I Pierre 2 - New Testament in Mitsogo

Etaé ésipéda oma aNzambé gô monyo, te Christ

¹ Viiani ngima ésima ébévani éetso. Te diboe na enyepa éamônya na ngusu na matsuavi metso.

² Ganyôngéô muana av’ebene anyôngéô ôbuba, anye nyôngéôni mônongovo mabégô maNzambé metsimama gômbe vanganyua anye mangô nôngavunda gô géôbogeo.

³ Te gatônigôu na Matendeo MaNzambé mbe: Anye nômabandôa ébémba môgangu aKumu Jésus.

⁴ Tambô weseani na gôndé Kumu. Buéyé gamakinô angô n’oma mbe étaé ésanyônganéôni, angô te étaé ésipéda monyo, na émasevou na Nzambé mbe éagéneemba.

⁵ N’anye dôta nôndé mataé mamonyo. Weseani gôégésu n’edi gôésaô na Nzambé eba aGédidi. Te eba ômapuumani nôndé adeekedi adigondoku, asungéyi amatsimamani oma. Digondokuye dideekeda anye dindé na géneemba gôndé Nzambé gô ina aJésus‐Christ.

⁶ Matendeo MaNzambé matônigôa mbe: Nôeni, me navumba gô Sion étaé éav’epandaka. Te étaé émasevouni éagéneemba. One eetsa môtémedi gô éangô asangadôbômédu.

⁷ Oséngu gôndé anye nôsaba na buétsé gô éangô. Ivô gôndé ane amatsuma paga agono na Asaayi eba amagunya étaé mbe ésanyepa Na éangô émasevou na muene éka étaé éav’epandaka.

⁸ Matendeo MaNzambé matônigôa mbe: Etaé éne émakoga éka éôkana mabaku. Na éka ôbobo ônikanédana mangimangima. Angô ôpôngéda muetso asookéô ndongi yaNzambé. Te gamavanga Nzambé mbe éngaba te nane gôndé ane asookôni.

⁹ Ivô gôndé anye ésaba nane. Anye nôndé éongo émasevou na Nzambé mbe nôngaba adeekedi adigondoku okumaka. Anye nôndé gébandô gématsimamani. Nôndé oma amoobou na Nzambé. Amasevoa anye gôébeenda mayanza medi mamatsimamani. Amakuséda anye gô évitsi mbe nôengéa na gô gévede sedi gématsimamani.

¹⁰ Va mbeego anye nôsibaké oma aNzambé. Ivô deo noo nôka asi mbumu éedi. Va mbeego Nzambé asinôeneke ngeba. Ivô deo noo anôena ngeba.

Môdigédi oma aNzambé va gatse ane ahsagobeda Nzambé

¹¹ Anami amôtéma, me noongô anye nôndé g’ôgenda gô tsengene. Kinani tsôvé yetso dibévani digenya na mitéma mianyô.

¹² Bakani na midigédi miamisôba va gatse oma asavamba na Nzambé. Buéyé mbe g’ôsôbee waô apatéa anye mbe oma abévani, ivô ahsabômu mayanzame manyô mamisôba. Te vane vangayanza Nzambé gô mitéma miaô anganôkuméda.

¹³ Gobedani ane atôma gô tsengene buta mbe ina aKumu Jésus éneegedu. Gobedani buéyé kumu atsenge ône andé va ngongo éayetso.

¹⁴ Buéyé môtômi akudégu na pene éedi gôésiséda ane ahyanza mabégô mabévani na gôéétsa mitayi gôndé ane eenda mayanza mamisôba, gobedani angô.

¹⁵ Nzambé anyôngéô mbe éne épatéô anye, tônani éangô n’esima éanyô éamisôba.

¹⁶ Anye nômoobouni digaani ga oma amoobogoni. Nômbianika ékatangana v’esooe gô ésima émabakanye ébévani. Ivô bakani avéga akôô ayanzi aNzambé.

¹⁷ Bakani na sekaseka gôndé oma muetso. Nyôngéoni ana aTétee n’anyô. Gobedani Nzambé na gomo. Gobedani atômie atsengene.

Tôsindéni maguga mamasindéa Christ

¹⁸ Anye ayanzie, tatéani kokoo yanyô. Okéôni ahngô na gomo. Bakani gô tsina aditômu yaô. Kaka mbe te gôndé ane ahnyepa mabégô atévo, ivô buéyé mbe na gôndé ane ahndé na midigédi midagani.

¹⁹ Vatubédu anye gékuanô gébé ta n’ebégô, Nzambé anganôétsa mate gôébibéda maguga vandé anye na mianga miamitéma mianyô na puu na gôndé Nzambé.

²⁰ ?Géneega ndé gôndé ône asipa vasisédu angô andé n’oési? Ivô te mate maNzambé gôndé ône asipa vasisédu angô géndé ébégô.

²¹ Anye nômabambéô na Nzambé gôébibéda ékuanô. T’ebandô Christ amabibéda ékuanô gô gévénga sanyô. Amatubéda nane gômbe anye nôngamôaanda gô matambé medi gôésindéa maguga mamasindéa angô.

²² Angô asiindé ta n’ebévani évo. Gô mônyedi gôsikusé ébégô éoboe ta n’evo.

²³ Amamôtoko, ivô Jésus asinikédé matoki. Amamôkuana n’angô asinikédé pégôani. Jésus amadeekeda mabégô metso gôndé Nzambé môkitsi ambanza asapenganédani.

²⁴ Angô amatsua ébévee éasô n’anyô g’ôtô edi va gésumu sowa gômbe tôngagono na nzumbi géyanzédô mabévani. Ivô tôngaba na monyo gôéyanza étsimama. Gô ngudi yapôta yedi, anye nômadôngédu.

²⁵ Anye nômagonoko ga mandombo madimbanéyiô nzéa, ivô n’atsatsee nôniki na gôndé Christ môbôngôyi anyô na môkeneyi anyô.