I Timothée 6 - New Testament in Mitsogo

¹ Ndongi yedi te gôndé avéga. Buedi mbe agobeda kookoye yaô ti v’ekôdéô éagobeda, kabaga môma atsuava ina aNzambé na meekédu masô n’oo.

² Môvéga asakina égobeda kooko edi môma ameetsa Jésus môtemee, tsangô mbe ahngô muetso andé ana aTétee avitoo gô mbumu éaNzambé. Ene éamôsôba te mbe môvégee nône ootéé émôyanzéa na géneega gôébégô éne ékusa gô éyanzee éedi ésadimbana gô môkii, éndé te éagô mbumu éaNzambé. Timothée, ôeni éne éngeekéda éwe.

Meekédu madiboe na ôkiti apie

³ Okô môma akanégi éékéda mavo mabégô, na angô asaba n’evamba na mavovia mapie maKumu asô n’anyô Jésus‐Christ, na meekédume maneegeda we Nzambé,

⁴ menyani mbe ahngô éékéda te gô nyemo étévo. Asamenya ébégô n’ébégô. Andé na tsôvé ébévani yétsumana paga na yésaganédana gôébégô éamavovia. Vane te vabandôa ngusu na masaganédana, na dibuanya na matasa mabôvingô.

⁵ T’ebandô pagaye yaô disakôdéa, gôébégô mitéma miaô mindé mimayungani na misamenya mabégô mapie. Ahngô amenya mbe môma agobeda Nzambé te gôédiia ôkitie.

⁶ Na gô pie, wa n’anyô tôgobeda Nzambé tôndéké n’okiti ôvôni. Ivô ôkitie wasô n’anyô amapanga te vasanyima we éôma éyekani.

⁷ Bangôani mbe wa n’anyô tômaviga na gô tsina gébé na sôma. Tônganika dôta te gébé na sôma.

⁸ T’ebandô tôénda mbe ôkô tôndé na môyakô na maduani, tôsangadôbuta sôma, te vane.

⁹ Ivô ane andé na tsôvé édiia ôkitie akuba gô pagô étambéô angô. Akubédu na manyima mabévani mookô ahngô masaba na tsoongo. Na mangô mayavôga ébuéda môma gôébunganéda monyoe wedi ava tsina na buéyé n’one agô mbene.

¹⁰ Onzôô adode te étambé éamapanga ébuéda môma na gô mabégô metso mabévani. Avo oma gômabéngahngô ôkitie, amanôtôga gô nzéa éaJésus étôkeani édué na amakôva anguene maguga mayekani gandé môma atsôkô môtémedi na pingô yatsende.

Ndongi gôndé amuene Timothée

¹¹ Ivô éwe Timothée, ôndé môma aNzambé, tambô te buedi gôétongonéa na metso mane gôémagônga. Yanza gôédigaa gô étsimama na gôégobeda Nzambé ôndé n’edi môtémovo gémôtsumé paga. Digaa na étondo, n’obibô na sekaseka.

¹² Genya na ngudi ébadie éamôsôba gôédiia éne éténdéda we gébé na paga. Ombianzeegeda monyo ôsakôdéakani. Gôébégô Nzambé amabambéa éwe gôéadiia. Na ômanigôa gébé na tsoyi mane mavangani éwe na Nzambé va mbene oma ayekani agôbononi.

¹³ Me Paul navovo n’ewe va mbene aNzambé, ône eetsa monyo gôndé éôma éetso évégumani, na va mbene aJésus‐Christ, ône amanigôa ômbangie wedi na mane mamavangana angô na Nzambé va mbene aPonce Pilate. Nagôtôma mbé:

¹⁴ Indaka metso mamatômu éwe na Nzambé. Ombiasinga ôtômue woo ône ôbévédu na ôpenganédu ngu na nyee ôngaviga Kumu asô n’oo Jésus‐Christ.

¹⁵ Angatsutsuédu na Nzambé gô ndéô émasevoa amuene Nzambé, angô môtômine môvôni aneegeduni asaba na gégoni, kumu étsimama, angô Kumu ootéa kumu yetso, na pene ootéa peeye yetso.

¹⁶ One asangawani te angô. Amuene te gévede gévôni gésoongôa môma éwesea. Gôsaba môma amamôenani. Na gôsaba môma oongôa émôbononi. Ondômbee wetso na ngudi yetso éndéké gôndé angô môbô na môbô. Amen.

¹⁷ Beenda ane andé n’okiti atsengene mbe: Nômbiaba na bopeeo. Beenda ahngô mbe aseetsa mitéma miaô na gô mônongo okiti ône ôgôgani na ôdimbanani, ivô eetse mitémamie miaô na gôndé Nzambé, ône atôétsa éetso gékuté, gôékasôgéda we mitéma.

¹⁸ Oongô angô ndongi mbe ééndéké mayanza mamisôba na asatanganéda ôkiti ômasuégangô gô gégaa. Atanganédé te ône ômakabangô na gényônga gôéwedéa akaô mbe ône ôndé na tsoongo. Na oombéké ékaba gébé na ninga.

¹⁹ Gôénda ahngô nane, andé gôévaga ôkiti ôvôni agétangégé na ôsagôgani. Na angadiia monyoe apie amôbô na môbô.

²⁰ Ah muanami Timothée, kenea n’ekenge éne émeetsô éwe na Nzambé. Ombiookô mavovia mavôni mapengana na mabégô maNzambé manganigôa asi géneenga gésaba sapie. Ane eenda mbe: Tôsabômu mabégô metso. Tambô.

²¹ Avo andé na géneengage géne, ivô amatongonéa na nzéa éaJésus étôkeani édué. Nanyôngéô mbe mate maNzambé mabaké gôndé éwe.