I Jean 4 - New Testament in Mitsogo

Gédidi SaNzambé na gédidi saMôvingi

¹ Anami amôtéma, nômbiasingana na muetso eenda mbe, me nandé na Gédidi SaNzambé. Tônegedani sangô ôkô mbe gédidige géne géviga gôndé Nzambé. Endé te nane, eekédi ayekani adiboe atsanzabani gô tsengeye yetso.

² Gôndéké mônongo gôégoneda édidie mbe egé te SaNzambé, n’ege kaka saNzambé. One andé na gédidi géviga gôndé Nzambé te ône avovo mbe: Jésus‐Christ te na gô pie amakoga môma.

³ Na ône asasinga ébégôe éne asaba na gédidi géviga gôndé Nzambé. Gédidige géndéké n’edi te géne saMôéndi aPégôani, Môvingine aChrist. Nômooko mbe Môvingine angaviga na angô amani éviga andé gô tsengene.

⁴ Gôndé anye anami nôndé ana aNzambé ag’ôbôtu, nômani édiia gô ébadie égenya anye n’eekédi adiboe. Nômediia gôébégô Gédidige géndé gô mitéma mianyô géôtéa ngudi na géne géndéké gôndé oma atsengene.

⁵ Ahngô avovo gô mônongo atsengene na asi tsengene ookéô ahngô te gôndé ahngô oma atsengene.

⁶ Géé gôndé wa n’anyô, tôndé asi Nzambé. One asabômu Nzambé, atôôkéô. Géé ône asamenya Nzambé asatôôkéô. Te gô mônongoe ône tômenya étatôa Gédidi sapie na gédidi sadiboe.

Nzambé te Kumu éetondo

⁷ Omami amôtéma tônyônganéôni wa n’anyôene na wa n’anyôene, gôébégô Nzambé te Kumu éetondo. One anyôngéô môkedi angô te muana aNzambé na asabômu Nzambé.

⁸ One asanyôngéô môkedi asamenya Nzambé gôébégô Nzambé te Kumu éetondo.

⁹ Nôeni étondo éaNzambé gôndé wa n’anyô éenanô. Angô amakudéga Muanedi ékika na gô tsina gômbe wa n’anyô tôba na monyo gô ngudi yedi.

¹⁰ Etondo ékegea mbe, kaka mbe wa n’anyô tômanyôngéô Nzambé ivô te Nzambé amanyôngéô wa n’anyô na amakudéga Muanedi Jésus. Mbeka nane ébévee éasô n’anyô mbe ésisingéô kokoo.

¹¹ Omami amôtéma ôkô mbe éndé nane mbe Nzambé amanyôngéô wa n’anyô tambô tônyônganéôni wa n’anyôene na wa n’anyôene.

¹² Gôsaba môma ameena Nzambé. Tambô tônyônganéôni wa n’anyôene na wa n’anyôene. Na angô andé môvo n’asô, étondoe éedi éngeenanô gô mônongoe wasô n’anyô.

¹³ Ndémbo émeembô wa n’anyô étubéda mbe tôndé môvo na Nzambé na angô te môvo n’asô n’anyô ?yéndé? Te ndémbone éaGédidi sedi gémeengédangô na gôndé wa n’anyô.

¹⁴ We tômamôenani tôtsua tsangône mbe: Téta Nzambé amakudéga Muanedi Jésus gôéba Mooboyi oma muetso.

¹⁵ Okô môma anigôa mbe: Jésus te Muana ANzambé, menyani mbe Nzambé adigaa gôndé angô na angô dôta andé te môvo na Nzambé.

¹⁶ Na wa n’anyô tôsabômu étondo éndé na Nzambé gôndé wa n’anyô tôsatsuma étondoe éedi paga. Nzambé te Kumu éetondo. One adigaa gô étondo éedi andé môvo na Nzambé, na Nzambé andé môvo n’edi.

¹⁷ Nôeni éne étubéda mbe étondoe éndé gôndé wa n’anyô éndé gébé n’okana, te mbe gô nyaa amôtsundu wa n’anyô tôbaké n’ekasôga na mitéma mimasumani gétsumé Nzambé paga. Nyoone tôngaba n’ekasôga gôébégô mônongoe ômabaka Jésus‐Christ gô tsenge nedué te ône ôndé na wa n’anyô.

¹⁸ Etondo ésaba n’evamba na gomo. Etondo éapie épatsa gomo. Ekegea te nane. Gomo ôviga te gô gésisédéô. Gomo dôta ôkeneda te gô gésisédéô. T’ebandô gôndé ône andé na gomo, étondoe madeo ésiduga gô môtémedi.

¹⁹ Enyônganéô éndé n’asô n’anyô, mapangame te Nzambé amapanga ényôngéô wa n’anyô.

²⁰ Okô môma avovo mbe: Me nanyôngéô Nzambé na angô adudu môkedi, angô te môpati. Bononi. ?Angô gényôngéô môkedi eena angô na miso, anganyôngéô Nzambé aseenanôni‐a?

²¹ Nôeni môtômee ômatôma Christ gôndé wa n’anyô. Angô mbe: ône anyôngéô Nzambé anyôngéô dôta môkedi.