Jean 16 - New Testament in Mitsogo

¹ Nanôévédi mabégô mema te kabaga mitéma mianyô minika gévii vangeenanye mangô mabuéa anye géévédu.

² Oma anganôpatsa gô yeba yewanyéô. Gô ndéô divigani oma anganôyôha na angeenda mbe: Gôyôhi we môma nône, we tôyanzéyi Nzambé ébégô éamôsôba.

³ Angeenda nane, te gôsamenyahngô me na gôsamenyahngô Téta.

⁴ Me nanôévéda mabégô mema te mbe vangeenanô mangô mabuéa, nôsangatsapéô. Nôngabangôa mbe: Ii, tômookô mangô. Jésus amatôévéda te nane. V’ebandô tsinônigôé metso mane, gôébégô memuene namabaka vavo n’anyô.

Ene éngeenda Gédidi SaNzambé

⁵ N’atsatsee me te keagane. Nakebuéa gôndé ône amatôma me. ?Anye nôsanyôngéô émenya gôkea me-a? ?Ta na môvo eevôa me mbe: Okea na gôni?

⁶ Neena mbe anye nôndé ti na mitéma miditani gônôévi me mbe, namahkea.

⁷ Me nanônigôa ébégô éapie édué. Bangôani éangô. Gébatéô sami na g’ôba te ébégô éamôsôba gôndé anye. Okô tsibata, Môwedi mbe asangaviga na gôndé anye. Okô vakea me, nanganôkudégéa Môwedi.

⁸ Vangavigangô angamenyeda asi tsengene mabégô mamabômédu ahngô. Ahmabômédu te gô mabégô mema; gôémenya éne ééndô mbe ébéva éamôma na éne ééndô mbe étsimama ényôngéô Nzambé, na ébégôe éamôtsundu oma na Nzambé.

⁹ Môwedi angamenyeda oma gô éne ééndô mbe ébéva éamôma te gôseetsa oma me mitéma miaô.

¹⁰ Angamenyeda oma ébégô éetsimama ényôngéô Nzambé te gôkea me na gôndé Téta na anye nôsangoomba éena me.

¹¹ Angamenyeda oma ébégô éamôtsundu aNzambé gôébégô môtômi atsenge nedué amani éesédu.

¹² Nagébaka na mabégô mayekani gôénôbeenda ivô deo noo nôsangoongôa ésipa gôémenya mangô metso.

¹³ Vangaviga Môwedi, angô te Gédidi gépandôéda mabégô mapie, géngatévéda anye gô mabégô metso mapie manzéane éaNzambé. Gésangavovo g’ogi edi, ivô géngabeenda anye metso mookô sangô. Génganôkeneda gô mabégô mangabuéani.

¹⁴ Génganeegeda me gôngabongo sangô mabégô gô mane mami gôénôbeenda mangô.

¹⁵ Metso mandéké na Téta mandéké n’ami. T’ebandô neendi anye mbe Gédidi SaNzambé géngabongo mavo mabégô gô mane mami gôénôbeenda mangô.

Gévôé sadeo noo géngakoga géka gényônga

¹⁶ Eva na va pesu andéô nôsangadô eena me. Ivô va mbenene vane gô pesu andéô tôngoomba éenana.

¹⁷ Avo va gatse aneengi edi amavovo anguene n’anguene mbe: ?Ene ébégô ékegea nayee? Jésus avovi mbe: Eva na va pesu andéô nôsangadôena me. Ivô va mbenene vane gô pesu andéô tôngoomba éenana. Na angô dôta mbe: Te gôkea me na gôndé Téta.

¹⁸ Beendangô mbe: Eva na va pesu andéô, we tôsookô éne évovo angô. ?Ekegea nayee?

¹⁹ Amuene Jésus gébômu mbe aneengie atsapéô na asookô. Vane Jésus amapandôéda ahngô mbe: Nanôévédi mbe, éva na va pesu andéô nôsangadôena me. Ivô va mbenene vane gô pedu andéô tôngoomba éenana. ?Nôévôana anyene n’anyene te gô éne-a?

²⁰ Nanôbeenda na gô pie mbe nôngadéa na gégeba, na nôngadigaa na gésiganinga. Ivô asi tsengene angaba gôétsôkéa. Vane gésiganingage sanyô géngakoga géka gényônga.

²¹ Ebégôe édué égono na môgeto abôtani. Vookô angô misongomie, môtémedi ôsangaba na gényônga gôébégô asabômu mbe: Me naka gô maguga. Ivô vabôtangô muanee asakôngéda magugame mabaki n’edi gôébégô eeni muanee na amôtsôkéa.

²² Gôndé anye te mônongovo. Anye deo noo nôsaba na gényônga. Ivô nyee ôngatôomba éenanani, mitéma mianyô mingatsôkéa na gényônga gévôni gésangoongôa môma énônôtôa.

²³ Nyoone, anye nôsangadôtsapéô ébégô gôéévôa me nyivô. Nanôbeenda na gô pie mbe Téta Nzambé anganôétsa metso mangamôdukanye gô inami.

²⁴ Ngu na ndéô nedué, anye nôsimôduka sôma gô inami. Dukani na nôngeetsô. Vane gényônga sanyô géngaba ti gésaba n’okana.

Gô ébadi éatsengene Jésus amamana éediia

²⁵ Jésus amavovo n’aneengi edi mbe: Me nanôékédi mabégô mema mayekani gô tsava. Gô ndéô évigani tsangoomba énôékéda gô tsava. Gô ndéô nene nanganôsuméa te supuéa na vede mane maTéta.

²⁶ Gô nyoone nôngavovo anyene na Téta gô inami gébé na me gékambige sanyô.

²⁷ Menyami mbe amuene Téta anônyôngéô. Anônyôngéô gôébégô anye nônyôngéô me, na anye nôsatsuma me paga mbe tsivigé gôndé Nzambé.

²⁸ Me namaviga gôndé Téta gôétsiga na gô tsengene. N’atsatsee nanôtôgi gô tsengene gôénika na gôndé Téta.

²⁹ Aneengie amavovo na Jésus mbe: Vane tôôkiô gavovi éwe na vede nane, gébé gô tsava.

³⁰ Vane tôôkô mbe éwe ôsabômu ti mabégô metso. Ondé na ngudi yeaabéa nyivô, we gégôbambéé yangô. T’ebandô tôsatsuma éwe paga mbe ôsivigé gôndé Nzambé.

³¹ Jésus angô mbe: ?Tambô nôôkiô te n’atsatsee-a? ?Nôétsi me mitémamie, te n’atsatsee-a?

³² Oôkôni édué. Ndéône éngabuéa, na émani ébuéa, anye nôngapanzangana, môma na môma na gô wedi eba. Na nôngatsika me te memuene na koo. Eébéyée nane tsaba memuene, amuene Téta andéké n’ami.

³³ Namani énônigôa metso mane te mbe gétabége sanyô géngaba te gô évambee éndé anye n’ami. Gôgébakanye gô tsina, nôgébaka te gô panda. Ivô tsôkéakani na bôkédé. Gô ébadie égenyu gô tsengene, me namani éediia.