Jean 12 - New Testament in Mitsogo

Marie amasôga môyombo gô makôdô maJésus (Bono na Matt. 26:6–13

¹ Gômasanéa pitsi môtôba na gô suetine éaPâque. Jésus amakea na gô Béthanie. Te mbôkane émadigaa Lazare, ône amakunduu na Jésus g’ôwa.

² Wangô amadigaa va tabudé gôéaa môyakôe ômayanzéô angô na Marthe. Lazare amabaka n’ane amaaka na Jésus va tabudé.

³ Marie amaviga na mbuti éamôyombo ôtétu mbe nard ôndé ôsunu ôvôni. Ameetéa angô gô makôdô maJésus. Na amamakôbôa na tsôgéye yedi. Ebee wetso ômaba mbônga éamôsôba éamôyomboe ône.

⁴ Môneengi môvo aJésus inedi Judas Iscariote, te ône angakaba Jésus, amasemba môgeto nône mbe:

⁵ ?Môyomboe ôsisômbéduku ôsunu ôvôni nayee? Dodeye dine dikiaka dikéétsô misuga.

⁶ Asivove nane gô ngeba dimeenangô misuga. Amavovo nane te gômabakangô môkenene agébémbége sadode. Gôndé angô muisui ameesua éne émakuyu gô sangô.

⁷ Jésus amasungéa môgeto nône mbe: Tsikani angô. Nabaké na môyomboe ône ngu na vangagunyu me gô ngii.

⁸ Misugamie mindéké n’anyô pitsi yetso. Ivô me tsangaba n’anyô pitsi yetso. Ivô me tsangaba n’anyô pitsi yetso.

Oma amavangéa Lazare gépangô

⁹ Géômbé gévôni sAjuif amookô mbe: Jésus aka gô Béthanie. Amaviga gôémôena ivô kaka gôndé Jésus môtévo. Te na gôéena Lazare gômookô ahngô mbe Jésus amamôkundua g’ôwa.

¹⁰ Tsesuye yadeekedi adigonduku amavanga gépangô gôéyôhéda dôta Lazare.

¹¹ Ahmeenda nane gôébégô Ajuif ayekani amanôtôga vandé tsesuye yaô na ameetsa Jésus mitéma miaô gôébégô éaLazare.

Jésus amakea na gô Jérusalem (Bono na Matt. 21:1–11 )

¹² Ovo inyaa ône, géômbé gévôni sane amaviga gôétsôkéa suetine éaPâque amookô mbe Jésus atsigi gô Jérusalem.

¹³ Amakitsa dada yeekadi gamabaka gésima saô seneegeda môma. Amakea na yangô gôéwanyeda Jésus na émbô mbe: Tôneegedéni Nzambé. Te mbe mate maNzambé mabaké gôndé môtômine avigi gô ina aKumu. Te mbe mate maNzambé mabaké gôndé ône avigi gôétôma éongo éaIsraël.

¹⁴ Jésus amabongo nyama ééndô mbe âne na étsua môma. Na amadigaa gô yangô. Te gatôtanga gô Matendeo MaNzambé mbe:

¹⁵ Nômbieena gomo anye asi môsenge aSion Bononi Kumu anyô avigi na gôndé anye. Andé digaa gô môpaga anyama ééndô mbe âne.

¹⁶ Aneengi aJésus amatsapéô gôsinigôgéô ahngô mane mamabuéani. Ivô gô ndéône émanika Jésus na g’ôba, ahmabangôa éne émanigôa Matendeo MaNambé gôndé Jésus na amabangôa dôta na éne émeendéa ahngô Jésus nyoone.

¹⁷ Muetso ane amadenganô vamabambéa Jésus Lazare gô ngii gôémôkundua, ahmanigôa akaô mane mameenahngô.

¹⁸ T’ebandô géômbé gévôni gémakea gôéwanyéda Jésus vamatsigangô gô Jérusalem. Ahsibômu mbe, ôdôô te ône amatubéda gémbégéa gévôni sangudi yaNzambé gôékundua Lazare g’ôwa.

¹⁹ Apharisien amavovo anguene n’anguene mbe: Aanakani gasingéô angô n’oma muetso. Wa n’anyô tôtsayi géôngôé émôénda ébégô.

Agrec amanyôngéô éena Jésus

²⁰ Gôndé ane amaviga na gô Jérusalem gôéneegeda Nzambé na gôétsôkéa suetine, gômadenganô n’avo asi éongo éaGrec.

²¹ Amaviga na gôndé Philippe môsi Bethsaîda mbôkane éndé gô Galilée. Amavovo n’edi mbe: Waé, we tônyôngéô éena Jésus.

²² Philippe amakea gôébeenda André. Vane ahngô muetso abaé amakea gôénigôa Jésus.

²³ Jésus amasupua ahngô mbe: Ndéône ébuéyi gôndé me Muana Amôma gôéétsô ôkumakee wetso.

²⁴ Me nanôbeenda na gô pie mbe éso éapôtô, ôkenea éangô gégaabô gô toto éngabaka môbô te éso évo. Ivô ôkô égaabiô gô toto éngaboo na éngakanda gôébôta pingô yamiso.

²⁵ One anyôngéô ékenea monyoe wedi gôédômbéa n’angô, angaôdimbanéda. Géé ône avinga monyoe ôdigaa n’edi gô tsengene angaôkenea môbô na môbô.

²⁶ One anyôngéô éyanzéa me, akéé n’ami nzéepo. Na tungune éngaba me te éne éngaba môyanzine. Téta agobeda ône ayanzéa me.

Jésus ameevéda ôwee wedi

²⁷ Jésus amavovo mbe: Môtémami ôdita te ditaga. ?Nangeenda nayee? ?Nangoongôa éénda mbe: Téta yuua me gô éne éka gô buéaga-a? Ka me, namaviga te gô éne. Namaviga te gôéengéa gô ndéô nedue éamaguga na gôéôta gô mangô.

²⁸ Ah Téta mbe inee éoo éneegedu. Ogie ômookanô ôvovo g’ôba mbe: Namamana éétsa inee éami géneega sondômbee wetso. Na éngoomba ékumédu.

²⁹ Géômbége gémabaka wangô gémookô ôgie ôvovoni. Avo amanigôa mbe: Nôôkiô, te môdumu ôkungani. Avo dôta amavovo mbe: Te môsi g’ôba amavigédu na Nzambé gôévovo n’edi.

³⁰ Vane Jésus amapandôéda ahngô mbe: Ogie ômookanôni, kaka gôndé me, ivô te gôndé anye.

³¹ Ndéône éetsundéda asi tsengene ébuéyi. Ndéône éepatsa kumu atsenge nedué ébuéyi.

³² Jésus angô mbe: Ivô me, vangatômbu me na va gatse atsina n’oba, nangaweseda oma na gôndé memuene.

³³ Gô mavoviame mane, Jésus amapandôéda omee mônongoe owa ôngawa angô.

³⁴ Oma amamôsugéga mbe: Tômookô gô miganda mimatsikéô we mbe, Christ ône angatômu na Nzambé asangawa. ?Ewe voo ôénda mbe Muana Amôma angatômbu va gatse atsina n’oba nayee? ?Muana Amôma indaa?

³⁵ Jésus amanigôa ahngô mbe: Gô vipesu viandéô, gévedege gégébaka gôndé anye. Nangakani gô sangô, gégébaka gôénôtanéda nzéa, kabaga évitsie étsôpa anye. One ananga gô tsina evitsi asamenya gôkeangô.

³⁶ Itsani mitéma mianyô na gô gévedege sami, nôgébaka na sangô. Na vane nôngaba asi gévede. N’emana évovo nane, Jésus amakea gôésomo gôdagôda n’omeaa.

Ajuif amatsuma Jésus paga

³⁷ Buéyé gameenda Jésus mabégô mayekani mamisôba mangudi yaNzambé mamatsapéô oma, ahngô asimookéô.

³⁸ Mane mamabeenda Esaïe, môpandôédi amatasa maNzambé mameenanô. Amatenda mbe: ?Kumu, ône amookô meekédu masô indaa? ?Ngudi yakumu dimatubédu ndaa?

³⁹ Oma asiôngôé énôtôga gô paga yaô. Te gamatenda Esaïe mbe:

⁴⁰ Nzambé ameeméda oma miso maô, Kabaga miso maô meenéa, Na kabaga mitéma miaô minigôgéô, Na kabaga akoa matasa maô gôéneegeda me Mbe nadôngéda ahngô.

⁴¹ Esaïe amapandôéda mabégôme mane te gômeenangô ôbébayi ôtubéda ôndômbee aNzambé na amanyôngéô émôkuméda.

⁴² Buéyé nane, peeye yAjuif ayekani asitsumé Jésus paga. Ivô asiôngôé émema mbe: Tôsatsuma Jésus paga, kabaga apatsô na Apharisien gô eba agéwanyéô.

⁴³ Amootéa ényôngéô ékumédu n’oma na asinyôngéô ékumédu na Nzambé.

Ogi aJésus ôtsundéda oma

⁴⁴ Jésus amanigôa mbe: One eetsa me môtémedi wetso, asiitsa gôndé memuene môtévo. Eetsi te na gôndé ône amatôma me.

⁴⁵ One eena me, eena dôta na ône amatôma me.

⁴⁶ Me namaviga na gô tsengene gôéba gévede sanyô, gômbe muetso eetsa me mitémamie gébé na paga, asangadôdigaa gô évitsi.

⁴⁷ Ane ookô mane mavovo me, na asagobeda mangô, kaka me nangamôesédani. Me tsivigé gôéeséda asi tsengene. Namaviga te gôéyuua ahngô gô môtsundu.

⁴⁸ One akékôa me na mavovia mami, te mangô mangamôesédani. Meekédume mami mangeetsa môma ôési gô nyaa amôyusumédi.

⁴⁹ Menyani mbe me tsavovo gô ényangee éamemuene. Te Téta, ône amatôma me ameetsa me mabégôme mavovo me na meekéda me anye.

⁵⁰ Me tsabômu mbe mane matôma Téta te mangô meetsa môma monyo amôbô na môbô. Te geendi me mbe: Mane mavovo me, namavovo te gatévédu me na Téta.