I Jean 3 - New Testament in Mitsogo

Ana aNzambé ag’ôbôtu

¹ Eenakani ganyôngéô Téta Nzambé wa n’anyô. Angô atônyôngéô ti v’ekôdéô éenyôngéô, t’ebandô tôtetu mbe ana aNzambé ag’ôbôtu. Na tôndéké anedi apie. Asi tsengene asamenya Nzambé ?nayee angamenya wa n’anyô gôénigôgéô mônongoe wasô n’anyô tôndé anedi? Asangamenya.

² Anami amôtéma, deo noo tôndé ti ana aNzambé na mônongo ôngaba n’asô n’anyô gô mbene madeo tôsitubédu angô. Ivô menyani mbe vangaviga Christ, mônongo ôndé n’edi tôngagono n’angô, gôébégô tôngamôéna mônongoe ôndéké angô.

³ Muetso tôndé na tsoongone éne gôndé Christ tôkeneke mitéma miasô mbe migôgédu gandé amuene andé amagôgéani.

⁴ Môma na môma veendangô ébégô ébévani ookua mige miaNzambé. Te nane ébévee te géokuéô samige miaNzambé.

⁵ Nôsabômu mbe Jésus‐Christ amaviga gôénôtôa gôndé môma na môma ébévee éedi. Gôndé angô Jésus, gôsaba ébégô ébévani ta n’evo.

⁶ Vane mômane andé na vitoo n’edi aseendadô mabégô mabévani. Na ône agéyanzaka mangô asamenya Jésus na asookô angô gô môtémedi.

⁷ Anami nômbiasinga môma abômédu anye. One eenda mane meetsimama andéké môsi mbumu éaNzambé amatsimamani.

⁸ One agéyanzaka mabégô mabévani angô te môma atômu na yabédé. Yabédé amapanga éénda mane mabévani v’ebandô. Muana ANzambé Jésus asivigé gô yene ébégô. Amaviga gôébunganéda mayanza mayabédé.

⁹ One andé Muana ANzambé ag’ôbôtu, amatsika éénda mabégô mabévani gôébégô ngudi yamonyoe ômeetsô angô na Nzambé dindé n’edi. Nzambé te tétedi ?nayee angoomba éénda mabégô mabévani? Asangoongôa.

¹⁰ Nôeni éne étubéda na vede mbe adua te ana aNzambé na adua te ana ayabédé, étubéda mbe ône aseenda éne ényôngéô Nzambé na asanyôngéô môkedi, angô kaka muana aNzambé.

Tônyônganéôni wa n’anyôene na wa n’anyôene

¹¹ Ekegea te nane, meekédume mamookô anye bandôa vamapanga te mbe tônyônganéôni wa n’anyôene na wa n’anyôene.

¹² Tômbiaba gamabaka Caïn, angô amabaka môma atômu na yabédé, amayôha muanayeedi. ?Amamôyôha gôndé? Te gôébégô mane mameendaka Caïn mamabaka mabévani, géé mane mamuanayeedi mamabaka manyepani meetsimama.

¹³ Ana aTéta nômbiatsapéô gadudanô anye n’oma atsengene.

¹⁴ Gôndé wa n’anyô tômanôtôga g’ôwa gôéengéa gô monyo tônyôngéô ana aTéta agô mbumu éaNzambé n’etondo éapie. Géne te gémbégéa samonyoe ôndéké n’asô n’anyô. One asanyôngéô muana aTétee n’edi agébaka g’ôwa.

¹⁵ One adudu môkedi, angô to môyôhani. Nôsabômu mbe môsi môkôbé asaba na monyo amôbô na môbô gô môtémedi.

¹⁶ ?Ene étubéda mbe tônyônganéôni yéndé? Jésus‐Christ ameetsa monyo edi gôéwa gôndé wa n’anyô. Tambô na wa n’anyô tôéndé mônongovo gôndé ana aTétee agô mbumu éaNzambé.

¹⁷ Tôkanéga te gandé gékiti eena môkedi gô éne égômbéô angô na môtémedi ôseena angô ngeba. ?Gékitige géne nayee angeenda mbe môtémami ônyôngéô Nzambé?

¹⁸ Anami ôkô mbe tônyônganéô wa n’anyôene na wa n’anyôene, kaka gô mavovia na ényepa éamônya. Tambô tônyônganéôni ti na gô pie te gô mayanza masô mamisôba.

Tôndé gébé na paga va mbene aNzambé

¹⁹ Tômbiatsapéô vatôvovo mbe tômabôtu wene ôbôtu na mabégô mapie. Tômbiatsapéô vatôvovo mbe mitéma miasô n’anyô mindé mimasumani gébé na paga va mbene aNzambé.

²⁰ Mabégô mema mandé te nane. Okô mitéma miasô n’anyô mieséda wa n’anyô, tôsabômu mbe Nzambé te Kumu épôni éôtéa mitéma miasô n’anyô na amuene asabômu metso.

²¹ Te nane anami amôtéma, ôkô mitéma miasô n’anyô misatôétsa ôési tôndé na mitéma mimasumani gébé na paga va mbene aNzambé.

²² Wa n’anyô tôdiia gôndé angô metso mane maduka we te gôgobeda we mitôma na mige miedi na tôénda gô mabégô metso te éne ényôngéô angô.

²³ Oôkôni éne étôma angô wa n’anyô. Nzambé angô mbe: Ombiasôôa ina aMuanami Jésus‐Christ. Christ dôta amatôma wa n’anyô mbe: Nyônganéôni anyene n’anyene.

²⁴ One agobeda mitôma na mige miaNzambé andé na vitoo na Nzambé, na Nzambé andé na vitoo n’edi. Ndémbone émeembô wa n’anyô étubéda mbe Nzambé andé na vitoo na wa n’anyô, te Gédidi sedi gémeengédangô na gôndé wa n’anyô.