Jean 2 - New Testament in Mitsogo

Môambô ayômba gô Cana

¹ Vamoota pitsi dibaé oma amaduga gô Cana éndé gô tsenge éaGalilée gôébôngôa yômba. Yene aJésus amadenganô.

² Jésus n’aneengi edi amabambéô gôédenganô gô yômbaye dine.

³ Vamagôga madukume, yeene aJésus amavovo n’edi mbe: Kumu yambôka asaba na maduku.

⁴ Ivô Jésus amavovo na yeedi mbe: Môgeto noo, kaka éwe ôtôma me gô mabégô mema. Ndéône éngeenanô mayanzame mami madeo ésibuéa.

⁵ Yeene aJésus amavovo n’ayanzie akumu yambôka mbe: Eetso éngatômu anye n’edi, indakani éangô.

⁶ Gômadenganô kiekie môtôba. Kiekieye dipôni dine dimakeneo meba gôégôgéda yôtôye geenda Ajuif gô gésôga saô. Kiekie épo gôdugu buétsé môkama ambuti.

⁷ Jésus amatôma ayanzie mbe: Yuésédani kiekie yedi na meba. Ayanzie amadiyuéséda na yee.

⁸ Vane Jésus amoomba étôma ahngô mbe: Buétani vipesu gô mebame mane, nôkea nôkeétsa ône atôma môambôe. Amamabuéta na amamatsua.

⁹ Môtômine amôambôe amabémba mebame mane mamakoga maka maduku. N’angô asimenye gômaviga madukume mane. Ane asibômuni te ayanzie amabuétaka mebame: Vane amabambéa mômôgôône, kumu ayômbaye gôémôsemba mbe:

¹⁰ Te gatôéndakani, môma apanga eetsô madukume mamisôba. Vangaba angô aka n’edangi, vane ôétseeyee mane manganye ésadaga. Géé éwe, yoosuéga mane mamisôba gôéyusuméda mangô.

¹¹ Géne te gémbégéage samapanga gématubéda Jésus oma ondômbedi. Amayanza ébégôé évôni éne ématsapéô oma na ésiôngôé môma ésupua te gô mbôkane ééndô mbe Cana gô tsenge éaGalilée. Aneengi edi asitsumédô ôtômue wedi paga.

¹² Va mbenene vane, Jésus amakea na yeedi, n’adimi edi, n’aneengie na gô mbôkane ééndô mbe Capernaüm. Asidingé wangô. Amamana ôkana apitsi.

Jésus amanyepeda eba aNzambé (Bono na Matt. 21:12–13 )

¹³ Vamabaka ndéône éasuetine éaPâque émawesea, Jésus amakea na gô Jérusalem.

¹⁴ Vameengéa Jésus gô eba aNzambé amadenga amôgôô andé digaa gôésômbéda pagasa na mandombo na mabembi. Amadenga na apukanédi adode digaa va tabudé diyanzahngô.

¹⁵ Vane Jésus amanika môkodie minikô minayi gôékônza môbitô. Amapatsa asômbédie gô eba aNzambé na angô. Te omee na mandombome, na pagasaye yaô yetso. Amatinda tabudéye yapukanédi adode na ameetaméda dode yaô.

¹⁶ Amavovo n’asômbédi amabembi mbe: Nôtôgani egô na yômee yanyô. ?Anye nôbévéda eba aTéta ôka eba ayôkô nayee?

¹⁷ Aneengi edi amabangôa mane mamatangahngô gô Matendeô MaNzambé mbe: Ah Nzambé, ényôngéôe ényôngéô me ebee woo, endé ti ébeea. Na ébeea éne te ga soto géyôa gô môtémami.

¹⁸ Vameena Ajuif éne émeenda Jésus amamôsemba mbe: ?Ene ééndi éwe gô eba aNzambé ôtômiô na ndaa mbe: Inda te nane? Okô mbe ôndé n’enyanga tubéda we gémbégéa.

¹⁹ Jésus amavovo n’ahngô mbe: Panzani ebee aNzambé ôdôô. Nangasaa wene ôngagôga gô pitsi ditatô.

²⁰ Ajuif amanigôa Jésus mbe: Tétee yasô amayanza eba ôdôô nzima dinayi na mipuma môtôba. ?Ewe ôngaôsaa pitsi ditatô nayee?

²¹ Tambô ebee ômavovo Jésus, kaka amidiki. Amavovo te g’ôtôe wedi.

²² Vamakunduga Jésus g’ôwa, aneengie amabangôa éne émavovo angô gôébégô éotôe wedi na asitsumédô Matendeo MaNzambé na mavovia maJésus paga.

Jésus asabômu éne éndé gô môtéma amôma

²³ Gô ndéô éasueti éaPâque, Jésus amadenganô gô Jérusalem. Ayekani ameetsa angô mitémamie miaô gômeenahngô mane mamayanza Jésus mamisôba matsapéô môma na masoongôa angô ésupua.

²⁴ Géé amuene Jésus amatsuma oma paga gôébégô asibômuku mbe: Omeaa asiitsa na gô pie mitéma miaô.

²⁵ Jésus asibuté étubédu na môma minongomie miaô. Amuene amamenyaka mane magô mitéma miaô.