I Timothée 1 - New Testament in Mitsogo

Mikudéga na kômbô

¹ Oô te me Paul, namasevou na Kumu asô n’oo Nzambé na namatômu naJésus‐Christ, ône andé tsoongone éasô n’oo étôténdéndni.

² Nagôtendéa gésangô gegé éwe Timothée, ôndé muanami amôtéma agô mbumu éaNzambé. Nanyôngéô mbe Tétasô n’oo Nzambé na Kumu asô n’oo Jésus‐Christ agôétsa mate medi, na agôtubéda ngeba yedi na agôsuméda môtéma.

Owema meekédume madiboe

³ Vamanôtôga me gô Macédoine, namagôbeenda mbe, éwe digaa gô Ephèse. Nagôomba ébeenda mbe, digaa te gône. Gôndéké avo gône eekéda mabégô madiboe. Dékéda ahngô mbe: Nômbieekéda.

⁴ Dékéda ahngô mbe: Nômbiapakéda matangôtangô mbe te mabégô mapie. Nômbiatanda bikudumie misaba n’ekôdéô, miangô mituba te masaganédana. Môma asangatubédu nzéa éagéobogeo gô miangô. Adenga nzéane te veetsangô Nzambé môtémee gémôtsumé paga.

⁵ Ene ébutu gô môtômee ôngatômewe ahngô te mbe ahngadigaa gô étondo éapie. Na éangô ékusa go môtéma ômagôgéani na môtémee ôseesédu na muangee wedi. Na étondo ékusa dôta go môtémee ôsatsuma Nzambé paga.

⁶ Eekédie adiboe ane, mitéma miaô misaba gô mabégôme matatô mane. T’ebandô andé gôépapatana gémenye gôkeahngô na mavovia maô magébé na tsoongo.

⁷ Anyôngéô émenyanganô mbe eekédi avôni amitôma miaNzambé, tambô, anguene asanigôgéô mane mavovo ahngô magénongo.

⁸ Tôsabômu mbe ndongi na mige na mitôma miaNzambé minyepa te veekédu miangô na vagobedu miangô ganyôngéô Nzambé.

⁹ Bangôani mbe môge ôsakitsô gôndé ane adigaa na mavôma. Môge ôkitsô te gôndé abévie, na akékôie, na asi dibagaa na oma asagô na gôndé ane asaneegeda Nzambé na mabégô medi. Môge ôkitsô dôta gôndé asi mikôbé, ane ayôha kinde yaô na ane ayôha pati môma.

¹⁰ Na gôndé asi gésasô na gôndé amôgôô ayanza anguene gésasô, na gôndé akabi avéga, n’apatie, n’ane asongéa éngôndô. Mige mikitsô te gôndé muetso ayanza mane mapengana na meekédu mapie.

¹¹ Meekédume mapie mane, mandéké te gô Tsangô Eamôsôba émeetsô me Paul mbe neekéda yangô. Tsangô Eamôsôba étônigôa gandéké Nzambé, ône akuméduni ôndômbee na eendô mbe Kumu.

Tôkumédéni ngeba yaNzambé

¹² Me Paul nakuméda Kumu asô n’oo Jésus‐Christ, ône ameetsa me ngudi gôédugéda éyanzee éami. Namôkuméda gôébégô ameena me mbe: One andé na mavôma gôéétsô éyanza. Namôkuméda gômasevoangô me mbe namôyanzéa.

¹³ Eenda nane buéyé mbe namamôkékôa v’ebandô na namamôkuana na namamôenza. Ivô Nzambé ameena me ti ngeba gôébégô metso mane namamayanza g’ôdungé tsimenye. Namabaka na paga tsiitséké môtémee gô mabégô medi mapie.

¹⁴ Kumu asô n’oo Nzambé ameetsa me mate medi masaba n’okana. Ameetsa me ngudi gôémôdeekeda môtémee wami wetso gébé na buétsé. Amayuéséda môtémami n’etondo éedi étôdiiani gô évambee éndé wa n’oo na vitoo na Jésus‐Christ.

¹⁵ Bangôa ébégô édué ésangakoga na éndéké évôni na ényepa ôkôngéda éangô gébé na paga. Ebégôe te mbe: Jésus‐Christ amaviga gôédigaa va gatse oma gôéoboo ane amadimbanani gô ébévee éaô. Va gatse ahngô me namootéa ébéva.

¹⁶ T’ebandô Nzambé ameena me ngeba. Amanyôngéô mbe ôkana angeba yaJésus‐Christ dienanô gôndé me, pene oma abévani. Amanyôngéô mbe ébégôe édué émenyanganô na muetso ane ahngamôétsa mitéma miaô gôédiia monyo ôsakôdéakani.

¹⁷ Tôkumédéni, na tôneegedeni gédundé Kumu asô n’anyô amôbô na môbô, ône amawani, na aseenanôni, angô Nzambé ésaba na gégoni. Amen.

¹⁸ Timothée, muanami agô mbumu éaNzambé nagôétsa ndongi yedi. Yangô éwanya na dipo ndongi dimeetsa Nzambé môpandôédi gôéevéda éwe. Singa mbe mabégô mema masipéda éwe na meetsa éwe ngudi gôégenya ébadie étôgenyani.

¹⁹ Ekeeyie yoo te gômeetsewe Nzambé môtémee woo wetso gémôtsumé paga. Na te gôndé éwe gébé n’oési vatsundédu éwe na muangee amôtémoo. Avo oma amakékôa éne émeesédu ahngô na miangamie miamitémamie miaô na amamôtôga gô nzéane éaJésus étôkeani te gô éne.

²⁰ Avo amamôtôgani te Hyménée na Alexandre. Namadeekeda ahngô na gôndé Satan gôésisédu mbe asangadôomba éenza Nzambé.