I Timothée 2 - New Testament in Mitsogo

Meekédu madisambô

¹ Ti ébégô éamapanga na kaa, énôongô me te mbe: Vovoni na Nzambé na miduké na disambô na gondogo na kuma gôndé oma muetso.

² Buedi gôévovo na Nzambé gôndé atômi avôni atsengeye, n’ane andé na manyanga muetso, buta mbe tôdigaa na gétabé gébé na mikebanganô. Vane tôngaba na môdigeo ôgobedani ganyôngéô Nzambé.

³ Nôeni, éne ényôngéô Kumu asô n’anyô Nzambé te éangô éne.

⁴ Gôébégô angô anyôngéô mbe oma muetso adiia géôbogeo na awesea gôémenya mabégô medi mapie.

⁵ Ebégô éapie te édué. Gôndéké Nzambé épo na koo. Na va gatse oma na Nzambé gôndéké môsungéyi môvo na koo, te ône amakoga môma inedi Jésus‐Christ.

⁶ Angô amadeekeda monyoe wedi amuene gôévana oma muetso mbe ahkusa g’ôvéga amane mabévani. Gô éne émeendangô gô ndéône émakônza Nzambé, tôena mbe Nzambé amanyôngéô ti na gô pie mbe akuséda oma g’ôvéga.

⁷ T’ebandô Jésus amatôma me gôénigôa ômbanzee wedi na gôndé ane asaba Ajuif. Me tsapata. Nanônigôa te mane mapie mayanza me. Nameekédangô Mabégô Metso MaPie maNzambé mbe eetsa mitéma miaô gô mangô gébé na buétsé.

⁸ Nanyôngéô mbe gô tsengeye yetso, amôgôô atômba mogo maô gôévovo na Nzambé. Avove na Nzambé na mitéma mimagôgéani gébé na ôpisa, na gébé na matasa mamasaganédana.

⁹ Nanyôngéô mbe ageto aata maduani maô kuanakue na ndéôye diaata ahngô. Amaaté gô mônongo amôsôba gétsede akaô. Buedi mbe ageto abaké gébé na tsoki gô tsôgé yaô. Gôebégô éamisanga na mianza na mapungadede na miôdô, ésaba buedi gôéaata miyekani na mosunu ôvôni. Mikandamie dôta, kaka miosunu ôvôvôni.

¹⁰ Nanyôngéô mbe môgeto andé môgobedi aNzambé amenyanganô kaka go maduani, ivô te gô mayanza na gô môdigedi edi amôsôba.

¹¹ Buedi mbe ageto abaké na mitéma mimasumani gôéongu ndongi gékékôé.

¹² Me Paul tsasinga môgeto gôéékéda na gôéba n’enyanga gôétôma amôgôô. Môgeto adigé na suii.

¹³ Endéké nane gôébégô ône amapanga évangôni te Adam. Na va ngimane vane te Eve.

¹⁴ Adam asibômédu. One amabôméduni te môgetone na amakina môtômee aNzambé.

¹⁵ Buéyé mbe nane, môgeto angoobou gômenyangô ébôta ana na gômenyangô édigaa môtémedi wetso gôndé Nzambé gémôtsumé paga. Adigaa na étondo na môdigédi ômagôgéani gébé na nyemo.