I Corinthiens 4 - New Testament in Mitsogo

Ane amatômu na Christ

¹ Mekedani we mbe we eekédi te ayanzi aChrist na te amuene ameetsa we ôtômu gôépandôéda Mabégô Mapie MaNzambé masinigôganéô na mbeego.

² Ene ébutuni gôndé ône ameetsô ényanga te mbe ayanzé na mavôma gô éne étômu angô.

³ Ti gôndé me Paul, tsaba na mikebanganô mbe nangeesédu n’anye vo n’akitsi amisoso mioma. Buéyé na memuene Paul tsangeeséda memuene.

⁴ Nanôbeenda na gô pie mbe môtémami ôsatsundéda me mbe: Ondé n’oési. Buéyé mbe nane, tsangoongôa évovo mbe: me tsaba n’oési. One atsundéda me te amuene Kumu ami.

⁵ T’ebandô nanôbeenda mbe nômbiayavôga éeséda môma, ndéône émasevoa Nzambé madeo ésibuéa. Tôenékéni ngu na vangaviga Kumu asô n’anyô. Amuene angakuséda na v’ekanga mane mamasuégu v’esooe. Angatsutsuéda na matasame mav’esooe mandé gô tsina amôtéma amôma. Vane môma na môma angakumédu na Nzambé kumane éndé kuanakue n’edi.

⁶ Ana aTéta, metso manigôa me anye éva nakanéga te na Apollos na memuene Paul gômbe anye nôngookô. Nanyôngéô mbe gô midigédi miasô, anye nookô événdégéô éatsava étôgunya mbe: Digaakani gô môgômba ômasaaô na Matendeome. Nômbieenda gameenda anye gôébatéda môékédi môvo mbe, ôdôô te ône wami, na gôésugéda môvo mbe, ône kaka wami.

⁷ ?One amanyepeda éwe mbe ôsaba gandé akoo indaa? ?Kaka Nzambé‐a? Eetso éndé n’ewe te Nzambé ameetsa éwe éangô. Endéké te nane. ?Onganyemôga ômuene gô éne éndé n’ewe nayee? ?Osidiié éangô éetso te ôbiia‐a?

⁸ Anye nôsabutadô sôma. Nômanidô édiia ôkiti ôvôni. Anye nôka mbe kumu. Géé we éva tôsaba kumu. Me Paul nanyôngéô mbe anye nôbé na gô pie kumu gômbe we dôta tôngaba n’anye g’ôkumaka.

⁹ Gôtasa me, namenya mbe va ngima oma muetso te we tômatômukuni. We eekédi tôndé gandé oma ameendô mbe nôngayôhu v’ekanga. We eekédi tôndé tômasetu n’oma ayekani atôbononi. Buéyé n’anguene asi g’ôba, ayanzie aNzambé abono we.

¹⁰ We tôndéké ga égiô gôébégô éaChrist na anye te ome eodo gôvambanye na Christ. We te tôpôpéate na anye te oma angudi. We te adetuni na anye te oma akuméduni.

¹¹ Ngu na ndéône we tôôkô nzaa na tôôkô sôé na tôsaba na maduani. Tôndé tômabômôuni. Tôndé ga tônyôépogo.

¹² We tôtsôgô n’egogo gôédiia éne ékenea yôtô yasô. One atôtokoni adiia mate gôndé we. One atôkuanani tôsamôvénda.

¹³ One atôtsuavani, tômôaabéa n’etondo. Gô matasa moma éne éyetu mbe éngagoombou, te we eekédi. Na étutu égunyuni te we.

¹⁴ Nanôtendéa mabégô mema kaka mbe nabuta étubéda anye tsoyi. Ivô nabuta énôongô ndongi nôndé anami amôtéma.

¹⁵ Gô môdigédie wanyô nôndé oma aChrist buéyé mbe nôndéké na nzima amitônisa miatévédi anzéa, anye nôndé te na tétepo. Endé te nane. Gô mane mavitoone éndé wa n’anyô na Jésus‐Christ, tétanyô te me namanôtsuéa Tsangô éedi Eamôsôba.

¹⁶ T’ebandô nanôtôma mbe: Indakani geenda me.

¹⁷ Na dôta nanôkudégéa Timothée muanami amôtéma agô mbumu éaNzambé ône adigaa gôndé Kumu na mavôma. Anganôbangôéda mônongo amonyo ôdigaa me gô vitoone éndé me na Jésus‐Christ. Mônongoe ône te ône ôékéda me gô tunguye yetso didigaa mbumu éaNzambé.

¹⁸ Avo va gatse anyô nônyemôga mbe: Tôsabutadô angô. Paul asavigeyee gôéena we.

¹⁹ Menyani mbe ôkô Kumu ami anyôngéyiô pitsi yedi nangaviga na gôndé anye. Vane tsangookô enyepa éamônya. Nangeena ti mayanzame mane avovo nane.

²⁰ Ane adigaa gô tsina otômu aNzambé aseenanô gô mavovia, eenanô te gô môdigéôe waô.

²¹ ?Anye nônyôngéô nayee? ?Nônyôngéô mbe naviga na gôndé anye na môbitô‐a? ?Vo nônyôngéô mbe naviga na môtéma ômasumani eetondo?