LUC TSANGO EAMOSOBA EMATENDA 1 - New Testament in Mitsogo

Ebandôe ématenda Luc tsangône

¹ Luc amatenda mbe: Wee ami, Théophile, me nagôbeenda mbe avo oma amatenda tsangône éamane mamabuéa va gatse asô n’anyô.

² Amanigôa mane mamabeendu ahngô n’ane amadenganô v’ebandô. Te ane ameetsô ôtômu mbe: Nigôani mabégôme maNzambé éma.

³ Me va yami kuka dôta nameevôa ane amadenganôni gôémenya gamabandôa ébégôe na gandéké éangô ngu na ndéô nedué. Namanyôngéô égôtendéa mane mookiô me, éwe Théophile kumaka épôni.

⁴ Nagôtendéa nane te gôéwanyeda mane mookiô me na mane mameekédu éwe mapie.

Môsi g’ôba amavigédu na Nzambé ameevéda ôbôtu aJean-Baptiste

⁵ Gô ndéône ématôma Hérode tsengene éaJudée, gômabaka môdeekedi adigondoku inedi Zacharie. Amabaka gô géômbé sadeekedi adigondoku amatômu n’Abia. Môgaya aZacharie te Elisabeth. Tétene éaElisabeth te Aaron, angô tétene éadeekedi muetso adigondoku.

⁶ Zacharie na Elisabeth amagobeda Nzambé gô mabégô metso. Ahsikékôé ta n’ebégô évo ématsikéô ahngô gô mitômamie na gô mige miaKumu Nzambé.

⁷ Ivô ahngô asibaké na muana gôébégô Elisabeth amabaka te gékômba. Na muetso abaé amabaka te aka ébôôtô.

⁸ Nyovo Zacharie amabaka gô eba aNzambé gô éyanzee éedi éedeekeda digondoku. Te ndéône yedi éeyanza na géômbé sedi.

⁹ Adeekedi adigondoku amatséva na nzéké gôésevoa môvo va gatse aô gôétumba môyombo ambônga amôsôba va mbene aNzambé gô tsongo éadisambô édigaa amuene Nzambé.

¹⁰ Oma muetso amabaka mitie gô môkii gôévovo na Nzambé gô ndéône étumbu môyombo ambônga éamôsôba.

¹¹ Vamabaka Zacharie gô tsongo éadisambô, môsi g’ôba amavigédu na Nzambé vandé angô. Môsi g’ôba amatema gô géeyo gémôgôô sagétumbéô samôyombo.

¹² Vameena Zacharie angô, amakuadima na ônzenze. Gomo ômatsôpa angô.

¹³ Môsi g’ôba amavovo mbe: Ewe Zacharie, ômbieena gomo. Nzambé amookô môdukée woo. Môgayoo Elisabeth angagôbôtéa muanamômôgôô. Omôôga te mbe Jean.

¹⁴ Omuene ôngatsôkéa ôbôtue wedi na gényônga gévôni. N’avo oma ayekani angatsôkéa te mônongovo.

¹⁵ Muanoo angaba môma môvôni va mbene aKumu Nzambé. Môsi g’ôba amamônigôa mbe: Muanee ône asanganyua maduku. Asanganyua ta na meba mavo meedangi. Angaba amayôa na Gédidi SaNzambé gô môtémedi bandôa g’ôbôtu edi.

¹⁶ Angatévéda ana aIsraël ayekani nzéane na gôndé Nzambé, Kumune éaô.

¹⁷ Amuene angaba va mbene aNzambé gédidi gévo na ngudi dipo na Elie, môpandôédine ambeego amatasa maNzambé. Angavambéda téteye na anaô. Angakoa ane akékôani aka agobedi amane manyôngéô Nzambé. Angeekéda oma gôéba kuanakue ganyôngéô Kumu Nzambé.

¹⁸ Ivô Zacharie amatsuma ôgie ône paga mbe: Tubéda me éne éngamenyéda me mbe ôsapata. Osabômu mbe wa na môgayami muetso abaé tôka te ébôôtô.

¹⁹ Vane môsi g’ôba amamôaabéa mbe: Me te Gabriel. Me te môyanzine aNzambé. Amatôma me mbe naviga gôébeenda éwe tsangône édué éamôsôba.

²⁰ Géé éwe, ôtsuma ôgie wedi paga. Buéyé mbe nane, ébégôe éngabuéa mônongovo gamanyôngéô Nzambé. Ivô éwe, ôngakoga ôka n’obôbô na ôsangadôbubua ngu na vangeenanô ébégôe éevédiô éwe.

²¹ Gômadinga Zacharie gô eba aNzambé gô tsongo éadisambô, ane amamôenéakani amatsapéô.

²² Vamakusa Zacharie gô eba asiôngôédô évovo. Vane oma amamenya mbe Zacharie eeni ébégô évôni gô gatse eba aNzambé gôbaki angô. Zacharie asibubuéké amahsombeda géombége.

²³ Vamamana Zacharie éyanzee émabaka n’edi amanika na gô ebedi.

²⁴ Vamoota ndéône môgayedi amatsua émé. Amabaka gô ebedi somo gô ngonde ditayi. Amatasa gô môtémedi mbe:

²⁵ Aanaka éne émanyôngéô Kumu Nzambé éénda gôndé me. Amanôtôa me tsoyine ébaki n’ami va mbene oma.

Môsi g’ôba amavigédu na Nzambé ameevéda ôbôtu aJésus

²⁶ Vamaba Elisabeth aka n’emé ngonde môtôba, Nzambé amavigéda môsi g’ôba, inedi Gabriel na gô mbôka étetu mbe Nazareth éndé gô Galilée.

²⁷ Môsi g’ôba, Gabriel amatsiga na gôndé tômbô asigésangané na mômôgôô. Inedi Marie. Marie amateteduku na mômôgôô atetu mbe Joseph mbe angamôbaa. Joseph te muanee aDavid, môtômine ambeego.

²⁸ Môsi g’ôba amatsiga na gôndé Marie na amavovo mbe: Nagôkômbôa, éwe ôétsiô mate na Nzambé. Kumu Nzambé andéké n’ewe.

²⁹ Gô mavovia mema, Marie amakuadima na amatasa gô môtémedi mbe: ?Kômbô nedué ékegea nayee?

³⁰ Môsi g’ôba amamônigôa mbe: Marie, ômbiatatéa ta na pedu. Mate maNzambé mandé gôndé éwe.

³¹ Oeni, ôngatsua éme na ôngabôta muanamômôgôô. Ongamôôga te mbe Jésus.

³² Angaba môma môvôni. Angatetu mbe Muana ANzambé, Tétedi Kumu angudi yetso. Kumu Nzambé angamôdigéda n’okumaka wetso gandé kumu étômani, gamabaka David tétene yedi éav’ebandô.

³³ Angatôma omedi asi éongo éaIsraël môbô na môbô. Otômue wedi ôsangaba n’ekôdéô.

³⁴ Marie ameevôa môsi g’ôba mbe: ?Ebégôe éne éngaba nayee? Gôébégô me madeo tsigésangana na mômôgôô.

³⁵ Môsi g’ôba amamôaabéa mbe: Gédidi SaNzambé géngaviga na gôndé éwe na ngudi yaNzambé dingapika éwe ga ôbôngé. T’ebandô muanee angabôtewe angatetu mbe, One amatômu na Nzambé, na dota Muana ANzambé.

³⁶ Menya mbe mônoo Elisabeth, ône aka gébôôtô na ameendô mbe gékômba, aka n’emé éangonde môtôba.

³⁷ Bangôa mbe gôndé Nzambé gôsaba ébégô ésangeendégégéani.

³⁸ Vane Marie amamôaabéa mbe: Me te môyanzi aKumu Nzambé. Te mbe ayanzé na me éne évovi éwe. Môsi g’ôba amakea.

Marie amakea gôéena Elisabeth

³⁹ Gô ndéô nene Marie amatimôga gô ebedi gôéyavôga ékea môtôô na gô môsenge ôdenganô gô mikôdi miagô Judée.

⁴⁰ Ameengéa na gô eba aZacharie na amakômbôa Elisabeth.

⁴¹ Vamookô Elisabeth ôtimôgiee aMarie, amookô na muanee apupa gô ébuyi. Gédidi SaNzambé gémamôyuéséda môtémee.

⁴² Elisabeth amavovo n’ogi agényônga mbe: Mate maNzambé mandéké n’ewe. Na mangô mootéa mane mageto muetso. Mate medi dôta mandéké gôndé muanee andé n’ewe gô ébuyi.

⁴³ Tambô me môma abobo, navigéô na yeene aKumu ami.

⁴⁴ Oeni, vakômbôyi éwe me n’atsatsee, muanee apupi na gényônga gô gatse ebuyi éami.

⁴⁵ Ti gô gényônga géndé n’ewe ôsitsuma paga mbe éne émakudéga Kumu Nzambé na gôndé éwe éngeenanô.

Embô ématôa Marie

⁴⁶ Vane Marie amatôa imbô mbe: Matasa mami maneegeda Kumu ami épôni.

⁴⁷ Môtémami ôyôa na gényônga gôébégô éaNzambé Mooboyi ami.

⁴⁸ Angô amanyôngéô éasugéda amuene gôébono me, môyanzine wedi abobo. Na gô pie oma muetso bandôa deo noo ngu na v’ekôdéô, Angeenda me mbe: ône ameetsô mate na Nzambé.

⁴⁹ Ah Nzambé, Kumu angudi yetso, ameendéa me mabégô mavôni manyônganéôni. Inedi ématsimamani éôtéa miname metso mava tsina.

⁵⁰ Angô gô ndéô yetso eena môma ngeba gôndé ane amôgobeda na éhdita.

⁵¹ Amayanza mabégô mavôni n’ogogoe wedi. Amanôtôga gô nzéane ane andé na mitéma miadienza.

⁵² Amasendoa atômie andé digaa gô édigaa éokumaka. Amabatéda môma abobo na gô tungune éokumaka.

⁵³ Ameetsa ôkiti ôvôni gôndé ane amookô nzaa. Amapatsa ékiti amakeda angô te mogo matévo.

⁵⁴ Amawesea na gôndé omedi, asi Israël gôéwedéa ahngô. Ahsibômu étubeda étondo éedi

⁵⁵ Gôndé Abraham n’anedi môbô na môbô. Te éne émavangangô na peeye yasô yambeego.

⁵⁶ Marie amadigaa ngonde ditatô na Elisabeth, vane amanika na gô mbôkedi.

Obôtu aJean-Baptiste

⁵⁷ Ndéône émabôta Elisabeth muanedi amômôgôô émabuéa.

⁵⁸ Ane amabambana yeba na Elisabeth mbôkepo amookô. Kindedi na kinde amômiedi amookô na amatsôkéa n’edi ébégô évôni émayanza Kumu Nzambé gôétubéda angô étondoe éedi.

⁵⁹ Vamabaka muanee aka pitsi génana muetso amadenganô gôémôgeeta. Amanyôngéô émôga inee éatétedi Zacharie.

⁶⁰ Ivô Elisabeth amakékôa mbe: Kaka nane, inedi te Jean.

⁶¹ Muetso amatsapéô mbe: inee éne madeo ésiôkanô gô mbumune yanyô.

⁶² Gômabaka tétene Zacharie gébôbô, oma amavovo n’edi sombeda mbe: ?Onyôngéô inee amuanee woo éôgu indaa?

⁶³ Zacharie amaduka ahngô ôkadô na amatenda mbe: Inee amuanee te Jean. Muetso amasôbasôbana.

⁶⁴ Tsina na tsina ômeni aZacharie ômapunzuga na amabandôa évovo gamavovokô angô na mbeego. Amakuméda Nzambé na ôgie agô ngongo.

⁶⁵ Vane muetso amabambana yebaye n’ahngô amookô ahngô gomo. Tsangône émapaa tsengene nyetso éamikôdimie miaJudée.

⁶⁶ Muetso amookôni amatanganéda na ameevôana mbe: ?O mônongo amuana angaba nayee? Tambô te ngudi yaKumu Nzambé dindé pepe gôndé angô.

Embô ématôa Zacharie

⁶⁷ Gédidi SaNzambé gémeengéa na gôndé Zacharie, tétene amuanee avembo. Amapandôéda matasa maNzambé gô imbô mbe:

⁶⁸ Tôkumédékéni Kumu Nzambé, angô te Nzambé éongo éaIsraël. Gôébégô andé gôébono omedi na andé gôéoboo ahngô.

⁶⁹ Amatsutsuéda gôndé we Mooboyi môvôni. Mooboyi ône te Muana amôyanzi edi ambeego, môtômine David.

⁷⁰ Te éne émavovo angô va mbeego gô ngudi yapandôédi amatasa maNzambé.

⁷¹ Amavanga mbe: Nanganôoboo gô mogo madudeoe wanyô. Nanganôkuséda buéyé mbe nôndé gô tsina angudi yavingie wanyô.

⁷² Te mbe ngeba yedi dimeenanô gôndé peeye yasô yava mbeego. Te mbe abangôa éne émavanganangô n’asô.

⁷³ Gôébégô Nzambé amasongéa na Téta Abraham mbe: Nôngeena mabégô mema.

⁷⁴ Mabégôme te mbe tôkusédu gô tsina angudi yavingi asô n’anyô. Te mbe tôngayanzéa Nzambé gébé na gomo amôma.

⁷⁵ Ameenda nane gômbe tôngaba oma amatsimamani aNzambé na gébé n’oési va mbene edi, Pitsi yasô yetso yava tsina.

⁷⁶ N’ewe muanami, ôngatetu mbe môpandôédi amatasa maNzambé, ône aMôbô na Môbô ootéa muetso. N’ewe ôngoobégéa gô mbene aKumu éoo gômôbea nzéane.

⁷⁷ Ongamenyeda oma amasevôa Nzambé mbe: Mooboyi avigi. One angasingéa ébévee éanyô kokoo na angooboo anye.

⁷⁸ Gôébégô Nzambéné éasô n’anyô andé na ngeba na mavôma. Ahngatanéda wa n’anyô gévede gévôni géviga g’ôba na gégono na kômbéne vatsiga yangô.

⁷⁹ Gévedege géne géngapatsa évitsi gôndé ane adigaa gô tsina éangô na gô tsina otômu owa. Te gévedege sangô gétévéda makôdôme masô n’anyô gôékea gô nzéa éagétabé.

⁸⁰ Muanee ône amoongôga. Môtémedi ômoodedu. Amadigaa gô tsenge émagasani gébé n’oma ngu na ndéône ématsutsuga angô va mbene oma aIsraël.