Jacques 5 - New Testament in Mitsogo

Ndongi gôndé ékitie

¹ Na te gôndé anye, ékiti. Déakani na meesegeani gô mane madagani mangaviga na gôndé anye.

² Dikiti yanyô dimani éboo. Mikanda mianyô mimanéô na ndôgôgô.

³ Ekôtee éanyô na dodeye yanyô éka te nyanga étévo. Te nyangane éngatsundéda éwe mbe: Ondé n’oési. Nyangane yangô éngayôéda yôtôye yanyô ga soto. Nômakôkéga ôkitie gôédiaa aakaga gô pitsiye yamôyusumédu.

⁴ Anye nôsideekede tsikaye yaayanzi atsaga yanyô. Oôkôni migianganô miaô. Ane ahtsigéda mbôtô yanyô, mindônga miaô mimabuéa na gô matô maNzambé Kumu angudi yetso.

⁵ Nômadinga va tsina, te na éetso éôngôa môma édiia. Te na môgangu atsengene. Anye nôndé mônongovo ga nyama éebôngôu na kumu ayangô mbe évunda na angamiyôha. Te mônongovo gandé anye nôayeeséda anyene gô mane manyima mitéma mianyô ngu na nyee ôwa.

⁶ Nômeeséda ane asibé n’oési na nômayôha ahngô gébé n’oési. Ahngô ahsanôkina.

Bakani na môvinéné na ôsambô

⁷ Bakani na môvinéné ngu na vangaviga Kumu Jésus. Bononi mônongovo gandéké môgaabi. Angô eenéa na môtéma ômasumani éne éamisôba éngakandéda totone. Eenéa te môbaka ngu na gô môténa gôédenga môyakô.

⁸ N’anye te mônongovo. Bakani na môvinéné na mitéma misipani. Génikéô saKumu géka gôpégôpé.

⁹ Nônatsuavana anyene n’anyene, kabaga nôesédu na Nzambé. Aanakani, môtsundédine aka v’ombaa.

¹⁰ Ana aTéta, bangôani apandôédi ambeego amatasa maNzambé, ahmeevéda akaô gô ina aKumu Nzambé. Bakani na tsingayi g’ôbibô ômabaka n’ahngô gô gékuanô.

¹¹ Tôsabômu mbe ane ahmabibédani eena gényônga. Nômamana éôkô tsangô éaJob gamabakangô na ôbibô, na môtéma ômasumani. Nôsabômu éne émeetsô angô na Kumu v’ekôdéô. Kumu andé ti na ngeba épôni na tsôvé oma.

¹² Ebégô évôni ana aTéta, nômbiasongéa misongia. Nômbiasongéa ôba. Nômbiasongéa tsina. Nômbiasongéa ta na môsongia ôvo. Ene ésinganye, singani mbe: Ii. Ene ékinanye, kinani mbe: Aé. Kabaga nôkuyaméa gô môtsundu aNzambé.

¹³ ?Gôndéké môvo va gatse anyô eena panda? Agondé Nzambé. ?Gôndéké môvo va gatse anyô eena buedi‐a? Embéké mimbô maNzambé.

¹⁴ ?Gôndéké môvô va gatse anyô abeeani‐a? Abambéé peeye yambumu éaNzambé. Te ahngô ahgondo Nzambé na atsakéga môbeene mogo na amôbanda na madi gô ina aKumu Jésus.

¹⁵ One eetsa Nzambé môtémedi wetso gétsumé ngudi yedi paga vadukangô, môduké wedi ôdôngéda môbeeyi. Kumu atimôa angô na ébévee éedi ésingéô kokoo.

¹⁶ Tubéni mabégô manyô mabévani gôndé anyene n’anyene. Dukani Nzambé gôndé anyene n’anyene gômbe anye nôngadôngédu. Osambô ôndé na ngudi dipôni te ône amôvinéné ômasambéda môma eenanô na Nzambé ti eembe asaba n’oési.

¹⁷ Elie amabaka môma amagono na wa n’anyô. Amaduka Nzambé na môvinéné mbe mbuua ésanganyogo. Na yangô ésinyogé éma étatô na gébéndéké.

¹⁸ Amoomba éduka Nzambé. Vane ôbee ômanyogéda mbuuane na tsinane émakandéda môyakô.

¹⁹ Ana aTéta, ôkô mbe môvo va gatse anyô amaagana na mabégô mapie, buedi mbe muene amônikédé na gô mangô.

²⁰ Menyani mbe ône anôtôi môkedi gô nzéane ébévani éne émabakangô mbe akea gôémônikéda na gô éne éapie, ooboi môkedi g’ôwa, na ébévee éyékani ésingéyiô kokoo.