I Pierre 1 - New Testament in Mitsogo

Ditimôgi

¹ Oô te me Pierre. Namatômu na Jésus‐Christ. Nakudéga gésangô gegé na gôndé anye nômasevou na Nzambé na nômapanzangana na gô tsengeye yetso. Anye nôndé g’ôgenda gô Pont, avo gô Galatie, avo gô Cappadoce, avô dôta gô Asie na Bithynie.

² Anye madeo nôsibôtu nômasevou na Téta Nzambé gamavanganô mbe eenda te nane. Nzambé amakoa anye omedi gô ngudi yaGédidi sedi gômbe anye nôngagobeda Jésus‐Christ. Te nzina yedi dimeetama gôndé oma muetso digôgéda anye mitéma. Te mbe mate maNzambé na gétabé sedi géyekegee gôndé anye.

Tsoongone éasô n’anyô ésagôgakani

³ Tôkumédéni Nzambé, Tétene éaKumu éasô n’anyô Jésus‐Christ. Gô ngeba yedi Nzambé amabôta wa n’anyô g’ôbôtu amôbaé gômakundua angô Jésus g’ôwa. Tsoongone éasô n’anyô ésagôgakani éndé gôndé Jésus.

⁴ Na mikuanya miasô n’anyô mitôtsôkéani mindé gôndé Jésus. Te mikuanya miagébungané na miagébômbé, na miagéongodone. Mikuanya mimatsikéô anye mindé na Nzambé g’ôba.

⁵ N’anye nôngamidiiani nôkeneo na ngudi yaNzambé gômamôétsanye mitémamie mianyô gémôtsumé paga. Nôkeneo ngu na ndéône éamôyusumédu éngadiia anye géobogeo. Sangô gémamana ékônzu na gématsutsuu gô ndéône éamôyusumédu.

⁶ Gô mabégôme mane tsôkéakani. Buéyé mbe n’atsatsee gô pesu andéô mitéma mianyô mindéké gô gékuanô gô minongomie mietso.

⁷ Ekuanô éenanye étubéda gôsipanye mitéma mianyô gô mabégô maNzambé. Te gandé dodo sôma gébunganani, ivô yangô ékanégu gôkanzô yangô gô soto. Te mônongovo gandé anye. Veetsanye Nzambé mitéma mianyô gébé na paga mika na génemba géôtéa buéyé géne sadodo. Na mikanégu gô gékuanô. Okô mitéma mianyô misipi nôngeetsô ôséngu na ôndômba n’egoba vangaviga Jésus‐Christ.

⁸ Anye nônyôngéô Jésus‐Christ gémôene. Nômôétsa mitéma madeo nôsimôena na miso manyô. Anye nôtsôkéa na gényônga gémootéani ti v’ekôdéô agényônga. Gényôngage sanyô nôsoongôa égénigôa gandé sangô.

⁹ Ene ébutanye te géobogeo sedidi éanyô. Nôndé gôédiia sangô veetsanye mitéma mianyô gébé na paga.

¹⁰ Apandôédi amatsa maNzambé ahmavasa na môvinéné ôvôni gôébuta émenya gakegea géôbogeo. Géobogeoge géne te géne gémeetsô anye ôbiia na Nzambé.

¹¹ Apandôédi ahmabaka na géviôviô gôébuta éménya éyénza éngavigani na mônongoe ôngaba mabégô metso gô ndéôye yangô. Ahmabuta émenya gamabendu ahngô na Gédidi SaChrist géne gémabaka gô mitéma miaô. Gédidi SaChrist gémamenyeda ahngô maguga mangeena Jésus, na ôkumakee ôngaanda mangô gô ngima.

¹² Apandôédi amatasa maNzambé ahmamenyedu mangô kaka gôndé anguene, te na gôndé anye, buéyé mbe gamabaka ahngô eekédi amabégô mema. N’atsatsee anye nôékédiô mangô n’ane ahmeekéda Tsangô Eamôsôba gô éodo éaGédidi SaNzambé, géné gémasuma g’ôba. Buéyé asi g’ôba ayanzi aNzambé anyôngéô émenya mabégô mema.

Ndongi yeeba n’etsimama

¹³ Mônongovo goodeda môma édatedi, oodedani édidi éanyô gôévéngéa éne évigani. Bakani misiki. Bakani na môténdéda ôvôni gô mane mangeetsô anye ôbiia vangatsutsuga Jésus‐Christ.

¹⁴ Mônongovo g’ana ookéô ôgi apayi, anye ookéôni Nzambé. Nômbioomba éaanda tsôvé yanyô yava mbeego vamabakanye g’ôdungé.

¹⁵ Mônongovo gandé amuene Nzambé amabambéa anye andéké amatsimamani, anye dôta bakani nômatsimamani gô midigédi mianyô.

¹⁶ Matendeo MaNzambé matônigôa mbe: Bakani amatsimamani gandé me nandéké namatsimamani.

¹⁷ Anye nôvovo na Nzambé mbe: Téta. Angô te ône atsundéda môma gô mayanza medi gébé na tatô oma. Gô gédingéô sanyô sava tsengene, digaani n’etatéa gôégobeda Nzambé.

¹⁸ Anye nômoobou gôénôtôga gô môdigédi asagô agébé na tsoongo ômatsikéô anye na tétee yanyô. Nôsabômu mbe nômoobou na Nzambé kaka gô ngudi yadode na yadodo.

¹⁹ Ivô anye nômoobou n’osunu ôvôni anzina yaChrist. Andé ga éndombo ésaba éagékonzo na ésaba n’evisô.

²⁰ Christ amasevou na Nzambé tsengene madeo ésivangô. Nzambé amatsigéda angô gô ndéô yedi yamôyusumédu na gôndé anye.

²¹ Gô ina aJésus‐Christ, mitéma mianyô misatsuma Nzambé paga, ône amakundua Jésus va gatse oma amawani. Na amamôétsa ôkumaka n’ondômba gômbe mitéma mianyô na tsoongone éanyô éngaba gôndé amuene Nzambé gébé na buétsé.

²² Nômagôgéda mitéma mianyô vamagobedanye mabégô mapie. Na nômadiia étondo éapie éana aTétee. Te vane nyônganéôni pepe anyene n’anyene na mitéma mianyô mietso.

²³ Me neetsa ndongiye gôndé anye nômabôtu ôbôtu amôbaé. Nômabôtu ôbôtu amôbaé, kaka gô monyo ôbunganani ômadiianye n’eyee na tétee. Ivô nôndé na monyo ôsabunganani te ône ôdiianye gô Ogi aNzambé ôndé na monyo na ôsakôdéani.

²⁴ Matendeo MaNzambé matôbeenda mbe: Otô amôma ôgono n’ebunza. Ondômba otô ôgono na nzôbé dibôta mabunza. Ebunza éongodono na nzôbé diaaga

²⁵ Ivô ôgi aKumu ôndéké môbô na môbô. Ogie ône te ône ônigôu anye gô Tsangô Eamôsôba.