I Jean 1 - New Testament in Mitsogo

Ogi aNzambé ôétsa monyo

¹ We tônôtendéa gôébégô éone eendô mbe, Ogi aNzambé ôétsa monyo. Angô te mapanga na éôma éetso. Tômookô angô. Na tômeena angô na miso masô. Tômootôneegeda. Na tômoobanda na mogo masô.

² Vamatsutsuga monyoe ône tômeena angô. T’ebandô we tôndé mbangiye gôénôtsuéa tsangône na tônôékéda mane mamonyoe ôdôô amôbô na môbô ône amabaka vavo na Téta Nzambé.

³ One ômeena we na ône ômookô we te angô ôtsuéa we anye. Te mbe nôngagésangana môvo n’asô na vitoone éndé n’asô na Téta Nzambé na Muanedi Jésus‐Christ.

⁴ Tônôtendéa mabégô mema te mbe gényônga sasô n’anyô géngaba ga kaka sagétabé.

Nzambé te gévede

⁵ Nôeni tsangône émookô we na Jésus‐Christ, te yangô étsuéa we anye. Te mbe Nzambé te gévede. Gôndé angô gôsaba évitsi ta na pesu.

⁶ Okô tôénda mbe: Me nandé môvo na Nzambé, tambô tôvovo nane tôndé gô évitsi, na tôpata. Tôpata gô mavovia na gô ésima.

⁷ Okô tôndé gô gévede, gandé amuene Nzambé andé gô gévede, vane tôndé na vitoo wéene na wéene. Na nzina yaJésus, Muana ANzambé ditôgôgédaka ébévee éetso.

⁸ Okô tôénda mbe: Me tsaba na ébéva, tôbômu ti bômugu. Na mane mapie masaba gô mitéma miasô n’anyô.

⁹ Okô tôtuba va mbene aNzambé mbe: Me te môma môbévani, na tôétséni angô mitémamie gôébégô tôsabômu mbe Nzambé te Kumu amavôma na gôndé wa n’anyô asapata, atôsingéa kokoo gô ébévee éasô n’anyô na atôgôgéda éangô.

¹⁰ Okô tôénda mbe: Me tsaba na ébéva, tôénda Nzambé mbe môpati. Na mabégô medi masaba gôndé wa n’anyô.