Jean 14 - New Testament in Mitsogo

Jésus te nzéane étsiga môma na gôndé Téta Nzambé

¹ Jésus amavovo n’angeengi edi mbe: Nômbiaba na mikebanganô gô mitéma mianyô. Itsani Nzambé mitéma mianyô. Vane itsani na me miangô.

² Gô eba aTéta gôndéké édigaa éyekani. Me nakea gôénôkônzéa tungu. Mbe gôsaba nane, mbe tsinôbeenda nane.

³ Vangakea me na vangakônzéa me anye tungu nanganika. Nanganôbongo gômbe gôngaba me, n’anye dôta nôngaba wangô.

⁴ Anye nôsabômu gôkea me na nôsabômu nzéane étsiga môma na gôkea me.

⁵ Thomas amavovo na Jésus mbe: ?Ivô Kumu, we gémenye gôkea éwe tambô na nzéane tôngamimenya nayee?

⁶ Jésus amapandôéda ahngô mbe: Me te nzéane éanyô. Me te kumu amabégô metso mapie. Me te monyoe wanyô. Gôsaba nyene nzéa éôta môma na gôndé Téta, buétsé te vandé me.

⁷ Okô anye nôsibômu me, nôsabômu dôta te na Téta. N’anyedô nôsamôbômu, nômani émôena.

⁸ Philippe amavovo na Jésus mbe: Kumu, tubéda we gandé Téta Nzambé na vane tôsangadôbuta sene sôma.

⁹ Jésus amanigôa angô mbe: G’eedigéa me n’anye, vadingi. ?Ewe Philippe madeo ôsimenya me-a? One ameena me, ameena na Téta. ?Nayee ôôngôa éénda me mbe tubéda we gandé Téta Nzambé?

¹⁰ Tambô ôgétsumaka paga gôénda me mbe me nandé môvo na Téta. Na Téta dôta andé môvo n’ami. Metso mavovo me n’anye muetso, kaka mamemuene. Téta, ône andé môvo n’ami, adugéda te mane manyôngéô angô.

¹¹ Nômbiatsuma me paga vavovo me mbe me nandé môvo na Téta. Na Téta dôta andé môvo n’ami. Okô anye nôsoongôa étsika pagaye yanyô gô mane mavovo me, tambô tsikani pagaye yanyô gô mane mamisôba mayanza me.

¹² Me nanôbeenda na gô pie mbe, ône eetsa me môtémedi wetso, angeenda mane mamisôba meenda me. Angeenda na mavo mabégô mangootéa mane mami na ngudi gôkea me na gôndé Téta.

¹³ Ene édukanye me gôéénda, me nangeenda gômbe Téta angakumédu gô ina aMuanedi.

¹⁴ Okô anye nôduki ébégô gô inami, me nangeenda éangô.

Jésus amavanga gôékudégéa oma Gédidi SaNzambé

¹⁵ Okô nônyôngéyiô me, nôngeenda te éne étôma me anye.

¹⁶ Nangaduka Téta gôénôtôméa muene môwedi asanganôtôga gôndé anye. Môwedine ône te Gédidi gétsutsuéda mabégô mapie maNzambé.

¹⁷ Asi tsengene asangagédiia gôébégô asaba na ngudi yegéena na asangoongôa égémenya. Géé anye, nôngagémenya gôébégô sangô, Gédidi gétsutsuéda mabégô mapie géngaba n’anyô na géngadigaa gô mitéma mianyô.

¹⁸ Me tsanganôtsika tsani. Nangoomba éviga na gôndé anye.

¹⁹ Eva na gô vipesu viandéô asi tsengene asangadôena me. Géé anye, nôngeena me. Gôndé me na monyo, tambô n’anye dôta nôngaba na monyo.

²⁰ Gô nyaa ôvigani ône, anye nônganigôgéô mbe me Jésus nandé gôndé Téta. Na anye nôndé gôndé me. Me dôta nandé gôndé anye.

²¹ Okô môma atanganéda mane mamatôma me, na amagobeda, vane namenya mbe môma nône anyôngéô me na avamba n’ami. Vanyôngéô angô me, anganyônganéô dôta na Téta. Na me nangamônyôngéô te mônongovo. Na nangatsutsuga te gôndé angô.

²² Môneengi môvo inedi Jude, (kaka Judas Iscariote) ameevôa Jésus mbe: ?Kumu ékegea nayee? éne évovi éwe mbe: Nangatsutsuga te vandé anye, kaka vandé asi tsengene.

²³ Jésus amanigôa mbe: Okô môma anyôngéyiô me angagobeda éne évovo me. Téta angamônyôngéô. Vane wa na Téta tôngaviga na gôndé angô gôédigaa gô môtémedi.

²⁴ Mômane asaba n’evamba n’ami na asanyôngéô me, asangamenya égobeda éne évovo me. Ene éôkô anye me navovo ésabandôa na memuene, éviga te gôndé Téta, ône amatôma me.

²⁵ Nanônigôa mabégô mema te gôgébaka me n’anyô.

²⁶ Môwedine wanyô te Gédidi SaNzambé, géngatôméô anye na Téta géngaviagana me. Génganôéékéda na génganôbangôéda metso mameekéda me anye.

²⁷ Me nakeyi. Ene étsikéa me anye te gétabé sami mbe géngaba gô mitéma mianyô mbe nôngaba na mitéma mimasumani. Géne sami gétsikéa me anye gésagono na géne satsenge nedué. Nombiaba na mikebanganô gô mitéma mianyô.

²⁸ Nômani éôkô éne émavovo me n’anye mbe me nakeyi, ivô nangoomba éviga na gôndé anye. Anye mbe nômanyôngéô me na gô pie, anye mbe nômatsôkéa na gényônga setso vookô anye mbe Jésus akea na gôndé Téta, gôébégô ngudi ya Téta diôtéa dine yami.

²⁹ Me nanôévédi mabégô mema, mangô madeo masibuéa te mbe vangeenanye mangô mabuéa, kabaga anye nômatsuma paga.

³⁰ Tsangadôvovo mayekani n’anye. Tsesune, ône atôma tsinane avigi. Otômue wedi ôsatôma me.

³¹ Eébéyée nane, buedi mbe asi tsinane muetso eena ganyôngéô me Téta gôgobeda me éne ématômu me na Téta. Timôgani. Tônôtôgéni éva.