I Jean 5 - New Testament in Mitsogo

Wa n’anyô tôôngôa édiia gô ébadi étôgenyani

¹ One eendô mbe muana aNzambé to ône asatsuma paga mbe Jésus te Christ ône amakudégu na Nzambé. One anyôngéô tétee anyôngéô dôta n’anedi.

² Menyani mbe éne étubéda mbe tônyôngéô ana aNzambé, te vanyôngéô we Nzambé na vagobeda we mitôma na mige miedi.

³ Menyani mbe éne étubéda mbe wa n’anyô tônyôngéô Nzambé te gôtôkenea mitôma na mige miedi. Na miangô misaba mbe midaga pepe gôndé wa n’anyô.

⁴ Gôébégô mbe ana aNzambé muetso ag’ôbôtu andé na ngudi yediia gô ébadi égenyahngô na mane matsengene. ?Tôdiia nayee? Tôdiia te gôétsa wa n’anyô Nzambé mitéma miasô n’anyô gémôtsumé paga.

⁵ ?One oongôa édiia gô ébadi égenyu na môtômine atsengene indaa? Kaka muene. Te ône asatsuma paga mbe Jésus te Muana ANzambé.

Mane manigôa Nzambé maJésus‐Christ

⁶ Jésus‐Christ te ône amavigani. Amaviga na meba mabateme émeetsô angô. Amaviga kaka na meba matévo, te na meba na nzina. Gédidi SaNzambé gétônigôa ômbangi edi mbe te na gô pie. Gôébégô sangô te Gédidi sapie.

⁷ Gôndéké mbangi ditatô.

⁸ Yangô ditatô te Gédidi SaNzambé, na meba, na nzina. Yetso ditatô diwanya te ébégô évo.

⁹ Wa n’anyô tôsinga ômbanza ônigôa môma. Na ône aNzambé ôtéa na ône ônigôa môma. Mane manigôa Nzambé te mane maMuanedi.

¹⁰ Na vane ône eetsa môtémedi wetso na gôndé Muana ANzambé ookô gô môtémedi mbe mane mavovo Nzambé mandé ti mapie. Géé ône atsuma Nzambé paga eenda Nzambé mbe, môsi ooboe, gôébégô asaditéga mane manigôa Nzambé maMuanedi.

¹¹ Ombangie te mbe: Me Nzambé nanôétsa monyo amôbô na môbô. Na monyoe ôdôô nôétsô angô na Muanami Jésus.

¹² One andé na Jésus Muana ANzambé gô môtémedi andé na monyo. One asaba na Jésus Muana ANzambé gô môtémedi asaba na monyo.

Ebégô éamonyo amôbô na môbô

¹³ Nanôtendéa mabégô mema gôndé anye nômeetsa Jésus Muana ANzambé mitéma mianyô mietso te anye nôsabômu mbe nôndé na monyo amôbô na môbô.

¹⁴ T’ebandô tôndé na mitéma mimasumani gébé na paga gô éne éduka wa n’anyô Nzambé. Tsoongone éasô n’anyô te mbe, Nzambé asinga miduké miasô n’anyô vatôduka éne ényôngéô amuene Nzambé.

¹⁵ Vatômenya mbe angô ookô miduké miasô n’anyô tômenye dôta mbe angô angatôétsa éne étodukani.

¹⁶ Okô môma eena muana aTétee n’edi eenda ébégô ébévani ésamôkeda na g’ôwa, buedi mbe avové na Nzambé mbe angamôétsa monyo. Edue éndé kuanakue gô mane mabévani masakeda môma na g’ôwa. Ivô gôndéké ébégô ébévani ékeda môma na g’ôwa me tsanôbeenda gôévovo na Nzambé gô éne.

¹⁷ Mayanza metso mapengana na étsimama ényôngéô Nzambé mandé te ébéva étévo, na gôndéké na mavo mabéva masakeda môma na g’ôwa.

¹⁸ Wa n’anyô tôsabômu mbe muana aNzambé ag’ôbôtu asangoongôa éomba éénda mabégô mabévani n’osôbedi. Gôébégô Jésus Muana ANzambé akenea angô, na amuene Môbévine asangoongôa étsôpa angô.

¹⁹ Tôsabômu mbe tôndéké ana aNzambé na tsengene nyetso éndéké gô tsina otômu aMôbévine.

²⁰ Tôsabômu dôta mbe Jésus Muana ANzambé amaviga na gô tsina amatôétsa éodo gôémenya Nzambé, angô ône apie. Wa n’anyô tôndé môvo na Nzambé ône apie te gô ngudi yaMuanedi Jésus. Te angô Nzambé apie na Kumu amonyo amôbô na môbô.

²¹ Anami, bakani n’ekena gô éne éatsengene éneegeda môma, éangô kaka Nzambé mbe éneegedu.