Jacques 2 - New Testament in Mitsogo

Nômbiatatôa oma

¹ Ana aTéta agô mbumu éaNzambé anye nôétsi mitéma mianyô na gôndé Jésus‐Christ Kumu agéneega setso. Nônatatôa oma gô nzoh amôkanda vo go ényepa éamôkanda.

² Tôkanégéni te mbe, gékiti géengéa gô géwanyéô sanyô. Aata môdô osunu ôvôni na maduani mokumaka. Gôengéa dôta na môsuga n’esengi éedi.

³ Ewe ôbono gékiti na maduani medi mamisôba na ôvovo n’edi mbe: Digaaka éva gô kuanga éokumaka. Na ôbeenda môsuga mbe: Ewe ôtema te môtie. Kôndi nane ôbeenda angô mbe: Digaka éwe va tsina va kôbangô amakôdô mami.

⁴ ?Osaba gôétatôa oma‐a? Na vabono éwe ahngô matasa moo masaba kuanakue.

⁵ Ane eenanô tsenge mbe andé misuga, te ane ahmasevoa Nzambé mbe: Nôndé n’okiti gôndé me. Anye nôsadagéô eetsa me mitéma mianyô gébé na paga. Ovo ôkiti te ôkumu ômavangana me n’anye nônyôngéô me.

⁶ Ivô anye nôtubéda misuga maguga. ?Tambô ane ahnôkuanani, na ane ahnôtsua misunda indaa? ?Kaka ékiti‐a?

⁷ Te ahngô ékitie atsuava ina amôsôba eetsiô anye na Nzambé.

⁸ Mbe nôénda mitôma miokumu aNzambé mimatenduni gô Matendeo MaNzambé mbe nôénda te kuanakue. Môtômee te mbe: Nyôngéô môkoo ganyôngéô éwe ôtô omuene.

⁹ Okô nôtatôa oma gô ényepa otô, anye nôénda te éne ébévani. Nôtsundédiô te gôkékôyi anye mitôma mia Nzambé.

¹⁰ One akenea mitôma na mige miaNzambé mietso ivô amôkuua ti môge ôvo, andé n’oési gô mitôma na mige mietso.

¹¹ Gôébégô ône amavovo mbe: Ombiakea gésasô te ône amavovo dôta mbe: Ombiayôha. Buéyé mbe ôsikea gésasô, ôkô ôndé na gébadu, éwe ôndé môkuuyi amige miaNzambé.

¹² Vovoni na indani nôndé oma atsundédu gô ngeba gôétsimamédu.

¹³ Okô mômane aseena akedi ngeba, Nzambé asangeena môma nône ngeba gô nyaa amôtsundu. Ngeba didiia te mitayi gô môtsundu.

?Na gôéétsa môtéma, na gôédigaa n’esima éamisôba éne éôtéani yééni?

¹⁴ Ana aTéta, ôkô môma eenda mbe: Neetsi Nzambé môtémami wetso gémôtsumé paga. Na ésima éedi ésatubéda nane? ?tsoongone éedi géndé? ?Mavovia medi mangooboo angô‐a?

¹⁵ Tôkanégéni te mbe Muana aTéta, amôgeto vo amômôgôô, andé mônyenge na angô ookô nzaa.

¹⁶ N’anye nôvovo n’edi mbe: Kiaka na gétabé. Onadigaa mônyenge. Buedi te gôéaa. N’anye nôseetsa angô môkanda na môyakô. ?Mavovia manyô mangangutéda angô‐a? ?Mangaatéda angô‐a?

¹⁷ Ebégôe te mônongovo na ône avovo mbe: Neetsi Nzambé môtémami wetso. Na ésima éedi ésatubéda nane. Gô mavovia matévo gôsaba tsoongo.

¹⁸ Tôkanéga n’oma abaé. Môvo avovo na môkedi mbe: Me neetsi Nzambé môtémami wetso gémôtsumé paga. Môkedi mbe: Me va yami kuka nandé n’esima ényôngéô Nzambé. Tubéda me gameetsa éwe Nzambé môtémoo, éwe gédigéé n’esima ényôngéô angô. Ivô me nangagôtubéda ésima éami éamisôba vane éwe ôngayavôga émenya mbe: Odôô amani eetsa Nzambé môtémee wetso gémôtsumé paga.

¹⁹ Ewe mbe: Nzambéne te épo. Buéyé édidi ébévani ésabômu mbe Nzambé te épo. Na édidie éangô étatéa Nzambé.

²⁰ ?Ewe ôgétsumaka paga? ?Onyôngéô me nagôpandoéda‐a? Bonokoye. One eetsa Nzambé môtémedi gémôtsumé paga ivô asaba na ésima ényôngéô Nzambé, angô dôta asaba na tsoongo gôndé Nzambé.

²¹ Bonoko tétasô Abraham. Amaséngu na Nzambé ôséngu te gô éne émeendangô. Amadeekeda muanedi Isaac te ôgondoku.

²² Oeni, gômeetsangô Nzambé môtémedi wetso na gômeendangô éne émanyôngéô Nzambé mabégô mema mabaé mawanya ti eembe ébégô évo. Na éne émeendangô émadugéda angô gôégésangana môtémovo na Nzambé gébé na paga.

²³ Te gômeenanô mane matôtanga gô Matendéô MaNzambé mbe: Abraham ameetsa Nzambé môtémedi wetso. Na Nzambé ameena Abraham ti eembe môma agébé n’oési. Nzambé amateta Abraham mbe: Wee ami.

²⁴ Môma eetsa Nzambé môtémedi wetso gébé na paga te buedi. Ivô kaka go éne étévo mbe Nzambé eena môma ti eembe asaba n’oési. Mitayi miamôma va mbene aNzambé te gô ésimedi.

²⁵ Buéyé na Rahab, môgeto agésasô ameenanô na Nzambé ti eembe môgeto asaba n’oési te gô éne émeendangô. Rahab amasingéa Ajuif abaé ane amaseta môsenge ndodi, gôésomo gô ebedi. Na amawedéa ahngô gôébusuga na tsangône éaô.

²⁶ Te mônongovo gandé ôtô mbe ôsaba na modi ôsangadônga. Na môma eetsa Nzambé môtémedi ivô aseenda éne ényôngéô Nzambé, asadônga.