Jacques 3 - New Testament in Mitsogo

Mabégô moomeni amôma

¹ Ana aTéta agô mbumu éaNzambé mbe gôsibaké va gatse anyô ayekani eetsi andongi. Nôsabômu mbe, we eekédi, môtsundue asô ôngavasô gô mabégô metso.

² We muetso tôénda ôési aminongo minongo. Okô môma asapônga gô mavovia te môma apie. Te angô atôma ôtôé wedi wetso gébé n’oési.

³ Tôkata môkodi va môngônga ataba. Tôtôma ôtô edi wetso te gô ngudi yamôkodie va môngônga. Otôe wedi ôkea gô nzéa ényôngéô we.

⁴ Bonoko gakea mbôngô. Buéyé mbôngône éndé épôni na gékunga gékungéda, mbôngône ékedu na kavi ésaba épôni. Ekea na gône gônyôngéô mônugine.

⁵ Mônongovo ômeni te géeme gégegége g’ôtô amôma, ivô angô ôénda te mabégô mavôni. Te ga tsanzu ékeke éyôéda diveve yamôbôngô.

⁶ Omeni ôgono na soto. Te kumu ébévani éeme éetso éndé g’ôtô. Na ôbévéda ôtôe wetso. Omeni ôtumba soto gô monyoe wasô. Te soto géviga gô mungu asoto.

⁷ Nyama yaminongo minongo diékédu na diékaganô n’oma. Na nyama yagô pindi na nyoyi, na nyama dikea migoge, na nyama yagô mbéyi dimeekédu n’oma gô mbôka.

⁸ ?Ivô ômeni amôma ôndé nayee? Gôsaba môma atôma na eekéda ômeni edi. Omeni te géemé gébévani gésatômu na môma. Omeni ômayôa na ngii na môyobo.

⁹ Omeni te ône ôneegeda we Kumu na Téta éasô n’anyô Nzambé. Omeni te ône ôkoko we oma n’asô n’anyô amavangô na Nzambé gô gégoni sedi.

¹⁰ Gô mônya ôvo gôkusa mavovia mamate na mane mamikokou. Ana aTéta mbe ésibaké nane.

¹¹ ?Gétôka gévo te gébunduga meba maduegi na mane mandôé‐a?

¹² Ana aTéta asi mbumu éaNzambé, ôguda ôsabôta mbida, na gékadi gésabôta kuda. Meba mavianga masakoga maka mane mamana sôé.

Gôndéké éodo éviga g’ôba

¹³ ?Gôndé va gatse anyô môma andé n’eodo n’ebagéa? Atubédé éodo éedi na ébagé éedi gô ésima éedi éamisôba na gô éne éendangô na môtéma ômasumani.

¹⁴ Okô gô mitéma mianyô nôndé na ngusu na kébuma nônakuméda anyene mbe, tôndé n’eodo. Nômbiapatéda gô mane mapie.

¹⁵ Mônongo eodo ésaviga gôndé Nzambé. Ene te éodo éatsengene na éamôtéma amôma gabôtu angô. Eodoe éne éviga gôndé yabédé.

¹⁶ Gôébégô gô tunguye dindéké ngusu na kébuma didenganô dôta na mabégô masagôsagô na mane mabévani.

¹⁷ Ivô gôndéké éodo éviga g’ôba te éodo émagôgéani. Ene te ébégô éedi éamapanga, na éodoe éne éndé éagétabé, gébé na nyemo, gébé na tato. Te éodo émayôa na ngeba, na ékuséda go môtéma amôma ésima éamisôba. Eodoe éne ékina matasa mabévani na ésaba n’enyepa éamônya.

¹⁸ Asi gétabé agaaba te gétabé, na migono miaô te étsimama.