakô éwe gépangé égaaba.

²² Môtômine amamôsemba mbe: Ewe môyanzi môbévani. Ogi ôvovi éwe te ône ôsoseda éwe. Osibômu mbe me te môma môdagani. Nabongo te éne ésivumbé me. Naa môyakô me gépangé égaaba.

²³ Tambô éwe, mbe ômasuéga dodeye yami gô gétungu gésuéguku dode, vavigi me éva, mbe nabongi yangô na dipo dode dimabôta yangô gône.

²⁴ Amatôma ane amadenganô vangô mbe: Watani angô abie adode ôndé n’edi ône. Itsani ône andé na nzima ayabi.

²⁵ Avo amatsapéô mbe: Bonokoyee, ôdôô andéké na nzima ayabi. ?Omba te ékôndégu n’ovo-a?

²⁶ Môtômine amanigôa mbe: Endé te nane. Gôndé ône andéké na sôma te ône angoomba ékôndéguni. Ivô gôndé ône asaba na sôma abeyee na vipesu, vingasuméa te watôgô.

²⁷ Na gôndéké n’evo ébégô. Adudeo wami, ane asinyôngéô étômu n’ami vigani n’ahngô. Aviyôhu ti va miso mami.

Jésus amakea na gô Jérusalem ( Matt. 21:1–11 )

²⁸ Vamamana Jésus évovo nane, amakea muetso na gô Jérusalem, Jésus te mômbenee.

²⁹ Amabuéa na gô mbôkaye ditetu mbe Bethphagé na Béthanie, dibambana na môkôdie ôtetu mbe Olivier. Jésus amoobégéda oma abaé va gatse aneengi edi.

³⁰ Amatôma ahngô mbe: Kiakani na gô mbôkane éndé gô mbene anyô. Vangabanye nôka gô buéaga, nôngadenga môpaga anyamane, ôéndô mbe ânon ôndé ditéga. Gô yangô madeo ésipeka môma. Tsôbôani yangô. Nôviga na yangô.

³¹ Okô môma anôévôi mbe: ?Nôtsôbôa nyamane ndé? Beendani angô mbe: Kumu asô andé n’eyanza na yangô.

³² Ane amatômuni amakea na amadenga ngu gamavovo Jésus.

³³ Vamabakahngô gôétsôbôa nyamane, kumu ayangô amavovo mbe: ?Nômitsôbôa nôkea na yangô na gôni?

³⁴ Amamôaabéa mbe: Kumu asô andé n’eyanza na yangô.

³⁵ Ahmakea na nyamane na gôndé Jésus. Ahmatsakéga ngoyi yaô gô ngongo anyamane. Na Jésus amapeka gô yangô.

³⁶ Vamakeangô, oma ayekani ahmayaa ngoyi yaô gô nzéa gôémôneegeda.

³⁷ Nzéane émakeahngô gôétsiga gô Jérusalem te éne ésumu gô môkôdie ôtetu mbe Olivier. Aneengie na géômbége setso amakuméda Nzambé na gényônga gévôni gô émbégéa éangudi yaNzambé émeena ahngô. Amaadôngana na yôgi yamindônga mbe:

³⁸ Te mbe mate maNzambé mabaké gôndé môtômine asô avigi gô ina aKumu. Gétabé gébaké dôta na gô gédigaa sedi g’ôba. Ondômbee wetso te gôndé Nzambé.

³⁹ Avo Apharisien amadenganô vangô amavovo na Jésus mbe: ?Môékédi ôsookô gavovo aneengie woo-a? Dékéda ahngô mbe asavovo nane.

⁴⁰ Jésus amavovo mbe: Nanôbeenda na gô pie mbe ôkô adua asibubua, nôngookô mataé maadôngana.

Jésus amadéa môsenge aJérusalem

⁴¹ Vamatsiga Jésus aka gô étumba éaJérusalem, ameena môsenge wetso na amadéa.

⁴² Amadéa anyima mbe: Ah Jérusalem, mbe ômenyiki éne évigi n’ami éagétabé, mbe ôsikina éangô. Ivô gô gékinéô soo éne éami éndé suéga na ôsangadôena éangô.

⁴³ T’ebandô nyaa ôweséani ône ôngeena éwe panda. Adudeoe woo angaseta éwe. Migômbamie mioo misangabadô na ngudi yebakanéda éwe. Adudeo angeebéa éwe na gésa na gésa gôétsôpa omee woo.

⁴⁴ Angagôpanza ti panzaga n’omee woo muetso. Gôsangasanéa ta n’etaé évo gô ngongo amôkedi. Eetso éne te gôkini éwe ndéône émavigéô éwe na Nzambé mbe agôwedéa.

Jésus amanyepeda eba aNzambé (Bono na Matt. 21:12–17 )

⁴⁵ Jésus ameengéa na gô eba aNzambé na amapatsa ayôkôe.

⁴⁶ Amavovo n’ahngô mbe: Matendeo MaNzambé matôbeenda mbe: Ebami ôngamenyanganô mbe, eba oma muetso gôévovo na Nzambé. Jésus angô mbe: Ivô anye nôkoyi ebee ôdôô ôka gésomeo seesui.

⁴⁷ Jésus ameekéda pitsi yetso gô eba aNzambé. Tsesuye yadeekedi adigondoku, n’anigôi amige miaNzambé n’avo oma avôni ahmabuta mônongo gôéyôha Jésus.

⁴⁸ Ivô ahmatsapéô gôémôtsôpa géenanô n’oma. Oma muetso amanyôngéô éôkô meekédu maJésus na amadigaa na vôôka.