LUC TSANGO EAMOSOBA EMATENDA 11 - New Testament in Mitsogo

Meekédu mosambô (Bono na Matt. 6:9–13 7:7–11 )

¹ Nyovo Jésus amabaka gôévovo na Nzambé. Vamamanangô ésambéda, môneengi edi môvo amavovo n’edi mbe: Kumu, ikéda we gasambéduni, mônongovo gameekéda Jean aneengie wedi.

² Jésus amavovo n’ahngô mbe: Vasambéda anye Nzambé, nôvovo te mbe: Téta, Nanyôngéô mbe inoo éneegedu. Nanyôngéô mbe ôkumue woo ôviga gôétôma.

³ Itsa môyakô akuanakue n’asô pitsi yedi.

⁴ Singéa we kokoo gô mabégô masô mabévani, Mônongovo gasingéa we kokoo gôndé ane atôéndéa mabégô mabévani. Vangakanégu we gôéénda mabégô mabévani, ômbiatsika we.

⁵ Jésus amoomba évovo n’aneengie mbe: Tôkanéga te n’edué. Va gatse anyô, môvo andé na wee edi. Ongakea na gô ebedi va gatse apitsi gôémôduka mbe: Waé, sombeda me mipemba mitatô.

⁶ Navigéyiô na môgenda, angô te wee ami. Gô ebami gôsaba môyakô gôémôétsa.

⁷ Tôkanéga mbe môkedi, ône andé gô gatse eba, angamôkina mbe: Nôtôga vane. Tsika me. Ebami ôbandékiô. Wa n’anami tômani éyama. Me tsangoongôa étimôga gôégôétsa mipemba.

⁸ Endé te nane. Kumu eba asangatimôga tsangô mbe te gôdukiô angô na wee edi. Ivô mavooe angatimôga te gôsatsika môkedi ébôkéda v’ombaa gôyungédu angô viovie, na angamôétsa éne édukangô.

⁹ Na Jésus angô mbe: Gô miduké mioma na Nzambé éndé te nane. Dukani na môvinéné na nôngeetsô. Butani na môvinéné na nôngadenga. Bôkédani na môvinéné na nôngakukuéô.

¹⁰ One adukani, angeetsô. One abutani, angatsutsua. Ombee ôkukuu gôndé ône abôkédani.

¹¹ Anye téteye ?ôkô muana anôduka môpemba nôngamôétsa étaé-a? ?Okô muana anôduka nyama yagô mbéyi nôngamôétsa nyoongoo-a?

¹² ?Okô muana anôduka ébôngô éatsôsô nôngamôétsa ngôtô-a?

¹³ Buéyé gandé anye abévie, nôsabômu eetsa anee wanyô éômee éamisôba. ?Tambô na tétanyô, ône andé g’ôba asanganôétsa Gédidi sedi-a? Angeetsa sangô te gôndé ane amôdukani.

Jésus amaabéa atsundédi (Bono na Matt. 12:22–30

¹⁴ Jésus amabaka gôékuséda gédidi gébévani gémakukéga môma ôbôbô. Vamakusa gédidige gébévani, gébôbôge gémabandôa évovo. Muetso amadenganôni amasôbasôbana.

¹⁵ Ivô avo amadenganôni amavovo mbe: One eetsa angô ngudi yepatsa édidie ébévani te Béelzébul, môtômine édidie éne.

¹⁶ Avo amanyôngéô étambéa Jésus pagô gôémôkubéda. Amamôévôa mbe: Tubéda we gémbégéa sangudiye yoo. Okô mbe diviga gôndé Nzambé we tôngeena.

¹⁷ Ivô Jésus asibômu ébandôe émanyôngéô angô éena gémbégéage. Amanigôa ahngô mbe: Okô asi tsenge épo asaba n’evambevo, tsengene ésangadinga n’ebudangana. Na yebaye yatsenge nene dingeekamanéa anguene n’anguene.

¹⁸ Okô Satan agenya gô mane maamuene, ôkumue wedi ?ôngadôôkanô nayee? Anye nôénda mbe: Jésus akuséda édidi ébévani gôndé oma te gômeetsô angô ngudi na Béelzébul.

¹⁹ Tambô akanyô asi tsengepo n’anyô ?ngudiye dikusédahngô édidi ébévani gôndé oma yandaa? Akanyô anôétsi ôési ôvôni.

²⁰ Okô mbe te gô môsongosongoe aNzambé ôkuséda me édidi ébévani gôndé oma, tambô kôngédani mbe ôkumu aNzambé ômasuma na gôndé anye.

²¹ Okô môma oongaa andé na ékeeyi gôékenea ebee wedi, ékôtee yedi ésangabandô.

²² Ivô ôkô muene avigi ootéa n’ongaa na amôdiia, angawata ékeeyie éakumu eba. Ekeeyie éne te éne émeetsa kumu ebee ngudi. Mômôgôône angadiiani angakaba éetso émawata angô kumu ebee.

²³ One asaba évambevo n’ami, te môvingi ami. Na ône asayanza n’ami gôékôkéga, andé gôépanza.

Gédidi gébévani génikani (Bono na Matt. 12:43–45 )

²⁴ Vakusédu gédidi gébévani gôndé môma, gékea gékénga sagôsagô gô tungu disadigaa môma gôébuta tungu éngayôngéô sangô édunda. Okô gésiene tungu éedigaa géngagiangana gô matasa medi mbe, nanganika na gô ebee ômakusédu me.

²⁵ Na sangô génika. Gédenga ebee ômagoomboo na ômanyepedu.

²⁶ Vane gédidige géne gékea gôéwanyéda évo édidi tsambué éôtéa ébéva na amuene géné samapanga. Eviga muetso géômbé na éengéa gôédigaa wangô. Vane ébévee éamôma nône éôtéa n’ebévee éedi éamapanga.

Gényônga sapie

²⁷ Vamabaka Jésus gôévovo nane, môgeto môvo va gatse agéômbége amavovo n’edi mbe: Ti gô gényônga géndé na môgetone amakenea éwe ôndé gô ébuyi éedi, na amanyuéséda éwe na ébene éedi.

²⁸ Ivô Jésus amanikéda mbe: Eébéyée nane, me nanôbeenda mbe, ti gô gényônga géndé na anye nôôkô ôgi aNzambé na nôgobeda angô.

Oma ahbuta éena ngudi yaNzambé (Bono na Matt. 12:38–42 )

²⁹ Gômakôvana géômbé soma na gô kôbangô aJésus amanigôa ahngô mbe: Oma abévani asi pitsi yedi abuta étubédu gémbégéa sangudi yaNzambé gô mayanza mamisôba masoongôa môma ésupua. Ivô ahsangeena gémbégéage gésoongôa môma ésupua, buétsé te géne gémeenanô gôndé Jonas, môpandôédi amatasa maNzambé.

³⁰ Jonas amabaka gémbégéa gémeena asi Ninive. Te mônongovo ga me Muana Amôma, nangaba gémbégéa géngeena anye asi pitsi yedi.

³¹ Gô nyaa amôtsundu môgetone, môtômi atsengene édongu angasemba oma apitsi yedi na angatubéda ahngô misongosongo mbe: Me namatimôga gô tsenge éami éagôdagôda gôébuéa na gôndé Salomon gôéôkô éodo émabaka n’edi. Géé ti anye nomabaka tungu épo na muene môékédi ootéa Salomon.

³² Gô nyaa amôtsundu asi Ninive angasemba oma apitsi yedi na angatubéda ahngô misongosongo mbe: Buéyé we asi Ninive tômeeséda wéene na tômakoa mitémamie vameevédu we na Jonas. Géé ti anye, nômabaka na muene ameevéda anye ootéa Jonas.

Otô ôtômu na miso (Bono na Matt. 5:15 6:22–23 )

³³ Môma asatumba dambi na tsué gôésuéga yangô vo gôégudéga yangô na môdômbô. Ivô amivumba te va gévumbéô sambe éngatanéda eba wetso, n’oma eengéani angeena na vede.

³⁴ Miso mamôma te ga dambi étômbéda ôtôe wedi wetso. Okô miso moo meenéa, na ôtôe wetso ôngaba na vede. Ivô ôkô miso moo mabeea, na ôtôe wetso ôngaba gô évitsi.

³⁵ Tambô ôwema, kabaga gévede géndéké n’ewe gékoga sevitsi.

³⁶ Okô ôtôe woo wetso ôndé ômayôa na gévede gôsangaba ta na vitungu vivo vingasanéa évitsi. Vane ôtôe ôdigaa na vede, ti eembe ôndé na dambine éobébayi gô gatse oo.

Jésus ameeséda Apharisien n’anigôi amige miaNzambé (Bono na Matt. 23:1–36 )

³⁷ Vamamana Jésus évovo, Môpharisien amamôbambéa gôéaa môyakô gô ebedi. Jésus amakea na amadigaa va tabudé.

³⁸ Apharisien amatsapéô vameenahngô Jésus adigaa gôéaa môyakô, angô gépangé éôvôa mogome geendahngô gô ésôgee éaô.

³⁹ Kumu Jésus amanigôa angô mbe: Nôeni geendanye. Gô ébungue éanyô na gô épedee éanyô, nôsabômu éôvôa te gésa géngongo géenanôni. Géé va gatse nôndé nômayôa na manyima meesua, na ébévee éetso.

⁴⁰ Ti anye nômavétsa mikambô. Nzambé, ône amavanga ôtô amôma ôenanôni, te angô amavanga n’ene éagô gatse amôma éseenanôni.

⁴¹ Ene ésuéga anye gô ébungue éanyô na gô épedee éanyô, kabakani éangô na misuga, na vane éetso éngaba te émagôgéani gôndé anye.

⁴² Ti gô maguga mandé gôndé anye Apharisien. Gô éne égésu gô môyakô gôényepeda angô, te tôkôdô étetu mbe menthe na rue, buéyé na mavo mabunza, gô nzima atsangi nôétsa Nzambé tsangine éedi épo. Ivô nôsamenya égobeda Nzambé na mitéma mianyô mietso. Nôsamenya éneegeda Nzambé n’etsimama. Tambô buedi mbe nôgobeda mane mavôni na gétsiké mane magemage.

⁴³ Ti gô maguga mandé gôndé anye Apharisien. Nônyôngéô édigaa gô kuanga yokumaka mbe nôenanô gô eba agéwanyéô. Nônyôngéô mbe oma anôkômbôa kômbôye yanyô yagéneega gô étungue édenganô oma ayekani.

⁴⁴ Ti gô maguga mandé gôndé anye. Nôgono na ngii ésamenyanganô mbe édué te ngii, na môma ayeta gô yangô gémenye.

⁴⁵ Gévovi gémavovo na Jésus mbe: Môékédi, vavovi éwe vane ?ôsamenya mbe ôvovo te na we évovie-a? Na ôtubéda we tsoyi.

⁴⁶ Vane Jésus amamôeséda mbe: Ti gô maguga mandé gôndé anye évovie. Nôtsueéda na nôtsakéga oma magumba maditani masangoongôa ahngô étsua. Ivô gôéwedéa ahngô, anye nôsabono na n’eso.

⁴⁷ Ti gô maguga mandé gôndé anye. Anye nôsaa ngii yamisôba yapandôédi amatasa maNzambé ahmayôhu na tétee yanyô yambeego.

⁴⁸ Gô éne nôtubéda ganyôngéô anye gamayôhu ahngô na tétee yanyô. Ene émabaka na tétee yanyô te gôéyôha ahngô. Anye dôta éne éndé n’anye te gôényepeda ngiiye dimagunyu ahngô.

⁴⁹ T’ebandô Nzambé gô éodo éedi amavovo mbe: Nangatôma na gôndé oma apandôédi amatasa mami. Nangatôma dôta ane amasevôa me gôétsua tsangône éami. Avo angayôhu. Avo dôta angakuanô.

⁵⁰ Jésus amoomba mbe: T’ebandô anye asi pitsi yedi nôngasisédu gô diôwaye yetso yapabdôédi amatasa maNzambé bandôa vamakanô tsina n’oba.

⁵¹ Bandôa n’Abel ône amapanga éyôhuni ngu na Zacharie ône amayôhu gô gatse eba aNzambé va kaba agévumbéô sadigondoku na tsongo éadisambô édigaa Nzambé. Na gô pie, me Jésus nanôbeenda mbe: Oésie adiôwaye yedi yetso, ôndé te gôndé anye asi pitsi yedi.

⁵² Ti gô maguga mandé gôndé anye évovie. Nôsumbéda môsapi ôkukua ôkukée atsongone éndé éodo éetso. Gôbongi anye môsapi, anyene nôseengéa gô tsongo nene, na nôdékéda dôta akanyô, ane anyôngéô éengéa wangô.

⁵³ Vamanôtôga Jésus gô tungune émeekédangô éne, évovie n’Apharisien amakambôga pepe. G’ôpisa ômookô ahngô ameevôa Jésus nyivôye gô mabégô metso.

⁵⁴ Nyivôye te pagô dimakanégahngô émôtambéa mbe mavooe Jésus angakuba gô mavoviame masangaba kuanakue.