I Corinthiens 8 - New Testament in Mitsogo

Ebégô éanyama yagéambô sesôga

¹ Tôtaséni ébégô éanyama dimadeekedu mbumba. Na gô pie nôvovo muetso mbe: Me tsabômu mangô. Ivô éodoe éne te éanyemôga. Tambô tôbaké na vitoo gô étondo. Te étondoe étôweseda gôémenya mabégô maNzambé na gétsumé paga gô mangô.

² One atasa mbe: Me tsabômu metso, abômu ti bômugu.

³ Ivô ône andé n’etondo gôndé Nzambé, Nzambé angamômenyeda metso.

⁴ Ebégôe étôbuta émenyani te éangôéé. Nyama émadeekedu mbumba ?wa n’anyô tôngoongôa éaa yangô‐a? Tôsabômu mbe mbumba ésaba sôma gédôngani sangudi gô tsengene. Gôndé te Nzambé épo na koo.

⁵ Buéyé mbe môma avaka na akônza éômee éedi éangudi, na eenda mbe éne éneegeduni éndé éyekani.

⁶ Buéyé nane gôndé wa n’anyô Nzambéne te épo. Te Nzambé Téta amakana éôma éetso na monyoe wasô n’anyô te gôndé angô. Na Kumu asô n’anyô dôta te môvo na koo, te Jésus‐Christ. Te angô asumbéda éôma éetso. Asumbéda na monyoe asô n’anyô.

⁷ Ivô kaka muetso amaditéga buedi gô môtéma ébégô édué éapie mbe: Nzambé te Kumu ayôma yetso. Avo va gatse awa n’anyô ahmeekeganô pepe na mabégô mambumba na angô ngu na deo noo buéyé mbe ahmakusa wangô, gôéaa nyamaye yangô gône atasa mbe na gô pie édué te yambumba. Mianga miamitéma miaô madeo misikoga pepe gô mabégô maNzambé na amenya mbe ngudi yambumba dindéké gô môyakôe ône.

⁸ Tambô kaka môyakô ôtôweseda na gôndé Nzambé. Okô tôsiaa tôsivéa sôma. Okô tôyéé tôsidenga sôma.

⁹ Buéyé mbe nane tôweméni. Wa n’anyô tômakusédu g’ôvéga amatasa mambumba na môyakô ôaa wa n’anyô ôsangatôbongo g’ôvéga gôéba n’edi. Ivô tôweméni kabaga akasô madeo asisipa pepe gô mabégô maNzambé akuéa veenahngô we tôaa.

¹⁰ Ewe ôsabômu mbe Nzambé te Kumu ayôma yetso, ôndé gôéaa nyama gô eba ôneegedu mbumba. Na môkoo madeo asiditéga buedi gô môtéma mabégô mapie, agôena ôaa. ?Asangaba n’etasa mbe tambô nyamane édeekedu mbumba ésaba n’ebégô, me dôta naaké‐a?

¹¹ Na vane muana aTétee n’oo, Jésus amawa te gôndé angô, ivô vandé angô madeo asisipa gô mane mapie, angabungana gôenangô éwe ôaa, éwe ômamana éoodo gô mane mapie.

¹² Vabévédi éwe môkoo na vayungédi éwe angô môtémedi madeo ôsisipani, ôéndi ébégô ébévani gôndé amuene Jésus‐Christ.

¹³ T’ebandô ôkô môyakô ôndé na ngudi yebévéda muana aTétee, tsangadôaa nyamane kabaga nakuéséda muana aTétee n’ami gôéénda éne ébévani.