Jean 9 - New Testament in Mitsogo

Jésus amadôngéda môsi pogu éagébôté

¹ Vamakea Jésus gô gétunguge gémootangô, ameena mômôgôô, môsi pogu éagébôté.

² Aneengi aJésus amamôévôa mbe: ?Môékédi pogune édué, émaviga gôni? ?Te gô ébévee éedi amuene, vo te gô ébévee éakindedi?

³ Jésus amanigôa ahngô mbe: Esaba mane. Kaka gô ébévee éedi. Kaka dôta ébévee éakindedi. Ivô nanyôngéô mbe ngudi yaNzambé dienanô t’ebandô amabôtu na pogu.

⁴ Vagébaka nyee tôyanzéké mane manyôngéô ône amatôma me. Nyee ôédie, môma asoongôa éyanza gô évitsi.

⁵ Vagébaka me gô tsengene, me te gévéde gétanéda tsengene.

⁶ N’evovo nane, Jésus amatua mate medi na gô tsina gôémabuga na toto. Amasôga miso mamôbeene apogu na totoye dine.

⁷ Jésus amamôtôma mbe: Kiaka ôkéôvôa ôsôé woo gô gévondo gémeeba oma, gééndô mbe Siloé. (Ina éaSiloé ékegea mbe ône amakudéguni.) Môsi pogu amakea na amoovôa totoye g’ôsôe wedi. Vamanikangô, miso medi mamapôga na ameena.

⁸ Ane amabambana n’edi mbôkepo, na ane amamôena andé gôédukana va kôbangô anzéa, amatsapéô mbe: Akasôni ?tambô mômôgôô noo kaka te ône amadenganô va kôbangô anzéa adukana-a?

⁹ Avo ameenda mbe: Ii, te angô. Avo dôta angô mbe: Kaka angô. Agono n’edi. Mômôgôô nône amuene ameenda mbe: Te me.

¹⁰ Oma amamôévôa mbe: ?Misome moo meenéyi nayee?

¹¹ Amanigôa akedi mbe: Môma môvo eendô mbe Jésus, asôgi me misome na toto digési angô na makengeme medi. Atômi me mbe: Kiaka ôkeôvôa ôsôe woo gô gévondo saSiloé. Me nakeyi. Vamani me éôvôa, te misome eenéa.

¹² Akedi amamôévôa mbe: ?Môma nône andé gôni? Angô mbe: Me tsamenya gôndé angô.

Apharisien amatsundéda môsi pogu adôngédiôni

¹³ Oma amakea na môsi pogu adôngédiôni na gôndé Apharisien.

¹⁴ Tambô nyee ômakônza Jésus totoye gôémôsôga gô misome mbe meenéa, ômabaka te nyee edunda.

¹⁵ T’ebandô na Apharisien dôta amamôévôa mane meendiô angô mbe misome meenéa. Mômôgôô nône amanigôa ahngô mbe: Môma nône asôgi me totoye va misome. Noovôi ôsôe wami ne me te eenaga.

¹⁶ Avo Apharisien amavovo mbe: One amayanzéa éwe ébégôe éne, ka asiviga gôndé Nzambé. Mbe amatômuku na Nzambé angô mbe asikékôa môge anyee edunda. Avo dôta amavovo mbe: ?Angô mbe môma môbévani angoongôa éénda ébégô ényônganéôni esôbasôbana we nayee? Apharisien amasaganédana anguene te gô ébégôe éne.

¹⁷ Vane Apharisien ameevôa mômôgôône adôngédiôni mbe: ?Ewe ôtasa nayee gôndé ône agôdôngedi misome? Amaabéa mbe: Gatasa me, angô te môpandôédi amatasa maNzambé.

¹⁸ Buéyé vane, peeye yAjuif amatsuma paga mbe mômôgôône adôngédiôni, kaka ône amabaka na pogu. Amabambéa kindedi gôéôkô mbe te angô.

¹⁹ Ahmeevôa kindedi mbe: ?Mômôgôône ôdôô te na gô pie muanee wanyô-a? Aabéani na gô pie mbe abaki môsi pogu agébôté. Nigôani we éne ééndiô angô gôémôdôngéda misome.

²⁰ Kindedi amanikéda mbe: We tôsabômu mbe mômôgôône ôdôô te muanee wasô. N’angô amabôtu na pogu.

²¹ Ivô éne ééndiô angô mbe miso medi meenéa, we tôsamenya éangô. Na ône amôdôngédini, we tôsamômenya. Ivôakani amuene. Aka te mômôgôô. Andé na mônyedi éetangôa.

²² Kindedi amavovo nane te gômookô angô Ajuif gomo. Ajuif amavanga mbe muetso amema mbe Jésus te ône amatômu na Nzambé, angapatsô gô eba agéwanyéô sAjuif.

²³ T’ebandô kinde amômôgôô nône amavovo mbe: Ivôakani amuene. Aka te mômôgôô. Andé na mônyedi éetangôa.

²⁴ Apharisien amoomba émôbambéa kukane éamôbaé. Ahngô mbe: Aabéa we va mbene aNzambé. Ombiapata. Tôsabômu mbe mômôgôô nône te môma môbévani.

²⁵ Amaabéa ahngô mbe: ?Angô géé te môma môbévani géé môma amôsôba-a? Me tsamenya. Ene ésabômu me, te gômabaka me môma apogu, géé deo noo neenéa.

²⁶ Apharisien amoomba émôévôa mbe: ?Agôéndi nayee? ?Agôpôédi misome nayee?

²⁷ Amavovo mbe: Me namani énônigôa metso n’anye nôsookô. ?Nôomba étsundéda me nane gôndé? Buétsé nônyôngéô ékoga aneengi edi.

²⁸ Apharisien amamôtoko na amamôputugéa mbe: Môneengine wedi te éwe. We, tôndé aneengi aMoïse.

²⁹ We tôsabômu mbe Nzambé amavovo na Moïse, géé mômôgôô nône gômatimôgangô tôsamenya.

³⁰ Mômôgôône adôngédiôni amavovo na Apharisien mbe: Endé te nane. Nôeni éne étsapanéôni te éangô éne. Buéyé gasamenyanye gôvigangô, te angô adôngédi me misome.

³¹ We tôsabômu mbe Nzambé asookô môduké amôma môbévani. Oôkô te ône amôgobedani na eenda mane manyôngéô amuene Nzambé.

³² Wa n’anyô madeo tôsiôkô mbe môsi pogu agébôté apôédiô misome.

³³ Mômôgôô nône mbe asivigé gôndé Nzambé, angô mbe asiôngôa éénda mane.

³⁴ Apharisien amamôsemba mbe: Ti éwe. Ewe ôndé gô mabégô mabévani g’ebôtéô éwe. ?N’ewe ônyôngéô éba môékédine wasô? Amamôpatsa gô eba agéwanyéô.

Ane andé na paga gô mitéma

³⁵ Jésus amookô tsangô amômôgôô apatsiôni. Amawanya n’edi na angô mbe: ?Gôndé ône eendô mbe Muana ANzambé, môtémee woo ôndé nayee? ?Ogétsumaka te paga-a?

³⁶ Mômôgôô nône amavovo mbe: Môékédi, nigôa me ône eendô mbe Muana ANzambé. ?Angô indaa? Me nanyôngéô émôétsa môtémee wami.

³⁷ Jésus angô mbe: Te ône eena éwe na miso moo. Te ône avovo n’ewe.

³⁸ Mômôgôô nône amasiba mabongo medi va mbene aJésus gôémôneegeda na amavovo mbe: Kumu, me tsatsumadô éwe paga.

³⁹ Jésus amapandôéda angô mbe: Me namaviga na gô tsina te mbe oma angeesédu na te mbe asi pogu angeenéa, na mbe ane eenéani angaba na pogu.

⁴⁰ Avo Apharisien amadenganô wangô amookô gamavovo Jésus. Amamôévôa mbe: ?Na we dôta te asi pogu-a?

⁴¹ Jésus amanigôa ahngô mbe: Anye mbe nôndéké asi pogu, anye mbe nôsaba n’ebévee. Géé vendanye mbe: We tôenéa, anye nôgébaka n’ebévee.