Jean 18 - New Testament in Mitsogo

Jésus amatsôpu (Bono na Matt. 26:47–56 )

¹ N’emana énigôa aneengi edi mabégôme, Jésus amakea n’ahngô ahmaabôga muanee ambéyi ééndô mbe Cédron. Gômaba tsaga éasuadô. Jésus n’aneengie ahmakea na wangô.

² Judas, ône amavanga gôékaba Jésus, asibômu tsaga nene. Te tungune émadunda Jésus n’aneengie kuku yetso.

³ Na Judas dôta amabuéa gô tsagane. Amaviga na géômbé gévôni samigode miatsenge, na dôta mivo migode mimeetsô angô na tsesu yadeekedi adigondoku n’Apharisien. Migodemie miangô mimabaka gôékenea eba aNzambé. Ivô Judas amamiitsô mbe: Kiaka na miangô mietso. Géômbége setso gémakea na ékeeyie yaô na koa yaô yaviyô na midodi miaô.

⁴ Jésus asibômu mbe: panda yedi yetso dingabuéa te gôndé me. Amawesea na vandé géômbége samigode na ameevôa ahngô mbe: ?Anye nôbuta nda?

⁵ Migodemie amanikéda angô mbe: We tôbuta te Jésus, môsi Nazareth. Jésus angô mbe: Nangôô. Amuene Judas, môkabine aJésus amadenganô vangô na migodemie.

⁶ Vamamema Jésus mbe: Me nangôô, migodemie mimanika mangima ngima, na mimakuéa na va tsina.

⁷ Jésus amoomba éévôa ahngô mbe: ?Anye nôbuta nda? Migodemie mimaabéa mbe: We tôbuta te Jésus, môsi Nazareth.

⁸ Jésus amanigôa ahngô mbe: Me namani énôbeenda mbe te me ôdôô. Okô mbe nôbuta te me, tambô bongoni te me. Tsikani avo akiaké.

⁹ Gô ébégôe éne gômeenanô éne émavovo Jésus na Nzambé mbe: Va gatse ane ameetsewe me Téta, me tsidimbanédé ta na môvo.

¹⁰ Simon Pierre amabaka na yenga. Amamiyuua gô kôtô na amakitsa éatôe éagéeyo gémôgôô samômane ééndô mbe Malchus. Mômôgôô nône te môyanzine apene adeekedi adigondoku.

¹¹ Jésus amadékéda Pierre mbe: Nikéda yengane yoo gô kôtô. ?Gébunguge samaguga gémeetsô me na Téta tambô tsangagényua-a?

Jésus ameesédu na Anne

¹² Géômbé samigode na môtômine waô, na migôdemie dôta miAjuif mimatsôpa Jésus na mimamôkata mogome.

¹³ Mimakea na Jésus na gôndé Anne. Anne te ôgoyi ômôgôô apene adeekedi adigondoku muetso. Pene émabaka gémage géne, te Caïphe.

¹⁴ Tambô te amuene Caïphe amoongô peeye yAjuif ndongi mbe: Enyepa mbe môma môvo awa gôndé wa n’anyô muetso.

Pierre amatôna Jésus (Bono na Matt. 26:69–70

¹⁵ Simon Pierre na muene môneengi môvo amaanda Jésus gô ngima. Môneengi môvo amamenyanganô na pene adeekedi adigondoku. Te gamasingéô angô amuene gôéengéa kukepo na Jésus na gô môkii agô gatse eba ômadigaa pene éne.

¹⁶ Pierre amasanéa gô mbadi va kôbangô ombaa. Vane môvo moneengi, ône amamenyanganôni amavovo na môgetone, môkenene ombee mbe: Indaa ôdôô eengéa. Na Pierre ameengéa.

¹⁷ Môkenene ombaa ameevôa Pierre mbe: ?Ewe kaka môvo môneengi amômôgôô nône-a? Pierre amatôna mbe: Aé, kaka meôô.

¹⁸ Na pitsi nene émabaka na sodi. Ayanzie na migodemie amadumua gébéké gô môkii. Amabaka gôéôkô épiô va kôbangô asoto. Na Pierre amabaka n’ahngô gôéôkô épiô.

Pene adeekedi adigondoku amatsundéda Jésus (Bono na Matt. 26:59–66 )

¹⁹ Pene adeekedi adigondoku amatsundéda Jésus gôndé aneengie wedi na gô meekédume mameekédangô.

²⁰ Jésus amamônigôa mbe: Mane mameekéda me, namamavovo v’ekanga va mbene oma muetso. Nameekéda mangô kuka yetso gô yeba yewanyéô na gô yeba yaNzambé gôwanya Ajuif muetso. Me tsivové éav’esooe.

²¹ ?Otsundéda me gô éne émavovo me nayee? Ivôaka te ane amookôni. Asabômu mane mameekéda me ahngô muetso.

²² Vamavovo Jésus nane, môgode môvo amabaka va kôbangô edi amamôbômôa gébôdé. Angô mbe: ?Ewe ôaabéa pene te nane-a? Omôenza te eenzaga.

²³ Jésus amamônikéda mbe: Okô mbe me tsimenya évovo, tubéda me éne ééndi me ébévani. ?Okô mbe navovi kuanakue, ôbômôi me gôndé?

²⁴ Anne amakudéga Jésus agébaka na podiye, na gôndé Caïphe, pene adeekedie muetso adigondoku.

Pierre amoomba étôna Jésus (Bono na Matt. 26:71–75 )

²⁵ Vamabaka Jésus gôétsundédu, Pierre asinôtôgé va gébéké vamabakangô gôéôkô épiô. Môma amamôévôa mbe: ?Ewe kaka môvo va gatse aneengie amômôgôô noo? Pierre amatôna mbe: Aé, kaka me.

²⁶ Môyanzi môvo apene adeekedi adigondoku amabono Pierre. Môyanzi nône te kindene amômôgôône amakitsô na Pierre éatôe. Angô mbe: ?Tambô tsigôena n’edi gô tsaga éviga we-a?

²⁷ Ivô Pierre amoomba étôna mbe: Aé, ôsiene me n’edi. Tsina na tsina tsôsône émakôka.

Jésus amatsundédu na Pilate (Bono na Matt. 27:1–2 11–14 )

²⁸ Oma amanôtôga na Jésus gô eba aCaïphe, pene adeekedi adigondoku. Amakea n’edi na gô eba amôtômine atsenge atsundéda oma. Emabaka n’ôngôngôe wetso. Ajuif asiengéé anguene gô ebee ône kabaga ookua mige na kabaga asabôngama gôéaa suetine éaPâque.

²⁹ T’ebandô Pilate amakusa na gôndé ahngô. Ameevôa ahngô mbe: ?Anye nôsunda mômôgôô noo gôndé?

³⁰ Oma amamônikéda mbe: ?Angô mbe asaba môma môbévani, we mbe tôvigi n’edi na vandé éwe-a?

³¹ Vane Pilate amavovo n’ahngô mbe: Bongoni angô anyene. Tsundédani angô gô mabégô manyô. Ajuif amamônikéda mbe: Gôndé we Ajuif te môge gôéyohéda môma.

³² Gô ébégôe édué gômeenanô mavovia maJésus mamônongoe owa ôngawa angô.

³³ Pilate amanika éengéa na gô ebedi ôtsundédu oma. Amabambéa Jésus gôéwesea na amamôévôa mbe: ?Ewe te môtômine aAjuif-a?

³⁴ Jésus amamôévôa dôta mbe: ?Ovovi nane te gô matasa momuene, vo te mane mookiô éwe n’ene oma-a?

³⁵ Pilate amamônikéda mbe: ?Me Môjuif-ma? Eongo éoo na tsesu yadeekedi adigondoku te eetsi éwe na gôndé me. ?Oéndi ndé?

³⁶ Jésus amamônigôa mbe: Okumu ami ôsaba gô tsengene. Okumu ami mbe ôndé gô tsengene ayanzie wami mbe eendi ébadi kabaga nakabô na gôndé peeye yAjuif. Ivô ôkumu ami ôsaba ava tsina.

³⁷ Pilate amamôévôa mbe: ?Tambô éwe te môtômine-a? Jésus amamônikéda mbe: Otsimi. Me te môtômine. Namabôtu na namaviga na gô tsengene me te mbangine éaKumu amabégô mapie. Muetso andé gô mabégô mapie ookéô ôgie wami.

³⁸ Pilate amamôévôa mbe: ?Mane mapie, mandé? N’emana évovo nane, Pilate amoomba ékusa gô ebedi gôévovo n’Ajuif. Angô mbe: Me tsiena ébégôe mbe mômôgôône ôdôô ayôhu.

Jésus ameesédu gôéyôhu (Bono na Matt. 27:15–31 )

³⁹ Ivô gô gésima sAjuif, sueti yetso yaPâque nanônzeegedéa môma môvo, môsi gô tsôgôô. ?Nônyôngéô mbe nanônzeegedéa mômôgôône ôdôô, môtômine wanyô Ajuif-a?

⁴⁰ Vane géômbége gémaadôngana na ngudi yaô yetso mbe: Aé, kaka ône. Kusédea we Barabbas. Tambô Barabbas te môsi môkôbé.