I Pierre 5 - New Testament in Mitsogo

Keneani mandombo maNzambé

¹ Natenda ndongi yedi gôndé anye nôndé peeye yenyanga gô mbumu éaNzambé. Me nandé payi gandé anye. Me nandé mbangi gô maguga mameena Christ. Me nangadenga ôkabô g’ôndômba ôvigani.

² Me nabeenda anye payi mbe: Bôngôani mandombo maNzambé mameetsô anye n’edi. Kaka n’ogomu. Ivô na mitéma mimasumani mônongovo ganyôngéô Nzambé. Kaka gôédiia môvanô, ivô te gôédeekeda mitémamie mietso gô éyanzee.

³ Nômbiabuta ébatéda anyene gôéôtéa ane ahyanza n’anye éyanzevo. Bakani ôkana va gatse amandombo maNzambé mbe anganôgoo.

⁴ Vangatsutsuga amuene pene akeneyi amandombo, nôngadiia gépôkôdô sôbébayi sokumaka agébungané.

⁵ Gôndé anye nôgébaka minzambu na tômbô, ôôkéôni payi yambumu éaNzambé. Vandé anye na géengi digaakani gébé na bôpeeo. Matendeo MaNzambé matônigôa mbe: Nzambé akina asi bôpeeo. Angô eetsa mate medi gôndé ane ahndé na mavôma.

⁶ Sugéani anyene gô tsina otômu aNzambé andé n’ogogo angudi. Nzambé anganôsangéga gô géyénza gésabômu amuene.

⁷ Deekedani panda na mikebanganô mianyô éetso na gôndé Nzambé gôébégô angô anôkenea.

⁸ Bakani misiki Wemani. Môdudeo anyô, yabédé abégôa ga gémbungu gégunga gôébuta éngmbuguméa ône anyôngéô angô éaa. Bakani mitémamie mietso gôndé Nzambé.

⁹ Gôméani yabédé kabaga awesea na gôndé anye. Menyani mbe maguga meenanye te mane matubédu ana aTétee n’anyô gô tsengeye yetso.

¹⁰ Nzambé, Kumu éangeba yetso, amanôbambéa gô ina aJésus‐Christ gôéba g’ôndômbedi amôbô na môbô. Vangamana anye ésindéa maguga gô pesu aviyénza, amuene Nzambé anganôbôngaméda, anganôsipéda, anganôkasôgéda na anganôodeda pepe géniké ngima.

¹¹ Ngudi yedi dindé gô môbô na môbô. Amen.

Te kômbô ditévo

¹² Oô te me Pierre na Silas, muana aTétee amavôma andé n’ami. Awedéa me gôénôtendéa vipesu viagésangô. Gésangôge egé te gôésipéda anye na gôénônigôéa mbe na gô pie ngeba yaNzambé dimavamba n’anye dindé yapie. Sipani gô mabégô mema.

¹³ Asi mbumu éaNzambé amasevou n’anye, ahndé gô Babylone, anôkômbôa. Na muanee wami Marc anôkômbôa te mônongovo.

¹⁴ Sambanéani anyene n’anyene na kômbô agéneega. Gétabé gébaké gôndé anye nôndé gôndé Christ.