Jacques 1 - New Testament in Mitsogo

Ditimôgi

¹ Oô te me Jacques, môyanzi aNzambé na aKumu Jésus‐Christ nanôtendéa. Nanôkômbôa muetso asi mbumu éaNzambé nômapanzanganédu gô tsengeye yetso.

Bakani gébé na paga na bakani n’eodo

² Ana aTétee agô mbumu éaNzambé vakanégu anye gô mabégô maminongo mietso, tsôkéakani na gényônga gévôni.

³ Nôsabômu mbe vasatsuma anye ngudi yaNzambé paga nôkékôa mane makanégu anye, nôndé gôékôndégu ôbibô.

⁴ Ivô keneani mbe nôbibéda ti v’ekôdéô éabibéda. N’anye mbe nôngaba nômatsimamani na nômadugani gévéé ta n’ebégô évo.

⁵ Kôndi nane, ône asaba n’eodo aduké Nzambé éangô. Na Nzambé angamôétsa éangô. Gôébégô Nzambé eetsa na géneega gébé na misésu.

⁶ Ivô buedi mbe môma aduké na môtémee wetso, gébé na buétsé. One atsuma paga, agono na miyôkiyôki miamubu miyôkimédu n’opunga na gésa na gésa.

⁷ Gôndé mômane amônongo ône gôédiia éne éduki angô Kumu, géndégégé.

⁸ Môma nône andé na mitéma mibaé na mikebanganô gô éetso ééndangô.

Ebégô éosuga na éokiti

⁹ Muana aTéta, ône asaba môma môvôni, eena buedi vabatédu angô na Nzambé.

¹⁰ Na môma môvôni eena buedi vasugédu angô na Nzambé. Okiti ôngoota mônongovo goota nzôbé éamabunza.

¹¹ Kômbéne étsigéda ômandaa na géviôviô sedi gégaséda mabunzame. Nzôbé diaaga. Enyepee yaô éôta. Mônongovo ga gékiti adimbanédiô gô mane mayanzangô.

Ebémbu na ékanégu

¹² One asipa n’obibo gô éne ékanégu angô atsôkéké. Gôébégô gôbibédi angô adiia monyo. Monyo ône te môsenda ômamema Nzambé mbe: Gôndé anye nônyôngéô me nôngadiia angô.

¹³ Vakanégu môma asoongôa éénda mbe: Te Nzambé akanégi me. Nzambé asakanégu na mane mabévani. Na amuene asakanéga môma.

¹⁴ Ivô môma akanégu vadutu angô na gényônga samane mabévani mookô angô tsôvé. Akuba te gô mane manyimangô.

¹⁵ Mônongovo gatsua môgeto émé évunda, na abôta te muana. Te mônongovo ga môtéma amôma ôtsua ényima ébévani na ôbôta te ébéva. Ebévee évunda, na ékôdéô éangô te ôwa.

¹⁶ Ana aTéta amôtéma nômbiabômédu.

¹⁷ Ekamô éetso na éenza éetso éamisôba éviga g’ôba gôndé Nzambé angô te môvangi agévede. Amuene asakoga na asaba na gédinadina gépenganani.

¹⁸ Angô amatôbôta gamanyôngéô amuene gô ngudi yamabégô medi mapie gômbe wa n’anyô tôngaba ana akua gô éetso émavanga Nzambé.

Oôkôni na indakani

¹⁹ Ana aTéta amôtéma, bangôani ébégô édué. Buedi mbe môma na môma abaké na vôôka gôéôkô. Na abaké géyavôgé ésiia. Na géyavôgé ékambôga.

²⁰ Opisa amôma ôsakônza ébégô ganyôngéô Nzambé amuene gô étsimama éedi mbe ékônzu.

²¹ T’ebandô tsikani ésima éetso énde éevindô na mayanza metso mabévani. Bakani na mitéma mimasumani gôédiia Mane Mamavovo Nzambé metso makuyiô mitéma mianyô. Te mabégô mema mooboo anye.

²² Nômbiabômédu anyene. ?Mane mamavovo Nzambé, nôndé gôéôkô mangô te na matô matévo nayee? Indakani mane mookô anye gô mangô.

²³ Okô môma ookô mabégô na asamakenea agono na môma abono gédimô sedi gô géeno.

²⁴ Na vamanangô ébono akea. Na angô eeba tsina na tsina éne ééni angô.

²⁵ Ivô ône abono gô mige na mitôma na ndongi yetsimama, te ndongi dikuséda môma g’ôvéga, abono na nzôô, atôneegeda éangô na andé na môvinéné asangeeba mane mookiô angô. N’angô eenda metso mookiô angô angeetsô na Nzambé mate gô môdigéôe wedi.

²⁶ ?Gôndéké môma amenya mbe amuene te môma aNzambé‐a? Môma nône mbe asaba na ngugé gôésikaméda omeni edi, angô mbe asimenyanganô mbe môma aNzambe. Na môma nône abômédu amuene.

²⁷ One andé na gô pie môma aNzambé, gébé n’oési va mbene aNzambé te ône aweda ana atsani na mikué gô panda yaô. Na akumba mane mabévani matsenge nedué.