LUC TSANGO EAMOSOBA EMATENDA 10 - New Testament in Mitsogo

Jésus amatôma nzima tsambué n’oma abaé

¹ Va mbenene vane, Kumu Jésus amasevôa nzima tsambué yamôgôô na amôgôô abaé. Amatôma angô abaé gôéôbégéda ahngô gôéyanza gô misenge mietso mingabuéangô amuene.

² Jésus amavovo mbe: Tsagane éndé épôni. Na éne émakandani na émoodoni éndé ti éyekani. Ivô ayanzie asaba ayekani gôéendéga éne émagaabôkôni. T’ebandô nanôtôma mbe: Dukani kumu atsagane mbe anôétsa ayanzi gôéengéda éne émagaabôkôni.

³ Kiakani. Nanôkeda mônongovo ga mandombo mandé va gatse anzego.

⁴ Nômbiatsua ta na dode, ta na gébémbé, ta na pondu. Nômbiasikama gô nzéa gôékômbôana.

⁵ Vangeengéa anye na gô eba amôma, pangani évovo mbe: Gétabé saNzambé gébaké gô ebee ôdôô.

⁶ Okô kumu ebee abé môma agétabé, kômbône éanyô éagétabé éngeenanô gôndé angô. Okô kumu ebee asiba môma agétabé, nôtôani kômbône éanyô éagetabé gôndé angô.

⁷ Nôdigaa te gô ebee ôngatubédu anye. Nôaa na nônyua te éne éngeetsô anye. Gôébégô môyanzi avanôkô te gô éne éyanzangô. Nômbiatôta gô yeba na yeba.

⁸ Vatsiganye gô mbôka, na kumu yambôka anôétsa môyakô, aakani éne éétsiô anye.

⁹ Dôngédani ane angadenganye abeeani. Nigôani kumu yambôka mbe: Okumu aNzambé ôweseyi na gôndé anye.

¹⁰ Ivô vangatsiganye gô mbôka, ôkô kumu yambôka asinôsingéa, temani éta gôéevéda kumu yambôka mbe:

¹¹ Buéyé ébisi éatoto éambôkane éanyô, we tôduméda éangô gô makôdô masô. Ivô menyani mbe éébéyéé nane, ôkumu aNzambé ôweseyi na gôndé anye.

¹² Nanôbeenda na gô pie mbe, gô nyaa amôtsundu asi mbôka nene angasisédu. Na gésisédéôge saô géngootéa géne sasi Sodome.

Asi dipo mbôka ahmatsuma paga (Bono na Matt. 11:20–24 )

¹³ Jésus amavovo mbé: Ti gô maguga mangaba gôndé anye asi Chorazin. Maguga mangaba gôndé anye asi Bethsaïda. Mayanza mami mangudi mayanzi me va gatse anyô, mbe namayanziki gôndé asi Tyr na asi Sidon, ahngô mbe amaata seeda na mbe amoko mioto gô yôtô yaô gôétubéda mbe: Tôndé oma abévani na tôkoi mitémamie.

¹⁴ T’ebandô nanôevéda mbe, gô nyaa amôtsundu gésisédéôge sanyô géngootéa na géne sasi Tyr na asi Sidon.

¹⁵ Na anye asi Capernaüm, tambô anye nôabatéda anyene mbe: We tôôtéa oma muetso we tôsaba oma abévani. Anye nôngasugédu gôésisédu gô mungu asoto.

¹⁶ Jésus amavovo n’aneengie edi mbe: One ookéô anye, ookéô te na me. One akina anye, akina te na me. Na ône akina me, akina te na ône amatôma me.

Génikéô sanzima tsambué n’oma abaé amatômukuni

¹⁷ Ane amatômukuni, nzima tsambué n’oma abaé, amanika ahtsôkéa ahngô mbe: Ah Kumu, we tôtômi édidi ébévani gô inoo, na éangô égobedi we.

¹⁸ Jésus amanigôa ahngô mbe: Me nameena Satan amaaga g’ôba ga môkadikadi.

¹⁹ Oôkôni édué. Me nameetsa anye ngudi yeyeta nyogo na ngôtô, na gôébunza manyangame metso mamôdudeo. Anye nôsangookô pievia. Gôsaba sôma génganôbévédani.

²⁰ ?Anye nônyôngéô étsôkéa-a? Tsinôénda mbe nômbiatsôkéa gôgobedu anye n’edidi ébévani, ivô ootéani étsôkéa gômatendu miname manyô gô migandamie miag’ôba.

Jésus amatsôkéa na gényônga (Bono na Matt. 11:25–27 13:16–17

²¹ Gô ndéô nene, Jésus amatsôkéa na gényônga gévôni saGédidi SaNzambé, na amavovo na Nzambé mbe: Ah Téta, éwe Kumu atsina n’oba, nagôkuméda. Ewe ômatsutsuéda mabégô mavôni gôndé ana anéngé mbe amamenya. Géé gôndé oma eodo na oma agéneenga gévôni ômasuéga mangô. Na gô pie Téta, éndé te nane gôébégô ômuene ômanyôngéô te nane. Nagôkuméda gô éangô.

²² Jésus amavovo mbe: Téta amani édeekeda me mabégô metso. Gôsaba môma angoongôa émenya Muana ANzambé, buétsé te amuene Téta. Gôsaba môma angoongôa émenya Téta, buétsé te memuene Muanedi, na dôta ane angeena Téta gô ngudi yami.

²³ Vane Jésus amagéngôga gôébono aneengie. Amavovo n’ahngô mbe: Ti gô gényônga géndé n’anye, nôena mabégôme meenanye.

²⁴ Nanôbeenda mbe, apandôédi ayekani ambeego amatasa maNzambé, n’atômi atsenge amanyôngéô éena éne éenanye pitsi yedi. Ivô ahngô asiene. Amanyôngéô éôkô mane mookô anye, ivô ahngô asimookô.

Tsava éamôma amawedéa môkedi

²⁵ Gévovi amatema gôébambéa Jésus nyivô gôémôkanéga. Angô mbe: ?Môékédi, gôédiia monyo amôbô na môbô nangeenda nayee?

²⁶ Jésus amamônikéda mbe: ?Gô mitôma miaNzambé gômatendu nayee? ?Otanga nayee?

²⁷ Mômôgôô nône amaabéa Jésus mbe: Natangi mbe: Nyôngéô te Kumu Nzambé éoo na môtémoo wetso na matasa moo metso na ngudi yoo yetso na gédidi soo setso. Na dôta, nyôngéô môkoo ganyôngéô éwe ôtô omuene.

²⁸ Jésus angô mbe: Oaabéyi te kuanakue. Indaka te nane. Ongaba na monyo.

²⁹ Ivô môma nône amanyôngéô éakuméda amuene, amabambéa Jésus nyene nyivô. Angô mbe: ?Môkasô indaa?

³⁰ Jésus amamôaabéa gô tsava mbe: Gômabaka mômôgôô amatimôga gô Jérusalem gôékea na gô Jéricho. Gômakeangô amawanya n’asi môkôbé. Asi môkôbé ahmamôsasa mikandamie. Ahmamôbômôa. Ahmakea na ahmatsika angô aka gôpégôpé n’owa.

³¹ Gô nzéa nene, gômakea dôta môdeekedi adigondoku agô eba aNzambé. Vameenangô mômôgôô nône amamôgônga nyene nzéa.

³² Môvo dôta amoota wangô te môyanzi eba aNzambé, môsi géômbé saLévite. Na angô dôta amamôbono na te angô ootaga.

³³ Na môsi Samarie amakiaka môtôô edi gô nzéa nene, amaviga. Ameena mômôgôô nône. Amamôena ngeba.

³⁴ Amawesea gôémôôvôa pôtaye na maduka na madi mamabaka n’edi. Amakata yangô na mikanda. Amamôpekeda gô nyamane éedi émaviakangô. Amamôvegeda na gô eba agenda gôémôkenea gône.

³⁵ Ovo enya ameetsa kumu ebee dode. Angô mbe: Keneaka môbeene nône. Eetso éngadimbanéda éwe gôndé angô me nangagônikédéa vangaviga me.

³⁶ Jésus angô mbe: ?Gondé ahngô atatô ahmeena môbeene, môkedi indaa gamenya éwe?

³⁷ Mômôgôô nône amaabéa mbe: Môkedi te ône ameena angô ngeba. Jésus angô mbe: Kiaka, ôkeenda mônongovo.

Jésus amabuéa gô eba aMarthe na Marie

³⁸ Gômakea Jésus n’aneengi edi gô môtôô amabuéa gô épo mbôka. Gô mbôka nene ahmeengéa na gô eba amôgetone eendô mbe Marthe.

³⁹ Môdimine aMarthe inedi te Marie, amadigaa va makôdô maJésus gôéôkô mane mameekédangô.

⁴⁰ Jésus amadenga Marthe andé na katigi na pingône amayanza magô eba. Amavovo na Jésus mbe: Kumu, me tsigôénda mbe nagôééndi ébégô ?ivô ôseena gayekegéô me na mayanzame-a? ?Osiinda muaneya aviwedéa me-a?

⁴¹ Kumu Jésus amamôsemba mbe: Ah ti éwe Marthe, ôkebangana te pingôye yoo yamayanza, na ôyungédu na mabégô mayekani, tambô mabégôme mapie masayeka.

⁴² Ebégôe te évo na koo. Te éne éndé na muanayoo Marie. Asanganôtôu gô éangô.