Jean 10 - New Testament in Mitsogo

Tsava éamôkeneyi amandombo

¹ Jésus angô mbe: Me nanôbeenda na gô pie mbe ône aseengéa g’ômbaa amôgômba ôkeneo mandombo, na angô akônda môgômba kôndaga, angô te muisui na môsi môkôbé.

² One eengéa v’ombee amôgômba, angô te môkeneyi amandombo.

³ Kumu amôgômbee amôkukuéa gôéengéa. Mandombome mookô ôgie wedi. Abambéa mangô évo évo gô miname maô gôémakeda na gô mbadi.

⁴ Vamakusédangô mandombo medi metso, amuene môkeneyi oota gô mbene. Mandombome maanda angô va ngima. Na mangô masabômu ôgi amôkenene.

⁵ Ivô masangaanda môgenda, môma asiikaganô na mangô. Mangamôbusuga te busuga. Gôébégô ôgie wedi ôsamenyanganô na mangô.

⁶ Jésus amagunya oma tsava nene, ivô oma asiminigôgéô.

Jésus te môkeneyi amôsôba amandombo medi

⁷ Jésus amatimbôanéda tsavane mbe: Me nanôbeenda na gô pie mbe me te ôkuké av’ombaa amôgômba ôkeneo mandombo.

⁸ Muetso amapanga ébuéa gô môgômba, me gétsigé, ahngô te eesui na asi môkôbé. Na mandombome masiôkéô ahngô.

⁹ Me te ômbee wanyô. Okô môma eengéa vandé me angoobou. Angeengéa na angakusa gôéaa môyakô.

¹⁰ Muisui aviga te gôéésua, na gôéyôa na gôébunza. Me namaviga te mbe wa na môma tôngaba monyovo. Mônongoe amonyo ône, te ône ôsoongôa môma ésupua.

¹¹ Me te môkeneyi amôsôba amandombo mami. Môkeneyi amôsôba eetsa monyo edi gôéwa gô mandombo medi.

¹² Gôndéké môma ayanza te gôédiia dode ditévo, angô kaka môkeneyi amandombo, n’angô kaka kumu amandombo. Vangaviga émbengie, môyanzine angabusuga gôétsikéa émbengie mandombome. Mavo mangapanzanganédu na mavo mangaaô.

¹³ Môyanzine atsika mandombo te gôndé angô môyanzi adode ditévo na asaba na môkebanganô na ngeba gô mandombome te gôsaba mangô medi.

^14-15 Me te môkeneyi amôsôba amandombo mami. Gandé Téta asabômu me, na me tsamôbômu, te gandé me na mandombome mami. Me tsamabômu, na mangô dôta masabômu me. Me neetsa monyoe wami gôéwa gô mandombome mami.

¹⁶ Me nandé na mavo mandombo madeo masiengédu gô môgômba. Nanyôngéô mbe mandombome mane makedu na me gô nzéa. Na mangookô ôgie wami. Gôngaba ôbua ôvo na môkeneyi môvo.

¹⁷ Téta, ône aseendô gôényôngéô me te gôétsa me monyoe wami gôéwa, gômbe nangoomba édiia wene monyo.

¹⁸ Gôsaba môma anôtôa me monyoe wami gôéyôhu. Ivô naadeekeda memuene gôéwa. Nandé n’enyanga gôéadeekeda memuene gôéwa. Nandé n’enyanga dôta éomba éba na monyo. Te éne ématômu me na Téta.

¹⁹ Ajuif amoomba ésaganédana te gô mavoviame mane.

²⁰ Ayekani amavovo mbe: Andé na gédidi gébévani gô môtémedi. Andé ti gégiô. ?Nômôôkéô gôndé?

²¹ Akaô avo amakina mbe: Aé, kaka nane. Môma andé na gédidi gébévani asoongôa évovo nane. ?Gédidi gébévani géndé na ngudi yedôngéda môsi pogu-a? Gésangoongôa.

Ajuif amakina Jésus

²² Oma muetso amatsôkéa gô Jérusalem suetine ééndô mbe Dédicace. Emabaka ndéô easodi gévôni.

²³ Jésus amakénga gô gatse eba aNzambé gô tsina ombaa ôvôni ôtetu mbe ômbaa aSalomon.

²⁴ Ajuif amaseta angô na amamôtsundéda mbe: ?Nayee ôémba we mabégôme momuene? Pandôéda we na vede mônongoe woo, n’one amatôma éwe. Okô mbe éwe te Christ, ône amasevou na Nzambé, beenda we.

²⁵ Jésus amanigôa ahngô mbe: Me namani énôpandôéda na vede, ivô anye nôgétsumaka me paga. Mayanza mamisôba meenda me gô ényanga éaTéta, mangô te mbangine yami.

²⁶ Ivô anye nôseetsa me mitémamie te gôsaba anye g’ôbuee amandombo mami. ?Ivô anye nayee nôngeetsa mitémamie, anye gébé g’ôbuee amandombo mami?

²⁷ Mandombo mami mookô ôgie wami. Me tsabômu mangô. Mangô dôta makea géômbé gévo n’ami.

²⁸ Me neetsa mangô monyo amôbô na môbô na masangawa. Gôsaba môma oongôa émawata gô mogo mami.

²⁹ Téta, ône ameetsa me mangô, ootéa na ngudi n’enyanga amuetso. Gôsaba môma angawata sôma gô mogo maTéta.

³⁰ Wa na Téta tôndé te môvo.

³¹ Te vane Ajuif amoomba édingôa mataé mbe amôtuma na mangô.

³² Jésus amanigôa ahngô mbe: Gô ényanga éaTéta, me nameenda mayanza mayekani mamisôba va miso manyô. Va gatse amangô metso, beendani me éyanzee ébévéiyô anye, éne ématumanye me na mataé.

³³ Ajuif amavovo n’edi mbe: We tôsabuta étuma éwe na mataé gô éyanza ééndewe éamôsôba. Tôdingôa mataéme te gôenza éwe Nzambé. Ewe ôndé te môma ?tambô ônyôngéô ékoga Nzambé-a?

³⁴ Jésus angô mbe: Ematendu gô Matendeo MaNzambé mandé n’anyô mbe: Anye nôndé nôneegeduni gandé amuene Nzambé.

³⁵ Wa n’anyô tôsabômu mbe éne étôbeendu na Matendeo MaNzambé tôsangoongôa étsika éangô. Nzambé amakuméda ane amapandôéda ôgie wedi mbe: Anye nôneegedu ga Nzambé.

³⁶ Tambô na me, Nzambé amasevôa me na amatôma me na gô tsina. ?Nayee nôénda me mbe neenza Nzambé? ?Te gôpandôédi me mbe me te Muana ANzambé-a?

³⁷ Okô tsiyanza mane manyôngéô Téta, nôngatsuma me paga.

³⁸ Géé me, nayanza te mane manyôngéô Téta, n’anye nôgétsumaka me paga. Béyé gatsumanye me paga, singani mane meenanye me nayanza. Vane paga yanyô dinganôtôga. N’anye nôngamenya mbe na gô pie, Téta Nzambé andé môvo n’ami. Na me dôta nandé môvo n’edi.

³⁹ Ajuif amoomba éénda mbe amôtsôpa, ivô Jésus amoomba énôtôga vandé ahngô.

⁴⁰ Jésus amakea na gô dipo tsényé yambéne ééndô mbe Jourdain. Te tungune émabatésa Jean oma va mbeego. Jésus amadigaa wangô.

⁴¹ Oma ayekani amaviga na gôndé ahngô. Amavovo anguene mbe: Amuene Jean asiyanza mabégô mavôni mamisôba masoongôa môma ésupua. Ivô mane mamanigôa angô mamômôgôô noo, asipaté.

⁴² Gô tungu nene, ayekani ameetsa Jésus mitémamie.