I Corinthiens 16 - New Testament in Mitsogo

Mane meetsô ôbiia gôndé ana aTéta

¹ Me Paul nanôongô pesu gôébégô éamane meetsô ôbiia gôndé asi mbumu éaNzambé gô Jérusalem. Indakani gamatôma me asi mbumu éaNzambé gô Galatie.

² Nyaa tsono wetso, môma na môma avagé na akenee amuene ôkabô adode ôndé kuanakue n’ene édiiangô. Gômbe vangaviga me tôsangadinga gôékôkanganéda dodeye dine.

³ Vangatsiga me vandé anye nangakudéga omee amasevoa anye atsua dibiiaye yangô na gô Jérusalem. Nangakudéga n’ahngô gésangô te gémbégéa gétubéda mbe adua te asi mbumu éaNzambé.

⁴ Okô nônyôngéyiô mbe na me nakea, tôngakea te wa n’ahngô muetso.

Ene émavanga Paul mbe angeenda

⁵ Me Paul nangaseta pesu tsenge éaMacédoine gôéviga na gôndé anye gô Corinthe.

⁶ Buétsé nangadinga n’anye ôkana apitsi buéyé mbe mbuuaye yetso nandé te gône. Vane nôngawedéa ékeda me na gô tungune énganyôngéô me ékea, tungu te tungu.

⁷ Me tsanyôngéô éena anye mitie mitie. Okô Kumu Jésus anyôngéyiô, me nanyôngéô édinga n’anye.

⁸ Ivô nagébaka na pitsi éva gô môsenge aEphèse ngu na gô ndéô éaPentecôte.

⁹ Gôébégô me éva nadii ndéô éamôsôba. Ombee ôkukuéyiô me na voo gôéyanza buéyé mbe adudeoe andéké ayekani.

¹⁰ Okô Timothée atsigi gôndé anye, keneani angô buedi. Wa n’edi tôndé te éyanza évo éaKumu Jésus.

¹¹ Nômbiamôenza. Itsani angô mane manyôngéô angô akea môtôôe na gétabé, buta mbe abuéa na vandé me éva. Me neenéa angô na ana aTétee n’edi andé n’edi.

¹² Gôndé muana aTétee n’asô n’anyô Apollos, kuka yetso navovo n’edi mbe: Kiaka n’akoo ôkebuéa gô Corinthe. Ivô asanyôngéô ékea pitsi yedi. Buéyé nane angaviga na gôndé anye vangaba angô na ndéô.

Mabégô mamôyusumédu

¹³ Bakani misiki. Sipani gôndé Nzambé, ône ameetsanye mitémamie gémôtsumé paga. Bakani na bôkédé. Oodoni gô mabégô manzéa éaNzambé.

¹⁴ Gô éetso ééndanye, indakani n’etondo éaNzambé gô mitéma mianyô.

¹⁵ Nôsabômu Stephanas na gévia sedi. Te angô amapanga ésingani gô tsenge yetso éaGrèce na ahngô amahdeekeda anguene gôéyanzéa asi mbumu éaNzambé.

¹⁶ Nanôtôma, anee aTéta mbe nôgobeda ahngô na nôyanza éyanzevo n’ahnyô na muetso ane ahgono n’ahngô.

¹⁷ Me natsôkéa gévigéô saStephanas na Fortunatus, na Achaïcus na gôndé me akasôgéda me ga te anye nôvigini.

¹⁸ Ahmasuméda me môtéma mônongovo gamasumédahngô dôta mitéma mianyô. Nôndé buedi n’omee wanyô ane, tambô te buedi gôékenea ahngô.

¹⁹ Asi mbumu éaNzambé andé gô tsenge éAsie anôkômbôa. Aquilas na Priscille n’asi mbumu éaNzambé awanya gô ebaô anôkômbôa n’etondo gô ina aKumu Jésus‐Christ.

²⁰ Ana aTéta n’anyô muetso andé éva anôkômbôa. Sambanéakani anyene n’anyene kômbô étsimama éambumu éaNzambé.

²¹ Nanôtendéa na môsavie wami Paul, mbe: Oô te me Paul nanôkômbôani.

²² Okô môma asanyôngéô Kumu Jésus angadoku. Maranatha‐événdégéô mbe: Kumu Jésus vigaka.

²³ Te mbe mate maKumu Jésus mabaké gôndé anye muetso.

²⁴ Môtémami ôbaké gôndé anye gô ina aJésus.