LUC TSANGO EAMOSOBA EMATENDA 17 - New Testament in Mitsogo

Mabégô mabévani mayanza oma (Bono na Matt. 18:6–7 21–22 )

¹ Jésus amanigôa aneengi edi mbe: Gô tsina nedué gôndéké mabômia mayekani na masakôdéakani mabôméda môma gô mane masanyôngéô Nzambé. Ivô ti gô maguga mandé n’one abôméda môkedi.

² Buedi mbe nômôditéga étaé évôni va môngônga na nômôgunya gô mubu kabaga abôméda muene.

³ Wemani ébégôe éne. Okô muana aTétee n’oo môsi mbumu éaNzambé eendi ébégô ébévani, vovo n’edi anyene abaé. Okô akoi môtémedi singéa angô kokoo.

⁴ Buéyé mbe agôéndi nyovo mabégô tsambué mabévani, n’angô kuka yetso aviga avidukewe mbe: Kokoo yewe. Buedi gôémôsingéa kokoo.

Gôéétsa môtémee gébé na paga

⁵ Ane amasevôuni na amatômu na Jésus amavovo n’edi mbe: Kumu, kôndéga we ngudi yeétsa Nzambé mitémamie gébé na paga.

⁶ Vane Kumu Jésus amanigôa ahngô mbe: Okô nôkini paga nôétsa Nzambé mitémamie pengo vipesu, évundee ga môbiie ôgeôge ôéndô mbe moutarde, nôngeena mane mangayanzanye. Nôngavovo na géététe mbe: Yuuéga vane kiaka ôkekuyaméa gô mubu. Na géététége génganôôkéô.

Ene éyanza môyanzi

⁷ Tôkanéga te mbe, môma gandé anye andé na môyanzine wedi agô tsaga vo môkeneyi eebodu edi. Vangatsiga môyanzine na gô eba, aviga gô tsaga ?kooko edi angamôtôma mbe: Vigaka na va tabudé-a? Asangeenda nane.

⁸ Ivô kooko edi angamôtôma mbe: Ambéa me môyakôe. Oaata mene maduani na ôngeetsa me môyakoe. Naa, na nanyua. Vangamana me, éwe dôta ôngaa na ônganyua.

⁹ Kookone asangamôkuméda mbe: Omenya éyanzéa me. Gôébégô môyanzine ayanzi te ngu na éne ééndiô mbe: Yanza. ?Angakumédu gôndé?

¹⁰ Na gôndé anye omami te mônongovo. Vangama nanye éénda metso matômumi, nôngavovo mbe: We te ayanzi atévo. Tôsiyanza mene mabégô. Tôgobedi te éne étômiô we.

Jésus amadôngéda nzima oma, asi ébeea éagega

¹¹ Gômakea Jésus môtôôe na gô Jérusalem, amoota va kaba atsenge dibaé yaSamarie na Galilée.

¹² V’etumba éambôka amawanyédu na nzima oma, asi ébeea éagega. Ahsiwesee pepe na gôndé Jésus.

¹³ Ahmaadôngana mbe: Ah Jésus, éwe môékédi ena we ngeba.

¹⁴ Jésus ameena ahngô na amahtôma mbe: Kiakani. Nôketubéda môdeekedi adigondoku gandé anye. Vamakea ahngô te ahngô dôngaga.

¹⁵ Vameena ahngô mbe ahdôngi, môvo va gatse aô nzima, amanika na gôndé Jésus akuméda Nzambé n’ogi amôndônga.

¹⁶ Amagudama va makôdô maJésus, gédimô sedi na gô tsina gôémôneegeda. Mômôgôô nône te môsi Samarie.

¹⁷ Jésus ameevôa angô mbe: ?Tambô anye nômadôngéduni nôsibaka nzima-a? ?Akoo atenanayi angôani?

¹⁸ Tambô avo atenanayi asibé n’etasa gôéviga gôékuméda Nzambé, buétsé te môgendane ôdôô amuene.

¹⁹ Vane Jésus amavovo na môsi Samarie mbe: Timôgaka, kiaka. Gôsitsuma éwe ngudi yami paga géobogeo géka te gôndé éwe.

Gévigéô sokumu aNzambé (Bono na Matt. 24:23–28 37–41 )

²⁰ Apharisien ameevôa Jésus mbe: ?Okumu aNzambé ôngatsiga nyaa ndé? Jésus amanigôa ahngô mbe: Vangaviga ôkumu aNzambé ôsaba sôma géenanôni.

²¹ Môma asangavovo mbe: Bonoko, ôkumu aNzambé ôtsigi gô tungu asimbe na bôkaye. Vo, nôeni ôkumu aNzambé angôô. Menyani mbe ôkumu aNzambé ômani étsiga va gatse anyô.

²² Vane Jésus amavovo n’aneengie mbe: Gô ndéôye divigani, anye nônganyima me Muana Amôma gôéba n’ami pitsi amôbongo gandé wa n’anyô n’atsatsee pitsi yetso. Ivô nôsangadôena me ta na pitsi épo.

²³ Nôngookô mbe: Kiakani na gône, nôngeena angô, vo vigani n’eva na nôngeena. Ivô nônakea. Nômbiabono.

²⁴ Mônongovo gakadima môkadikadi ôenanô ôkitsangana ôbee, te mônongovo gangeenanô me Muana Amôma gô nyee ôngaviga me.

²⁵ Ivô me Muana Amôma, nangapanga éena panda dipôni na nangakinô n’ane adônga pitsi yedi.

²⁶ Gameenda oma gô ndéô éaNoé te gangeendahngô gô ndéô éngaviga me Muana Amôma.

²⁷ Asi tsenge éaNoé, saô gémba gémabaka te aakagane, na nyuakagane, na baanane, na baaôgône. Ameendaka nane ngu na nyee ômeengéa Noé gô mbôngône. Géningôge gévôni gémaviga na gémagudéda ahngô muetso.

²⁸ Gameenda oma gô ndéône éaLot, te gangeendahngô gô ndéô éngaviga me Muana Amôma. Asi môsenge ômadigaa Lot, saô gémba gémabaka te aakagane, na nyuakagane, na sômbagane, na sômbédane, na gaabagane, na gôésaa yebaye.

²⁹ Ivô nyaa ômanôtôga Lot gô môsenge aSodome, soto sambônga édagani éangôté gémaaga g’ôba ga nyogo mbuua. Muetso amaguda.

³⁰ Engaba te mônongovo nyaa ôngaviga me Muana Amôma.

³¹ Nyaa ôngaviga me Muana Amôma, menyani mbe ône adenganô gô ngongo amôahnza asangasutuméa gôéengéa na gô eba gôébongo éômee yedi. Na ône angadenganô gô tsaga te mônongovo. Asanganika na gô ebedi.

³² Bangôani gameenda môgaya aLot.

³³ One anyôngéô ékenea monyoe wedi amuene, angaôdimbanéda. Ivô ône adimbanéda monyoe wedi, angaôdenga.

³⁴ Nanôevéda mbe gô pitsi nene, oma abaé angaba ékoko évo. Môvo angabongu. Môvo angatsikô.

³⁵ Ageto abaé angaba gôétsuaka géso gévo. Môvo angabongu. Môvo angatsikô. [

³⁶ Amôgôô abaé angaba gô tsaga gôéwanga. Môvo angabongu. Môvo angatsikô.]

³⁷ Aneengie ameevôa Jésus mbe: ?Kumu nigôa we ébégôe éne éngeenanô gôni? Jésus amanikéda ahngô mbe: Gô tungu éwa nyama, nyoeye diaa nyama dimabooni dikôvana na wangô.