Jean 13 - New Testament in Mitsogo

Jésus amoovôa makôdôme maneengi edi

¹ Emabaka te nyee ômabambana na sueti éaPâque. Jésus asibômu mbe, ndéône ébuéyi gôndé angô gôénôtôga gô tsengene na gôékea na gôndé Tétedi. Bandôa v’ebandô môtémedi ômanyôngéô omee wedi ava tsina. Gényônganéôge géné gésinôtôgé ngu na v’ekôdéô.

² Jésus n’aneengi edi amaba va tabudé gôéaa. Yabédé amamana éétsa Judas Iscariote, muana aSimon étasa mbe akabé Jésus.

³ Amuene Jésus asibômu mbe: Me namatimôga g’ôba gôndé Nzambé gôéviga na gô tsina. Me nanganika na gôndé Nzambé. Eetsô éndéké gô tsina eenyangee émeetsô me na Nzambé.

⁴ Jésus amatimôga va tabudé. Amasasa ngôene yedi épôni. Amabongo saté samôkanda gôéditéga v’oninge edi.

⁵ Vane ameetéa meba gô kuveti. Amasôndomo gôéôvôa makôdôme maneengi edi. Amamakôbôa na môkanda ômabaka ditéga v’oninge edi.

⁶ Jésus amabuéa na vandé Simon Pierre gôémôôvôa makôdôme. Simon angô mbe: ?Kumu, na gô pie ôngoovôa me makôdôme, ti éwe-a?

⁷ Jésus amamônikéda mbe: Ewe, deo noo ôsamenya éne éyanzéa me éwe, ivô ôngamenya gô mbene.

⁸ Pierre amakina mbe: Aé, kaka éwe ôngoovôa makôdôme mami. Jésus amamônikéda mbe: Okô ôsisinga me gôégôôvôa ôsabadô n’evamba n’ami.

⁹ Simon Pierre amavovo na Jésus mbe: Okô mbe éndé nane, tambô ésangakôdéa na makôdô matévo. Kumu, ôvôa me na mogome na môtsée wetso.

¹⁰ Jésus amamônigôa mbe: One amani éookéani asabutadô éôvôu, buétsé te makôdô matévo, gôébégô ôtôe ômani égôgéa. Anye nôndé nômagôgéani, ivô kaka muetso.

¹¹ (Jésus asibômu ône angamôkabani, t’ebandô ameenda mbe: Nôsaba muetso nômagôgéani.)

¹² Vamamanangô éôvôa aneengie makôdôme, Jésus amaata ngoyine yedi. Amadigaa n’angô va tabudé. Na angô mbe: ?Anye nômenyi événdégéôé éene ééndi me anye éne-a?

¹³ Anye nôneegeda me mbe: Môékédi asô, na kumu asô. Ii, nôvovo na mitayi. Me te môékédine wanyô na kumune yanyô.

¹⁴ Tambô vandé me môékédi na kumu, nanôôvôi makôdôme, anye dôta ôôvôanani anyene n’anyene mane manyô.

¹⁵ Me namani énôtubéda, tambô anye indaani tsingayi gô éne ééndi me.

¹⁶ Nanôbeenda na gô pie mbe: Gôsaba môyanzi ootéa kumune yedi. Na ône atômuni asootéa ône amôtômani.

¹⁷ Anye nômani énigôgéô ébégô édué. Okô nôéndi éangô nôngaba na gényônga.

¹⁸ Me tsavovo gôndé anye muetso. Tsabômu ane amasevôu na me. Menyani mbe mane manigôa Matendeo MaNzambé mangeenanô. Mangô mbe: One amaa tabudé épo n’ami, te ône amagéngôga gôékékôa me.

¹⁹ Me nanôévéda ébégôe madeo ésibuéa. Na vangabuéa éangô nôsangadôétsuma paga gamanigôa me anye gômaviga me, na gôkea me na gandéké me.

²⁰ Me nanôbeenda na gô pie mbe ône avamba na mômane amatômu na me, avamba te na me namamôtômani. One avamba na me, avamba dôta na môtômine wami.

Jésus ameevéda gangakabô angô na Judas (Bono na Matt. 26:20–25 )

²¹ N’emana évovo ébégôe, Jésus amaba na môtéma ôditani. Amavovo mbe: Nanôbeenda na gô pie mbe va gatse anyô gôndé môvo angakaba me.

²² Aneengie amabonono anguene n’anguene géôngôé émenya ône angamôkabani.

²³ Môneengi môvo, ône amootéa Jésus ényôngéô, amabaka digaa va kôbangô aJésus.

²⁴ Simon Pierre amamôsombeda gôéévôa Jésus mbe: ?One avovo éwe indaa?

²⁵ Môneengi nône amatengama na va mbôma aJésus gôévovo n’edi mbe: ?Kumu, ône avovo éwe indaa?

²⁶ Jésus amanigôa mbe: Nangatsuéta gébéndéké samôpemba gô mabunza. One angeetsô sangô, môkabine te angô. Jésus amabukua gébéndékége samôpemba na amagétsuéta gô mabunza. Ameetsa sangô Judas, muana aSimon Iscariote.

²⁷ Vamedeka Judas gébéndékége géne, Satan ameengéa gô môtémedi. Jésus amavovo n’edi mbe: Ene éndé n’ewe gôéénda, suméaka indaga.

²⁸ (Muetso amadenganô n’edi va tabudé ta na môvo amamenya éne émavovo Jésus nane.

²⁹ Amamenya mbe Jésus amatôma Judas, môkenene adode mbe: Kiaka ôkésômba éne ébuta we éaa gô suetine. Avo dôta amamenya mbe atômi Judas, môkenene adode mbe: Kabé misuga yangô.)

³⁰ Judas amadeka gébéndéké samôpemba na amakusa pitapita. Emabaka te na pitsi.

Môtôma awene mônongo

³¹ Vamakusa Judas, Jésus amavovo gô ngimedi mbe: Ti n’atsatsee nôngeena ôkumakee wami, me Muana Amôma na ôbébayi ôtubéda géneegage sondômba aNzambé ôngeenanô gôndé me.

³² Okô mbe ôndômbee aNzambé ôngeenanô gôndé Muana Amôma tambô na ône aMuana ôngeenanô gôndé Téta Nzambé. Ongeenanô ti n’atsatsee.

³³ Anami, nagébaka vavo n’anye te vipesu viandéô. Ene émanigôa me Ajuif, nanônigôa éangô te mônongovo. Nôngabuta me ivô gôkea me anye nôsangagôbuéa.

³⁴ Me nanôtsikéa môtômee ôdôô. Nyônganéôni anyene n’anyene. Mônongovo ganyôngéô me anye, anye dôta nyônganéôni.

³⁵ Nôngamenyanganô n’oma muetso mbe aneengie aJésus te gônyônganéô anyene n’anyene.

Jésus ameevéda gétônéô saPierre (Bono na Matt. 26:31–35 )

³⁶ Simon Pierre ameevôa Jésus mbe: ?Kumu ôkea na gôni? Jésus amamônigôa mbe: Gôkea me, éwe ôsangabuéa n’atsatsee. Ivô ôngaanda me gô ngima.

³⁷ Pierre amoomba angô mbe: ?Kumu nayee ôéndi mbe: N’atsatsee ôsangabuéa wangô? Me tseena panda gôéétsa monyoe wami mbe nawa gôndé éwe.

³⁸ Jésus amavovo na Pierre mbe: ?Na gô pie ônyôngéô éwa gôndé me-a? Nagôbeenda na gô pie mbe tsôsône n’egékôkaka, éwe Pierre ôngatôna me kuka ditatô mbe: Me tsamenya angô.