Jacques 4 - New Testament in Mitsogo

?Evamba éatsengene ékegea nayee?

¹ ?Migenye na masaganédana va gatse anyô matubéga nayee? Matubéga te manyima mabévani mayungédanye gô mitéma mianyô.

² Anye nônyôngéô sôma, ivo nôsoongôa édiia sangô. N’anye nônyôngéô éyôha môma gôédiia sangô. Nônyima sôma ivô nôsoongôa édiia sangô. Te vane nôtuba te migaga na migenye. Nôsaba na éne ényôngéô anye te gôsaduka anye Nzambé éangô.

³ Nôduka, nôsadiia. Te gôdukanye na matasa mabévani. Ene édukanye te gôndé anyene gôédugéda manyima manyô mabévani.

⁴ Anye nôvamba mavamba mabaé. ?Nôsamenya mbe ône andé n’evamba n’esima éatsengene asaba n’evamba na Nzambé? One andé na vitoo n’esima éatsange nedué akoga te môdudeo aNzambé.

⁵ Nôtasa mbe Matendeo MaNzambé matôbeenda bobo mbe: Nzambé anyôngéô, ti v’ekôdéô ényôngéô, gédidi gémavumbangô gôndé wa n’anyô.

⁶ Buéyé mbe nane, Nzambé atôétsa mene mate mootéa mane. Matendeo MaNzambé matôbeenda mbe: Nzambé agoméa asi nyemo. Ivô eetsa mate gôndé ane asaba na nyemo.

⁷ Sugédani anyene va mbene aNzambé. Kékôani mane mayabédé na angakôndangana na gôdagôda n’anye.

⁸ Weseani na gôndé Nzambé gôévamba n’edi, na angô angawesea na gôndé anye. Ovôakani mogo manyô oma abévani. Gôgédani mitéma mianyô, anye anyepi amiônya.

⁹ Bangôani ébévee éamitéma mianyô. Déani na aamuganani éangô. Koani ékasôga éamitéma mianyô éka gésinganinga.

¹⁰ Sugédani anyene va mbene aKumu Jésus na angô anganôsangéga.

Onatsundéda môkoo

¹¹ Ana aTéta agô mbumu éaNzambé nônatsuavana anyene n’anyene. One eeséda muana aTétee n’edi na atsuava angô, eeséda Matendeo MaNzambé na atsuava mangô. Menya mbe éwe ôtsuava Matendeome éwe ôsaba môneegedi amangô ivô éwe te môkékôyi amangô.

¹² Môkitsi amige te Nzambé. Na môtsundédine te amuene Nzambé. Te angô Môbunganédi. ?Ewe indaa ôeséda môkoo?

Nômbiaba na nyemo

¹³ Oôkôni me anye nôvovo mbe: Deo noo na mene tôngakea na gô mbôka asimbe na bôkaye. Tôngamana te géma gévo. Tôngeenda ôyôkô na tôngadiia dode yasô.

¹⁴ ?Nôvovo nane nayee? ?Nôsabômu mane mavigani‐a? ?Monyoe wanyô ôndé nayee? Tambô monyo ôndé ga égudé éenanô pesu andéô gô mbéyi na éangô épambôga.

¹⁵ Oôkôni éne éngavovo anye. Buedi gôévovo mbe: Okô Kumu Nzambé anyôngéyiô tôngadônga na tôngeenda te nani na nane.

¹⁶ Ivô anye nôndé na nyemo na nôtsokima anyene. Nyemoye dine dindé dibévani.

¹⁷ One asabômu éénda mane mamisôba ivô aseenda mangô, angô eenda mane mabévani.