Jean 6 - New Testament in Mitsogo

Jésus amayekeda môyakô gôéngutéda mitônisa mitayi mioma (Bono na Matt. 14:13–21

¹ Vamamana Jésus éékéda amaabôga na gô dipo tsényé yamubue ôndé gô Galilée ôtetu mbe Tibériade.

² Géômbé gévôni gémaanda Jésus te vameenahngô gémbégéa sangudi yaNzambé vamadôngéda Jésus abeeyie.

³ Jésus n’aneengi edi amabata na gô ngongo amôkôdi na ahmadigaa.

⁴ Sueti éAjuif ééndô mbe Pâque émaba éka gôpégôpé.

⁵ Jésus amabono pingô yoma ahmaviga gôéôkô na gôéena éne émayanzangô. Jésus ameevôa Philippe mbe: ?Tôngakesômba môyakôe eebôngôa omee muetsoaa gôni?

⁶ Ameevôa Philippe nane gôéôkô mônongoe ôngasiiangô. Amuene asibômu éne éngeendangô.

⁷ Philippe amasiia mbe: ?Tôngeenda nayee ka buétsé tôba na dode diyanza môma môsaa amôbongo na yangô disangadugu gôésômbéa omeaa mipemba mbe tôkabanéa n’ahngô vipesu vipesu.

⁸ Môneengi môvo, inedi André muaneya aSimon Pierre amavovo mbe:

⁹ Neeni éva muanéngé andé na mipemba mitayi migemige na tônyama tôbaé tagô mbéyi. ?Vipesuvie viamôyakô évi vingaduganéô nayee na pingône oma adua?

¹⁰ Jésus amatôma aneengie mbe: Digédaani omee. (Tungu nene émabaka ésingaa.) Na oma amadigaa. Otangôe waô amabaka mitônisa mitayi miamôgôô gétangé agetoe n’anee.

¹¹ Jésus amabongo mipembamie na amaduka Nzambé mate gô miangô. Vane amamikabanéa n’ane amabaka digaa. Na nyama yagô mbéyi amadikabanéa te mônongovo ngu n’emanyôngéô omee.

¹² Amanguta muetso. Vane Jésus amatôma aneengie mbe: Dingôani ébéndékéé na tseseye yetso kabaga gôbungana ta na vipesu.

¹³ Gô mipemba mitayi migemige mimaakôni amadingôa ébéndékée na tseseye dimasanéakani na amayuéséda nzima atsaô na tsaô dibae.

¹⁴ Oma ameena ébégôe évôni émayanza Jésus ésoongôa môma ésupua. Amasôbasôbana mbe: Mômôgôône ôdôô te na gô pie môpandôédi atômiô na Nzambé na gô tsengene, avigini.

¹⁵ Jésus asibômuku mbe: Omeaa anyôngéô éétsa me ényanga gôéba môtômine waô ava tsina. Amayavôga énôtôga vandé ahngô na amakea na gô ngongo amôkôdi amuene gébé na môma.

Jésus amananga gô ngongo ameba (Bono na Matt. 14:22–33 )

¹⁶ Vameeda nyee, aneengie aJésus amakea na v’ehbôngô.

¹⁷ Amapeka gô mbôngône na amamitenoa gôéabôga mubue na gô Capernaüm. Emabaka te g’ôka évitsi. Jésus asibaké n’ahngô.

¹⁸ Gékunga gémakungéda na miyôkiyôkimie miamubu mimayôkiméda.

¹⁹ Aneengie amanuga mbôngône na amatongonea na tsényéne ôkana akilometre ditayi. Tsina na tsina ahmeena Jésus aviga ayeta gô ngongo amebame awesea na gô mbôngône. Aneengie amatsôpu na gomo.

²⁰ Vane Jésus amavovo n’ahngô mbe: O te me, Jésus. Nôneena gomo.

²¹ Ahmabaka mbe ahpekeda Jésus, ivô tsina na tsina mbôngône ématsega gô dipo tsényé dimanyôngéô ahngô ébuéa.

Oma amabuta Jésus

²² N’ongôngôe ône, géômbége gémasanéaka gô dipo tsényé yamubu amabono mbôngôye v’ehbongo. Ameena te mbôngô épo. Asibômu mbe: Kôdôtsé Jésus asipeka n’aneengi edi gô mbôngône émakea ahngô na gô dipo tsényé. Amakea te amuene.

²³ Béyé mbe nane, dipo mbôngô dimaviga n’ongôngôe ône gô mbôkane ééndô mbe Tibériade. Dimatsega vabambi na tungune émaaka géômbége mipemba mimayekeda Kumu Jésus gô mate mamadukangô Nzambé.

²⁴ Géômbége gémabono mbôngône ivô asiene Jésus n’aneengie wangô. Vane oma amapeka gô mbôngôye gôéabôga na gô Capernaüm gôébuta Jésus.

Jésus te môpemba ôétsa monyo

²⁵ Oma amadenga Jésus gô dipo tsényé yamubu. Amamôévôa mbe: Môékédi, ôabôgi n’ego nayee?

²⁶ Jésus amabika n’ahngô mbe: Nanôbeenda na gô pie mbe anye nôbuta me te gôngutédi me anye na mipembamie. Nôsabuta me gôeni anye ngudi yaNzambé.

²⁷ Tsikani éyanza gô môyakô ôbooni. Yanzani gô môyakôe ôdingani na ôétsa monyo ôsakôdéakani. Téta Nzambé ameemba me Muana Amôma ndémbô éenyangee éedi, t’ebandô nandé na ngudi yenôétsa môyakôe ône.

²⁸ Oma amamôévôa mbe: ?Gôédugéda éyanzee ényôngéô Nzambé tôngeenda nayee?

²⁹ Jésus amanigôa ahngô mbe: Eyanza évôni ényôngéô Nzambé mbe nôyanza éangô te mbe nôétsa mitéma mianyô na gôndé ône amatôma angô na gô tsina.

³⁰ Oma amamôévôa mbe: ?Gôétubéda we ngudiye yoo ôngeenda nayee? ?Ongatubéda we gémbégéa ndé géngeetsa we éwe mitémamie? Yanza va miso masô ébégô ényônganéôni ésoongôa môma ésupua.

³¹ Gô tsenge émagasani peeye yasô amaa môyakô ômaaga g’ôba, ôtetu mbe manne. Te gatôtanga gô Matendeo MaNzambé mbe: Ameetsa ahngô mipemba mimaviga g’ôba gôéaa.

³² Jésus amavovo n’ahngo mbe: Me nanôbeenda na gô pie mbe ône ameetsa anye mipembamie mimaviga g’ôba kaka Moïse. Te Téta Nzambé amaagéda miangô g’ôba na miangô te mipemba miapie miitsô anye.

³³ Menyani mbe mipemba miitsa Nzambé môma, te mine miviga g’ôba na miitsa môma monyo.

³⁴ Oma amaduka Jésus mbe: Kumu, kuka yetso iitsa we mipembamie mine.

³⁵ Jésus amapandôéda angô mbe: Me te môpemba ôétsa môma monyo. One aviga na gôndé me asangadôôkô nzaa. One eetsa me môtémedi asangadôôkô sôé.

³⁶ Bangôani gamavovo me n’anye mbe anye nômeena me na miso manyô na nôgétsumaka me paga.

³⁷ Muetso eetsô me na Téta Nzambé aviga na gôndé me, tsangamôpatsa na gô mbadi ivô angeengéa na gôndé me.

³⁸ Me namasuma g’ôba gôéénda éne ényôngéô Nzambé ône amatôma me kaka éne ényôngéô memuene.

³⁹ Oôkôni éne ényôngéô ône amatôma me. Asanyôngéô mbe me nadimbanédana ta na môvo va gatse ane ameetsangô me. Anyôngéô mbe gô nyee amôyusumédu me nangakundua omami muetso g’ôwa.

⁴⁰ Ene ényôngéô Téta te mbe muetso ane eena Jésus Muana ANzambé na ahmôétsa mitémamie, angaba na monyo amôbô na môbô. Na me Jésus nangaatimôa gô nyee amôyusumédu.

⁴¹ Ajuif amakambôga gômeenda Jésus mbe: Me te môpemba ômaviga g’ôba.

⁴² Ajuif amatsumana anguene paga n’opisa mbe: ?Angô eenda mbe: Me te môpemba ômaviga g’ôba nayee? ?Jésus, ône avovoni ôdôô kaka te muanee aJoseph? We tôsabômu yeedi na tétedi.

⁴³ Jésus amavovo n’ahngô mbe: Nômbiagiagana.

⁴⁴ Gôsaba môma oongôa éviga na gôndé me buétsé te Téta ône amatôma me, amôweseda gôésinga me. Me dôta gô nyee amôyusumédu nangamôkundua g’ôwa.

⁴⁵ Apandôédi amatasa maNzambé amatenda mbe: Muetso angeekédu mabégôme te n’amuene Nzambé. T’ebandô neendi mbe muetso ane ookiô ôgi a Téta na asinga meekédume medi asingi te me na awesea na gôndé me.

⁴⁶ Kaka mbe môma oongôa éena Téta. One ameena Téta te môvo na koo, ône amaviga g’ôba gôndé Nzambé.

⁴⁷ Me nanôbeenda ébégôé éapie édué mbe, ône eetsa me môtémedi wetso andé na monyo amôbô na môbô.

⁴⁸ Me te môpemba ôétsa monyo.

⁴⁹ Anye nôbangôa gamaaka peeye yanyô môpemba ômaaga g’ôba gô tsenge émagasani. Buéyé gamaakahngô, amawa.

⁵⁰ Géé ône aa môpemba apie ôviga g’ôba, asangawa.

⁵¹ Jésus amapandôéda mbe: Me te môpemba ôviga g’ôba ôétsa môma monyo. One angaa môpembee ône angaba na monyo ôsakôdéakani. Môpembee ôngamôétsa me te ôtôe wami. Nadeekeda oma ôtôe wami te mbe muetso angadiia monyo te gô angô.

⁵² Vane Ajuif amatsumanaka paga mbe: ?Mômôgôô noo angatôétsa ôtôe wedi mbe tômôaa nayee?

⁵³ Jésus amanigôa ahngô mbe: Nanôbeenda na gô pie mbe, ône akina éaa ôtôe wami me Muana Amôma, na akina ényua nzina yami, asangaba na monyo gô môtémedi.

⁵⁴ One asinga éaa ôtôe wami na asinga ényua nzinaye yami andé na monyo ôsavikôdéani. Me nangamôkundua g’ôwa gô pitsi yamôyusumédu.

⁵⁵ Menyani mbe ôtôe wami te môyakô ômana nzaa. Na nzina yami te meba mamana sôé.

⁵⁶ One angaaka ôtôe wami na anganyuaka nzina yami andéké monyovo n’ami. Me dôta nandé monyovo n’edi.

⁵⁷ Téta, ône amatôma me, andé na monyo. Monyoe wami te angô. Endé te nane. One aa ôtôé wami na anyua nzinaye yami, monyoe wedi te me.

⁵⁸ Nôeni môpembee apie ômaviga g’ôba ôsagono n’one ômaa peeye yanyô dimawani. One angaaka môpemba ônônigôi me, angaba na monyo amôbô na môbô.

⁵⁹ Jésus amanigôa oma mabégô mema vameekédangô gô eba agéwanyéô sAjuif gô Capernaüm.

Ogi ôétsa monyo amôbô na môbô

⁶⁰ Aneengie ayekani n’eôkô mane mamavovo Jésus, ahmatsapéô mbe: ?Akasô mônongo ameekédu ôndé nayee? Odaga. ?One angamasingani indaa?

⁶¹ Jésus asibômu mbe aneengie akea agiangana gô mane mamavovo angô. Na ameevôa ahngô mbe: ?Nôdagéyiô mane mavovi me-a?

⁶² ?Vangeenanye me, Muana Amôma nanikéa ébata na gômaviga me nôngeenda nayee?

⁶³ Géne géétsa monyo te Gédidige SaNzambé. Otôe ôsaba na tsoongo. Mane mabeendi me anye maviga gôndé Gédidi SaNzambé na meetsa oma monyo.

⁶⁴ Avo va gatse anyô, nôgétsumaka me paga. (Jésus amavovo nane gôébégô amuene asibômuku bandôa gômapanga, ane asangamôétsa mitémamie na dôta ône angamôkabani.)

⁶⁵ Jésus amoomba énigôa mbe: Nôeni ébandôe évovi me mbe gôsaba môma oongôa éwesea gôésinga me, amuene Nzambé gémôétsé tsôvé gôéwesea.

⁶⁶ Bandôa nyoone aneengi ayekani amaagana na Jésus na asibédô n’evamba n’edi.

⁶⁷ Vane Jésus ameevôa nzima n’aneengie abaé mbe: ?Vakeyi akanyô, n’anye nôsakea-a?

⁶⁸ Simon Pierre amamôaabéa na nyivô mbe: ?Kumu, we tôngakea na gôndé ndaa? Ewe ôndé na mabégôme meetsa monyo amôbô na môbô.

⁶⁹ We tômani éena mbe éwe te ône amasevou na Nzambé na amatômu n’edi na gô tsina. We tômani égôétsa mitéma miasô.

⁷⁰ Jésus amanikéda ahngô mbe: Me namanôsevoa anye nzima n’abaé. Eébéyée nane, môvô vandé anye andé te yabédé.

⁷¹ Amavovo nane gôébégô éaJudas, muana aSimon Iscariote. Gôébégô Judas, buéyé gamabakangô gô géômbé saneengie te ône angakaba Jésus.