Jean 11 - New Testament in Mitsogo

Owa aLazare

¹ Gômabaka mômôgôô, inedi Lazare. Amaaga na beeaga. Amadigaa gô mbôkane étetu mbe Béthanie. Te mbôkane émadigaa anayeedi Marie na Marthe.

² (Marie te môgetone amasôga makôdô maJésus na môyombo na amamakôbôa na tsôgéyé yédi. Môbeene Lazare, te ndôme edi.)

³ Marie na Marthe amakudéga ôgi na gôndé Jésus mbe: Kumu, weeoo abeea beeaga.

⁴ Vamookô Jésus ôgie ône amanigôa aneengi edi mbe: Beeagane éndé na Lazare, kaka éowa. Abeea nane te mbe Nzambé angakumédu gôngeenanô ngudi yedi. Muana ANzambé angakumédu gô éangô.

⁵ Jésus amaba n’evamba na Marthe na Marie na Lazare.

⁶ Vamookô Jésus mbe Lazare te beeagane, amoomba édigaa pitsi dibaé gômabakangô.

⁷ Vane amavovo n’aneengi edi mbe: Okani. Tônikéni na gô Judée.

⁸ Aneengie amavovo n’edi mbe: Môékédi, ôsabômu mbe madeo vasidinga gamabakewe mbe ôyôhu n’Ajuif na mataé. ?Yôénda mbe ôomba te énika na gône-a?

⁹ Jésus amanigôa ahngô mbe: Gô môsaa ôvo gôndéké nzima amaweda na maweda mabaé. Okô môma akénga, ômandee ôgébaka, asangapônga gôenangô gévedege gétanéda tsengene.

¹⁰ Ivô ône akénga na pitsi apônga gôsaba angô na gévede.

¹¹ Jésus n’enigôa nane, amavovo n’aneengi edi mbe: Wene éasô n’anyô Lazare eeboga vio. Me nakea nakémôtimôa.

¹² Aneengie amavovo mbe: Kumu, ôkô mbe andé gô vio, tambô adôngi.

¹³ Tambô viovie vimavovo Jésus te ôwa aLazare. Na aneengie amamenya mbe te viovie viebogu kuku yetso.

¹⁴ Vane Jésus amasupua na vede mbe: Lazare awéyi.

¹⁵ Vasidenganô wa n’anyô vabeeki Lazare, môtémami ôena gényônga gôndé anye, na éne éngeenanye. Anyedô, nôsangadôtsuma me paga. Okani na vandé angô.

¹⁶ Vane Thomas ône atetu mbe Evasa, amavovo n’aneengie n’edi mbe: Te nane, ôkani. Tôkeyôhu kukepo na môékédine wasô.

Jésus te gékundugéô sasô n’anyô na monyoe wasô n’anyô

¹⁷ Vamabuéa Jésus amookô mbe Lazare amagunyu. Aka pitsi dinayi gô ngii.

¹⁸ Béthanie na Jérusalem vasitongonéké.

¹⁹ Ajuif asi Judée ayekani amakea gôémogeda Marthe na Marie gô ebaô gôwéyiô ahngô muanayaô.

²⁰ Vamookô Marthe mbe Jésus atsigi, amakea gôémôwanyeda. Géé Marie amasanéa digaa gô eba.

²¹ Marthe amasemba Jésus mbe: Ah Kumu, mbe ômadenganôkô éva, ndômé ami mbe asiwa.

²² Eébéyée nane, tsabômu mbe Nzambé angagôaabéa gô éne émahduka éwe.

²³ Jésus amavovo na Marthe mbe: Ndômé éoo angakunduga.

²⁴ Marthe amasinga mbe: Ii, na gô pie. Tsabômu mbe angatimôga g’ôwa gô ndéône éamôyusumédu éngakunduga oma muetso.

²⁵ Jésus amamôpandôéda mbe: Me te gékundugéô sanyô. Me te monyoe wanyô. One eetsa me môtémedi wetso angaba na monyo buéyé mbe awéyi.

²⁶ One adôngani na eetsa me môtémedi gébé na paga asangatsiga gô tsenge éowa. ?Oôkiô gavovi me-a?

²⁷ Marthe amaabéa mbe: Ii, Kumu nookiô. Me tsatsuma éwe paga. Ewe te Christ, ône eenéôkô n’oma muetso mbe angaviga na gô tsengene. Ewe te Muana ANzambé.

Jésus amadéa

²⁸ Vamamanangô évovo nane, Marthe amakea gôébambéa muanayeedi, Marie. Amavovo n’edi tsôvisôvi mbe: Môékédi avigi. Agôbambéa.

²⁹ Vamookô Marie nane, tsina na tsina amakea pita na gôndé Jésus.

³⁰ Amadenga Jésus te madeo asitsiga na gô mbôka. Te agébaka v’etumba vamawanyedu angô na Marthe.

³¹ Ajuif ane amabaka gô eba gôémogeda ane awéyiôni, ameena Marie atimôga na akea pita, amamôaanda. Ajuif amamenya mbe akea na gô ngii gôédéa.

³² Vamakea Marie amadenga Jésus v’etumba. Amagudama na va makôdô medi na amavovo n’edi mbe: Ah Kumu, éwe mbe ômadenganôkô éva, ndômé éami mbe asiwa.

³³ Jésus ameena Marie adéa na Ajuif amaviga n’edi te ahdéa. Môtéma aJésus ômeena panda na ômadita.

³⁴ Ameevôa omee ane mbe: ?Nômôgunyi gôni? Ajuif amaabéa angô mbe: Kumu, viga ôviena.

³⁵ Jésus amadéa.

³⁶ Ajuif amavovo anguene mbe: Aanakani gamanyôngéô Jésus môwéne ône.

³⁷ Avo va gatse aô amamôtsundéda mbe: Angô amapôéda miso mamôsi pogu ?nayee amasinga Lazare mbe awa-a?

Lazare amakunduga g’ôwa

³⁸ Môtéma aJésus omeena panda na ômadita vamakeangô na gô ngii. Ngiine te édukue éamôdungutu émakukégu n’etaé évôni v’ombee.

³⁹ Jésus amatôma omee ane mbe: Kôngégani étaé. Vane Marthe, kadine éone awéyini, amasémana na amavovo mbe: Aé Kumu, g’egunyéô angô gôka pitsi dinayi. Aka na mbônga.

⁴⁰ Jésus amavovo n’edi mbe: Me tsigômanaka égôbeenda mbe ?ôkô ôsitsuma ngudi yami paga ôngeena ôndômba aNzambé ôsutuméa?

⁴¹ Etaé émakôngégu. Jésus amabôkaméa na g’ôba gôévovo na Nzambé mbe: Téta, nagôkuméda gôôkéyiô éwe me.

⁴² Gôndé memuene tsabômu mbe ôndé gôéaabéa me kuka yetso. Ivô n’atsatsee navovo n’ewe te gôndé omeaa aseti me adua, kabaga atsuma paga mbe tsitômu n’ewe.

⁴³ Vamamanangô évovo nane amaadôngana mbe: Lazare, kusa gône.

⁴⁴ One amawani amakusa gô ngii. Makôdô medi na mogo medi mamadipô na mikanda. Osôe ômeebedu na môkandee ômakatôkô môtsée. Jésus amatôma omee mbe: Tsôbôani angô. Tsikani angô akea.

Gépangô gémavangô gôéyôha Jésus (Bono na Matt. 26:1–5 )

⁴⁵ Gô géômbé sAjuif gémaviga gôémôgeda Marie, ayekani ameena éné émeenda Jésus. Amamôétsa mitéma miaô.

⁴⁶ Ivô avo Ajuif amakea gôénigôa Apharisien éne émeenda Jésus.

⁴⁷ Apharisien na tsesuye yadeekedi adigondoku amadigaa gô kundu éaô épôni gôévanga gépangô. Amavovo anguene mbe: ?Tôéndani nayee na mômôgôô nône? Angô aseendô gôéyanza mabégô manyônganéôni masoongôa môma ésupua.

⁴⁸ Okô tômôtsika gémôanza, muetso angamôétsa mitémamie gôékea géômbé gévo n’edi. Vane atômie wasô n’anyô asi Rome, angaviga gôépanzéda eba asô n’anyô aNzambé. Na ahngabunza éongo éasô n’anyô éetso, te gôndé mômôgôô nône.

⁴⁹ Môvo va gatse aô, inedi Caïphe, ameetsô ényangee gô gémage géne gôétôma adeekedie muetso adigondoku. Amasemba akedi mbe: Anye nôsamenya.

⁵⁰ Nôsookô gakegea ébégô édué. Enyepa mbe môma môvo awa gôndé wa n’anyô muetso, kabaga tsengene éasô nyetso ébunganédu gôndé angô. ?Nôôkiôa?

⁵¹ Tambô asivové nane gô ngudi yamiene. Gômaba angô pene adeekedi adigodoku gémage géne, amapandôéda étasa éaNzambé g’ôwee ôngawa Jésus gôndé Ajuif muetso.

⁵² Ivô kaka mbe Jésus angawa gôndé Ajuif atévo, te na gôndé asi mbumu éaNzambé muetso gô tsengeye yetso mbe ahngakôkégu évambevo g’ôtô ôvo.

⁵³ Bandôa nyoone atômie aAjuif amavangana gôéyôha Jésus.

⁵⁴ T’ebandô Jésus asinangédô v’ekanga vandé pingô yaAjuif. Amakea na gô mbôka étetu mbe Ephraïm ébambana na tsenge émagasani. Amadigaa wangô, angô n’aneengi edi.

⁵⁵ Suetine éaPâque étsôkéa Ajuif émabaka éka gôpégôpé. Oma ayekani amaviga gô tsengene nyetso na gô Jérusalem gô gésôga segôgéda yôtôye yaô, Pâque madeo ésibandôu.

⁵⁶ Ahmabuta Jésus na ameevôana anguene na anguene gô eba aNzambé mbe: ?Nôtasa nayee? ?One eendô mbe Jésus angeenanô gô suetine-a? ?Vo asangeenanô?

⁵⁷ Tsesuye yadeekedi adigondoku n’Apharisien ameetsa ôtômu mbe: One asabômu gétunguge géndé Jésus, avigé avibeenda we, tômôtsôpéda.