Jean 1 - New Testament in Mitsogo

Ogi aNzambé ôpatsa évitsi na ôétsa monyo

¹ Nzambé madeo asikana tsina n’oba, vamapanga vamabaka ône atetuku mbe Ogi. Ogi te ôndé na Nzambé. Ogi dôta te amuene Nzambé.

² T’ebandô tômenya mbe vamapanga na kaa ôgi ômabaka na Nzambé.

³ Gô ngudi yone ameendô mbe Ogi, Nzambé amakana na amavanga éetso. Gôsaba ta na sôma gévo gésikanô na gésivangô gô ngudi yOgi.

⁴ Aangô te kumu amonyo. Monyoe ône ôtanéda gévede gôndé oma.

⁵ Gévedege géne gétana gôépatsa évitsie ésaba na ngudi yeéma gévedege géne.

⁶ Nzambé amatôma mômôgôô môvo, peegi. Inedi Jean.

⁷ Jean amatômu gôénigôa ômbangi agévede saNzambé. Amatômu gômbe oma angeetsa Nzambé mitéma miaô vangookô ahngô mane manigôa Jean.

⁸ Amuene Jean, kaka gévedege géne ivô amabaka mbangi gôénigôa mabégôme magévedege géne.

⁹ Gévedege gémanigôa Jean, te géne sapie gésaba n’okana. Gémeenanô gô tsina na gétana gôndé oma muetso.

¹⁰ Ogi ômabaka gô tsina, Nzambé amakana tsinane te gô ngudi yOgie, ivô asi tsinane asiôkéô aangô ta na pesu.

¹¹ Ogi ômatsiga gô tsengene na ôsisingô n’ane andé gô yangô, tambô amuene te kumu atsengene.

¹² Buéyé nane, avo amasinga Ogi na ameetsa angô mitémamie. Ahngô te ane ameetsô na Nzambé ngudi yekoga anedi apie.

¹³ Ana aNzambé ahmabôtu n’edi. Obôtue ône kaka ône anzina, na ône otô, vo ône etondo éamôma gabôtu môma na môma n’edi.

¹⁴ Ogi ômakoga môma. Angô kumu amabégô mapie, amanyônganéô na Tétedi vamadigaangô va tsina va gatse awa n’anyô. Tômeena ôbébayi wetso ondômbee wedi, te ône ookumakee ômeetsô angô na tétedi, angô Muana ekika.

¹⁵ Jean amanigôa ômbangie wedi mbe: Nôeni, te ône ameevéda me anye mbe me noota gô mbene, angô aviga gô ngima, tambô pene te angô. Me madeo tsibôtu te angô andéké.

¹⁶ Wa n’anyô muetso tômani édiia ôkabô okitie ôndé n’edi. Tômadiia te mate makôndamani.

¹⁷ Mige na mitôma miaNzambé mimaviga na tétasô Moïse. Mate mapie metso mamaviga na Jésus-Christ. Môétsine te Nzambé.

¹⁸ Gôsaba môma ameena Nzambé, ivô amuene muana ekika angô te Nzambé, na andé vavo na Tétedi amamôtsutsuéda.

Mane mameekéda Jean-Baptiste (Bono na Matt. 3:1–12 )

¹⁹ Adeekedi adigondoku na géômbé saLévite amatômu na Ajuif agô Jérusalem gôéka na gôndé Jean. Oôkôni éne émanigôa Jean vamaviga ane amatômuni. Amamôévôa mbe: ?Ewe ndaa?

²⁰ Jean asiapipé. Ivô amatôna gébé na tsoyi mbe: Me kaka Christ, ône eenéa anye angatômu na Nzambé.

²¹ Vane ane amakudéguni amamôévôa mbe: ?Ewe vo ndaa? ?Te Elie-a? Jean amatôna mbe: Aé, me kaka Elie. Ahngô mbe: ?Ewe te môpandôédi amatasa maNzambé-a? Jean angô mbe: Aé, kaka me.

²² Amôgôôe amoomba émôbakéga mbe: ?Ewe vo indaa? ?Tôngakénigôa ane atômi we mbe ndé? ?Gatasa éwe, ômakudégu na ndaa?

²³ Vane Jean amanigôa ahngô mbe: Me te Ogi amôma ôamugana gô tsenge émagasani mbe: Baani nzéane éaKumu ébaka tsimatsima. (Amuene Esaïe, môpandôédi amatasa maNzambé amavovo te nane.)

²⁴ Va gatse ane amakudégu gôéévôa Jean mabégôme gômadenganô na Apharisien.

²⁵ Ahmamôtsundéda mbe: Ewe ôéndi mbe: Me kaka Christ. Me kaka Elie. Me kaka môpandôédi amatasa maNzambé. ?Ivô éwe ôétsa oma bateme nayee?

²⁶ Jean amasupua ahngô mbe: Me, nanôbatésa na meba. Ivô menyani mbe va gatse anyô deo noo gôndé muene asamenya anye.

²⁷ Buéyé gooti me gô mbene edi, me te gétôkôtôkô, angô te môtsé. Gétôkôtôkô ôgoeye géote môtsé. Me tsaba pengo gétôkôtôkô, nandé gô tsina asangô.

²⁸ Mabégô mema mamabuéa gô mbôka étetu mbe Béthanie gômabatésa Jean oma gô dipo tsényé yambéne étetu mbe Jourdain.

Jésus te môpaga endombo aNzambé

²⁹ Ovo enyaa Jean ameena Jésus aviga na gôndé angô na amapandôéda mbe: Nôeni, ôdôô te môpaga endombo ômakudéga Nzambé gôéba ôgondoku gôéyôhu mbe anganôtôa ébévee éamitéma mioma muetso ava tsina.

³⁰ Te ône anigôi me anye kôdôtsé mbe me noota gô mbene, angô aviga gô ngima tambô, pene te angô. Me madeo tsibôtu te angô andéké.

³¹ Vamavovo me mbe gôngaviga muene, tsimenyeke mbe ône angavigani te ôdôô. Ivô éyanzee éami te gôénôbatésa na meba na gôétubéda angô gôndé asi éongo éaIsraël.

^32-33 Jean amoomba énigôa mbe: Endéké te gavovi me. Me tsimenya ône amasevoa Nzambé gôéaanda me gô ngima. Ivô namatômu na Nzambé mbe: Kiaka ôkebatésa ome na meba. Va gatse ane angabatésuni, ôngeena Gédidi sami gésuma na vandé môma môvo. Menya mbe te angô angabatésa oma na Gédidi sami. Vane me Jean neeni Gédidi SaNzambé gésuma g’ôba gô gégoni saménga na vandé mômôgôône ôdôô.

³⁴ Gôeni me nane, te ganôpandôéda me mbe ôdôô te Muana ANzambé.

Jésus amabandôa ébambéa aneengi edi

³⁵ N’ongôngôe ône, Jean na avo aneengi edi abaé amadenganô

³⁶ vamoota Jésus wangô. Jean ameena Jésus na amatubéda aneengi edi mbe: Nôéni, môpaga endombo ômakudéga Nzambé.

³⁷ Aneengie abaé ane amookô éne évovi Jean na amaanda Jésus gôékea n’edi géômbé.

³⁸ Jésus amagéngôga gôébono ane amôaanda gô ngima, na ameevôa ahngô abaé mbe: ?Anye nônyôngéô ndé? Omee amavovo n’edi mbe: Rabbi, tubéda we gôdigaa éwe. (Vamavovo angô mbe: Rabbi, te gôémômekeda mbe: Môékédi.)

³⁹ Jésus amabambéa ahngô mbe: Vigani, nôviena gôdigaa me. Angô abaé amakea na ameena gômadigaangô. Emabaka kômbéne mbe émavéndama, na amadigaa na Jésus.

⁴⁰ Va gatse angô abaé amookô gamavovo Jean na amakea na Jésus, môvo te André muaneya aSimon Pierre.

⁴¹ André amapanga éwanya na muanayeedi Simon na amamônigôa mbe: Tôéni Messie. (Vamavovo angô g’ôgi aHebreu mbe: Messie, g’ôgi aGrec te Christ, ône amasevou na Nzambé.)

⁴² André amakea na Simon na gôndé Jésus. Jésus amabono Simon na amavovo mbe: Ewe te Simon, muana aJean. Nagôôga mbe Céphas. (G’ôgi aSuada te Pierre.)

Jésus amabambéa Philippe na Nathanaël

⁴³ N’ongôngôe ône Jésus amatimôga gôékea na gô tsenge éaGalilée. Amawanya na Philippe na amavovo n’edi mbe: Oka n’ami nzéepo.

⁴⁴ Mbôkane éaPhilippe te Bethsaïda. Te mbôkane dôta éAndré na Pierre.

⁴⁵ Gô mbene anzéa, Philippe amawanya na Nathanaël. Amamônigôa mbe: Tôenani na ône amavovoko Moïse gô miganda mimatendangô mige na mitôma na ndongi yaNzambé. Te ône amanigôa dôta apandôédi amatasa maNzambé. Te Jésus muana aJoseph, môsi mbôkane ééndô mbe Nazareth.

⁴⁶ Nathanaël amatsuma paga mbe: Ti gô vimbôkavie viaNazareth vine. ?Gôngeenanô ébégô éamôsôba-a? Philippe amamôénda mbe: Viga, ôviena.

⁴⁷ Vameena Jésus Nathanaël aviga ga vane gôéwanya na Jésus, amavovo mbe: Ii, ôdôô te môsi éongo éaIsraël apie. Asaba na mangônzô.

⁴⁸ Nathanaël amamôévôa mbe: ?Ewe ômenyi me nayee? Jésus amamônigôa mbe: Me nagôeni ôndé digaa gô tsina agéététége géne, sofiguier. Namenyi éwe, Philippe madeo asigôbambéa.

⁴⁹ Vane Nathanaël amamômekeda mbe: Môékédi, éwe te Muana ANzambé. Ewe te môtômine eongo éaIsraël.

⁵⁰ Jésus amabika n’edi mbe: Ewe ôyavôga éétsa môtémee gôéndi me mbe nagôeni gô tsina ofiguier. Te buedi. Ivô ôngeena na mavo mabégô mavôni madeo masienewe.

⁵¹ Jésus amoomba énigôa mbe: Nôngeena ôba ôkukuga. Asi g’ôba angavigédu na Nzambé, angabata na angasuma vandé me, Muana Amôma.