I Corinthiens 5 - New Testament in Mitsogo

Ebégô éagésasô va gatse asi mbumu éaNzambé

¹ We tômookô mbe va gatse anyô nôkea gésasô. Ti mônongo agésasô gésamenyanganô buéyé n’ane asavamba na Nzambé. Eôkanô mbe môvo va gatse anyô abongi môgaya atétedi.

² Na vane nôboa nyemo anyene mbe: Tônyepa. ?Tambô nôsamenya mbe ébégôe éne gôndé anye te éatsoyi‐a? Na mômôgôô nône ayanza nane, buedi mbe apatsô va gatse anyô.

^3-4 Gôndé memuene Paul, buéyé mbe nandé gôdagôda n’anyô g’ôtô, ivô gô gédidi nandé vavo n’anyô. Gô ina aKumu Jésus me namani eeséda ône amayanza ébégôe éne ébévani va gatse anyô ganabaki vangô. Vangakôkangana anye vavo me nandé n’anyô gô gédidi. Na ngudi yaKumu asô n’anyô Jésus dingaba va gatse asô n’anyô buéyé mbe tôndéké tungu dibaé.

⁵ Buedi gôénzeegeda mômôgôô nône akusa va gatse anyô na gô mogo maSatan gôésisédu g’ôtô gômbe gédidi sedi géngoobou gô nyee ôngaviga Kumu asô n’anyô Jésus.

⁶ ?Anye nônyemôga nayee? Nôsabômu tsavane égunyu mbe, vipesu viamibie vialevure vigésu gô môpemba viaahndéda mipemba miyekani.

⁷ Nôtôani mibiemie midingini mine mialevure miebéva, na anye nôngaba oma amagôgéduni. Vane nôngagono na môpemba atsatsee ôsaba na ngôté gôébégô anye nôndéké môpemba ôsaba na ngôté. Suetine éaPâque te éne éaakô môpemba ôsaahndéduni na tôndé gôétsôkéa suetine gôébégô môpaga endombo aPâque ômayôhu gôndé wa n’anyô te Jésus‐Christ.

⁸ Tôtsôkékéni suetine éasô n’anyô na môpemba amanza ôsaba na ngôté. Te môpemba amane manyôngéô Nzambé na te mane mapie. Tôtsikéni môpemba ambeego ômaahnédu na mibie miebévee na miagésasô.

⁹ Gô gévo gésangô gématendéa me anye namanôbeenda mbe: Nôtsika évamba n’ane akea gésasô.

¹⁰ Me tsivovo nane mbe nôgônga oma muetso va kôbangô, ahngô asi tsengene asavamba na Nzambé. Muetso ane te akeyi agésasô, na asi onzôô okitie, na eesui, n’agobedi ambumba yegoni. ?Ti gôégônga ahngô nôngakédigaa gôni? Buétsé te nônôtôga gô tsenge nedué.

¹¹ Namavovo nane gôénôongô mbe nômbiavamba na ône eenda mbe: Me te môma aChrist na angô te môkeyi agésaô, na môsi onzôô okiti, na môgebedi ambumba na môtokoni, na môsi édangi na muisui. Ti gôndé anye gôéaa tabudé épo na môma nône te édagani.

^12-13 Esaba gôndé me Paul gôéeséda ane asaba oma aChrist. Amuene Nzambé angeeséda ahngô. Ivô wa n’anyô asi mbumu éaNzambé tôôngôa éeséda wa n’anyôene na wa n’anyôene. Te gatônigôu gô Matendeo MaNzambé mbe: Patsani môbévine andé va gatse anyô.