LUC TSANGO EAMOSOBA EMATENDA 13 - New Testament in Mitsogo

Koani mitémamie kabaga nôwa

¹ Ndéô nene avo ahmaviga gôébeenda Jésus éne émabuéani mbe: Asi Galilée ahmabaka gôédeekeda digondoku yaô. Pilate amayôéda ahngô. Na nzina yaô dimagésangana na dine yadigondoku dimayôhuni.

² Jésus amabika mbe: Gômayôhu ahngô ôwa ôdagani ?anye nômenya mbe ahngô amootéa ébéva na oma muetso-a?

³ Ti me, nanôbeenda mbe, kaka nane. Okô anye nôsikoa mitéma mianyô nôngawa te mônongovo.

⁴ Aanakani. Avo nzima na omo génana ahmawa gô Jérusalem vamapikô ahngô n’eba aSiloé agô ngongo ngongo ômakitségani. ?Nômenya mbe ahngô te amootéa ébévani na asi Jérusalem muetso-ma?

⁵ Ti me nanôbeenda mbe kaka nane. Okô anye nôsikoa mitéma mianyô nôngawa te mônongovo.

Tsava éagéétété samiônda gésibôtékéni

⁶ Jésus amagunya ahngô tsavane mbe: Mômôgôô amagaaba gô tsagedi géétété samiônda gétetu mbe ôfiguier. Amakea gôéseta sangô gôébono miôndamie. Asidenge.

⁷ Vane amavovo na môyanzi edi atsaga mbe: Eenaka éma étatô éviga me gôéseta géétété gegé. Me tsidenga mônda ta n’ovo. Wanga sangô. ?Ebégô ndé ôkenea sangô sagébôtéké? Sangô géebakanéda tungune te bobo.

⁸ Môyanzine angô mbe: Ovénga vita kumu ami. Tôtsiké sangô géma gegé. Nangasiga gô kôbangô asangô. Nangavumba toto anzué.

⁹ Mavooe gô géma gévigani géngabôta. Okô gésibôta, géngawangô.

Jésus amadôngéda môgeto amabeeani gô nyee edunda

¹⁰ Nyee edunda Jésus ameekéda gô eba agéwanyéô.

¹¹ Gômadenganô môgeto amabeeani. Gédidi gébévani gémabaka gôndé angô môsingi nzima n’ema génana. Gédidige géne sokonzo gémamôkotoméda na asiôngôé ébôgôa môkongoe.

¹² Vameena Jésus angô amavovo n’edi mbe: Môgeto noo, éwe ôdôngédiô gô ébeea ékatiôkô éwe.

¹³ Jésus amamôtsakéga mogome. Tsina na tsina môgeto amakonyogo môkongoe. Amakuméda Nzambé.

¹⁴ Tsesu eba agéwanyéô asinyôngéô gamayanza Jésus gô nyee edunda gôédôngéda môma. Tsesu amavovo na géômbége mbe: Môma ayanza te pitsi môtôba. Tambô vigani nôvidôngédu gô miôsaamie mine, kaka gô nyee edunda.

¹⁵ Kumu Jésus amabika mbe: Ewe, môsi enyepa amônya. Kumu ebodu akati tabane yedi. Amitsôbôa nyaa edunda mbe éaa môyakô na ényua meba ?kaka nane-a?

¹⁶ Na môgetone ôdôô te muana aAbraham amadinga gô gésengoge gémakatô angô na Satan môsingi nzima n’ema génana. ?Tambô gôétsôbôa angô gésengoge gô nyee edunda, ébévi-a?

¹⁷ Ene émasiia Jésus ématubéda adudeoe wedi tsoyi. Ivô géômbége amatsôkéa na gényônga gô metso mamayanza Jésus mamatubéda ényangee éondômbedi.

Tsava éagéétété gévôni (Bono na Matt. 13:31–32 )

¹⁸ Jésus amavovo mbe: ?Okumu aNzambé ôgono na ndé? ?Nagoneda angô na sôma ndé?

¹⁹ Okumu aNzambé ôgono na vibie vigevige vitetu mbe moutarde vimamuaka môgabi gô tsagedi. Vibievie vimakanda. Na vimakoga te géétététété. Nyoeye dimasaa mebu maô gô mitabémie.

Tsava éamibie miaahndéda mipemba (Bono na Matt. 13:33 )

²⁰ Jésus amoomba évovo mbe: ?Nagoneda ôkumu aNzambé na sôma ndé?

²¹ Okumu aNzambé ôgono na mibie migemige miindô mbe levure miaahndéda mipemba. Môgeto agésa mibiemie mine gô gébémbége setso safarine gôéaahndéda mbômbé éamipemba.

Meekédu mokuké ôgeôge (Bono na Matt. 7:13–14 21–23 )

²² Jésus ameekéda amakitsangana misengemie na mbôkaye amakea môtôô edi na gô Jérusalem.

²³ Môma môvo amamôévôa mbe: Kumu beenda me, ane angoobouni ?asangaba te vipesu-a? Jésus amamônigôa mbe:

²⁴ Gényôgani gôéengéa g’ômbee ôgeôge. Menyani na gô pie mbe ayekani anganyôngéô éengéa gô angô ivô asangoongôa.

²⁵ Okô kumu eba andé gô ebedi na amamana ébandéka na môsapi, n’anye nôndé gô môkii, buéyé mbe nôbôkéda na nômôbambéa mbe: Kumu eba kukuéa we, asanganôkukuéa. Anganôénda mbe: Me tsamenya gôviganye.

²⁶ Vane mavooe nônganigôa kumu eba mbe: Wa n’oo tômaaka vavo na tômanyua vavo. Na we tômeena éwe ômeekéda gô mbôkasô.

²⁷ Kumu eba angoomba énôtôna mbe: Me tsamenya gôviganye. Nôtôgani na gôdagôda n’ami. Anye eendi amabégô mabévani.

²⁸ Vane te vangadéa anye na te vangagéa anye ngeko gô pievia. Nôngeena Abraham na Isaac na Jacob n’apandôédie muetso amatasa maNzambé ahndé digaa gô tsenge éaNzambé. Géé anye, nôngapatsô na gô môkii.

²⁹ Oma angaviga gôtsiga kômbéne na gô pénda yangô na gésa na gésa gôédigaa va tabudé émakônzuni g’ôkumu aNzambé.

³⁰ Ayekani andé gô mbene angaba gô ngima. Na vane gémbene amootu na géngima.

Jésus amavovo ébégô éaJérusalem (Bono na Matt. 23:37–39

³¹ Gô ndéô nene avo Apharisien amaviga na gôndé Jésus gôémôevéda mbe: Ewe nôtôga éva, kiaka na gô nyene tungu. Hérode abuta éyôha éwe.

³² Jésus amatôma ahngô mbe: Mômôgôô nône agono na nzego. Kiakani nôkenigôa angô mbe: Me Jésus deo noo na mene nakuséda édidi ébévani éndé gôndé oma, nadôngéda ane abeeani. Pitsine éamôtatô te éne éngadugéda me éyanzee yami.

³³ Ivô me deo noo na mene na ngima amene nandé gôémangôa môtôôe ôkea me ôdôô. Môpandôédi amatasa maNzambé asayôhu gô nyene tungu, ayôhu te gô Jérusalem.

³⁴ Ah anye asi Jérusalem. Ah anye asi Jérusalem. Nômayôha apandôédi amatasa maNzambé. Nômatuma na mataé ane amatôma Nzambé na gôndé anye. Kuka yetso me namanyôngéô énôweseda gôénôgudaméa gagudaméa tsôsô anedi. Ivô anye nômakina.

³⁵ Tambô, menyani mbe gô ebanyô gôsangadôba môma. Endé te nane. Me nanôevéda mbe anye nôsangadôena me ngu na nyee ôngavovo anye mbe: Mbe mate maNzambé mabaké gôndé ône aviga gô ina aKumu asô.