LUC TSANGO EAMOSOBA EMATENDA 18 - New Testament in Mitsogo

Tsava éamôkué na gévovi

¹ Jésus amanyôngéô éékéda aneengie mbe aba na môvinéné gô disambô mbe kabaga adeeda. Amagunya ahngô tsava mbe:

² Gô mbôkepo gômabaka gévovi. Angô asiene Nzambé gomo. Asigobede ta na môma môvo.

³ Gô mbôka nene dôta gômadenganô môkué amôgeto. Amakea kuka yetso na gôndé gévovi mbe amôkônzéa ébégôe. Angô mbe: Gévovi, iséda môdudeone ôdôô.

⁴ Ndéô diyekani dimoota, gévovige asinyôngéô ésiséda môdudeone buéyé gamaviga môgeto nône kuka yetso. Gévovi amatasa gô môtémedi mbe: Me tseena Nzambé gomo. Me tsaba n’egobeda éoma.

⁵ Eébéyée nane, môgetone amôkué ôdôô, nagogi n’edi. Nabékônza ébégôe vavigangô kuka yetso kabaga abévéda me.

⁶ Vane Kumu Jésus amatimbôanéda mbe: ?Nôôkiô gavovi gévovige, kaka môma môbévani-a?

⁷ ?Na Nzambé kumu étsimama asangookô ane aamugana na gôndé angô na pitsi n’omanda-a? Na Nzambé asangadingéda ékônzea omee wedi amasevôangô mabégôme.

⁸ Nanôbeenda na vede mbe Nzambé asadinga ésiséda adudeoe omedi, na gôéanikéda pégôani. Buéyé nane, ti vangaviga me Muana Amôma na gô tsina ?nangadenga oma aténdéda me, asatsuma ngudi yami paga-a?

Tsava éaMôpharisien na môbongi adepu

⁹ Jésus amagunya tsavane édué gôndé ane ahmabaka n’ebioko.

¹⁰ Angô mbe: Amôgôô abaé ahmakea na gô eba aNzambé gôévovo na Nzambé. Môvo te Môpharisien. Môvo te môbongi adepu.

¹¹ Môpharisien amatema môtie gôévovo na Nzambé mbe: Ah Nzambé, me nagôkuméda mbe tsaba gandé avo oma eesuani, na asaba n’etsimama, na akea gésasô. Me dôta tsaba gandé môbongine adepu ôdôô.

¹² Me, kuka dibaé tsono épo nakina môyakô gôévovo na éwe Nzambé. Gô éetso édiia me, me neetsa éwe ôkabôe woo.

¹³ Môbongi adepu asiwesea na gô mbene gô eba aNzambé. Asiyeege ébôkaméa. Ivô amadéa, amabômôa mbômedi ameeséda amuene, na amamema mbe: Ah Nzambé eena me ngeba. Me te môma môbévani.

¹⁴ Jésus angô mbe: Nanôbeenda mbe vandé ahngô abaé, môbongi adepu amanika na gô ebedi amasingéô kokoo na Nzambé. Géé Môpharisien, amanika na gô ebedi gésingéô kokoo. One aabatéda amuene angasugédu. Ivô ône aasugéda amuene, angabatédu.

Jésus ameetsa anéngé mate (Bono na Matt. 19:13–15 )

¹⁵ Oma amakea n’anaô, buéyé n’ana agô mabene, na gôndé Jésus mbe akeabanda. N’aneengie ahmadékéda ahngô mbe: Nônakea na gôndé Jésus n’anee.

¹⁶ Ivô Jésus amavigéda anee na gôndé amuene na amavovo mbe: Tsikani anee anéngé avigéké na gôndé me. Nômbioomba édékéda ahngô. Okumu aNzambé ôndéké gôndé muetso andéké ga anéngé adua.

¹⁷ Nanôbeenda mbe, na gô pie ône asasinga éengéa na g’ôkumu aNzambé na môtémedi wetso geengéa anéngé, asangeengéa wangô.

Gékiti gémaviga na gôndé Jésus (Bono na Matt. 19:16–30 )

¹⁸ Môvo môtômi aAjuif, ameevôa Jésus mbe: Ewe môékédi ôndé ti môékédi amôsôba ?beenda me gôédiia monyo amôbô na môbô neenda nayee?

¹⁹ Jésus amamôbeenda dôta mbe: ?Oteta me mbe môma amôsôba nayee? Jésus amamônigôa mbe: Gôsaba môma amôsôba buétsé te Nzambé amuene.

²⁰ Ewe ôsabômu mige na mitôma miaNzambé mbe: ômbiakea gésasô. Ombiayôha. Ombieesua. Ombiapatéa môma noo. Gobeda yoo na tétoo.

²¹ Mômôgôô nône amaabéa Jésus mbe: Môékédi, me bandôa g’ôanéngé ami, nakenea mige miemi mietso.

²² Jésus n’eôkô nane, amamôtôma mbe: Gôndé éwe gôsanéyi ébégô évo. Kiaka sômbédé éetso éndé n’ewe. Obongo dodeye, ôkekabanéa na misuga. Na éwe ôngaba n’okiti g’ôba.

²³ Vamookô mômôgôô ôgie ône, gédimô sedi gémadita. Môtémedi ômeena panda, gôébégô amabaka n’okiti ôvôni.

²⁴ Vameena Jésus gamadita môtémedi, amanigôa mbe: Endé ti édagani gôndé ékiti gôéasugéda anguene gôéengéa g’ôkumu aNzambé.

²⁵ Na Jésus amagunya tsava mbe: Endé ti édagani nyama épôni étetu mbe chameau gôédugu gô épôdéké éatsôngi. Eôtéa ti édagani gôndé gékiti gôéengéa g’ôkumu aNzambé.

²⁶ Ane amookôni ameevôa Jésus mbe: ?Gôngaba môma angoobogoni-a?

²⁷ Jésus amanigôa angô mbe: Ene édagéô môma gôéénda, Nzambé asaédagéô.

²⁸ Pierre amavovo n’edi mbe: Aanaka Kumu. We tômatsika éetso, ti we adua. Na tôndé ti gôékea nzéepo n’ewe.

²⁹ Jésus amaabéa ahngô mbe: Nanôbeenda na gô pie mbe ône amatsika ebedi na môgayedi n’anayeedi, na yeedi na tétedi na anedi atsika éangô gô inami na gô ina okumu aNzambé,

³⁰ angô angootéa édiia gô pitsi yedi. Na gô pitsiye yagô mbene angaba na monyo amôbô na môbô.

Jésus ameevéda éne éamôtatô ôwedi na gédundugéô sedi (Bono na Matt. 20:17–19 )

³¹ Jésus amakea n’aneengie edi nzima n’abaé. Amanigôa ahngô mbe: Oôkôni édué. Wa n’anyô tôkea na gô Jérusalem. Gône gôngeenanô metso mamavovo apandôédi amatasa maNzambé gôébégô éame, Muana Amôma.

³² Nangakabô na gô mogo mane asaneegeda Nzambé. Ahngadeta me. Angatoko me na angatuéa me mate.

³³ Ahngabita me na mibitô mievongo. Ahngayôha me. Va mbene apitsi dibaé, éne éamôtatô nangakunduga g’ôwa.

³⁴ Ivô aneengie ahsinigôgéô ta na pesu éne émavovo Jésus. Mavovia medi ti eembe waanga ôgi, na gémenye mane mamavovo Jésus.

Jésus amadôngéda môsi pogu (Bono na Matt. 20:29–34 )

³⁵ Jésus amatsiga v’etumba éaJéricho. Wangô ameena gékonzo, môsi pogu andé digaa gôédukana va kôbangô anzéa.

³⁶ Vamookô môsi pogu géômbége géôta gésookéda, ameevôa ahngô mbe: ?Nôsookéda ndé?

³⁷ Oma amamôsupua mbe: One ootani te Jésus môsi Nazareth.

³⁸ Vane môsi pogu, amaadôngana mbe: Ewe Jésus, Muana aDavid, eena me ngeba.

³⁹ Ane amakiakani amamôdékéda mbe: Kôda. Ivô amoomba éadôngana na gô ngongo mbe: Ewe Muana aDavid, eena me ngeba.

⁴⁰ Jésus amasikama na amavovo mbe: Bambéani me angô. Vamaviga môsi pogu, Jésus amamôévôa mbe:

⁴¹ ?Onyôngéô mbe nagôénda nayee? Môsi pogu angô mbe: Kumu ami, nanyôngéô mbe ôpôéda me miso mema.

⁴² Jésus amamôénda mbe: Pôaka misome. Odôngédiô te gôsitsumewe ngudi yami paga.

⁴³ Tsina na tsina amamahnéa. Amakea na Jésus akuméda Nzambé. Géômbége setso gémeena éne émbabuéani na muetso amakuméda Nzambé.