I Corinthiens 15 - New Testament in Mitsogo

Gékundugéô saJésus‐Christ

¹ Ana aTéta n’ami, me Paul nanôbangôéda Tsangô Eamôsôba éaJésus‐Christ émeekédu anye. Nômasinga yangô. Nômagésangana mitéma mianyô na Nzambé gô yangô.

² Nôobou gô ngudi yaTsangône Eamôsôba édué ôkô nôsipi gô yangô gamanôékéda me. Okô nôsisipa nômeetsa mitémamie te bobo.

³ Namanôékéda bandôa v’ebandô mabégôme mavôni mameetsô me. Nameekéda anye mbe Jésus‐Christ amawa gô ébéva éasô n’anyô te gamatôévédu na Matendeo MaNzambé.

⁴ Amagunyu gô ngii na amakunduga gô pitsine éamôtatô te gamatôévédu na Matendeo MaNzambé.

⁵ Vamakunduga Jésus ameenanô na Pierre, buéyé n’akedi muetso, ahngô nzima n’abaé.

⁶ Na amatsutsuga dôta va miso mamikama mitayi mianeengi edi na va mbene. Vanôtendéa me éva, ayekani va gatse aô agédôngaka n’avo amamana éwa.

⁷ Va mbenene vane amatsutsuga na vandé Jacques na dôta vandé ane amasevouni na amatômukuni n’amuene Jésus.

⁸ Angô amayusuméda étsutsuga te vandé me. Me nasôbasôbana. Natsapéô gômatsutsugangô vandé me. Me va gatse akasô nandé ga muana amabôtu géôdé.

⁹ Va gatse ane amasevouni na amatômukuni na Jésus, môngimee na ngaa te me Paul. Buéyé vane tsaba kuanakue gôétetu mbe ône amatômu na Jésus gôébégô va mbeego namakuanaka pepe asi mbumu éaNzambé.

¹⁰ Veenanye me deo noo, me nandé nane te gô mate meetsô me na Nzambé. Mate medi mamayanza gôndé me na ngudi dipôni. Eenakani, éne éyanzéa me Nzambé éôtéa n’ene éyanza akasô muetso. Ivô kaka me, te mateme maNzambé mane.

¹¹ Endé te nane. Buéyé mbe akasô eékédani buéyé mbe me neekédani, meekédume mane te mavô. Na te mangô mamasinganye na mitémamie mianyô mietso.

Gékundugéô sasô n’anyô

¹² We tôékéda mbe: Jésus amakunduga g’ôwa. ?Tambô avo va gatse anyô nayee nôvovo mbe, ane amawani asangakunduga g’ôwa‐a?

¹³ Okô mbe éne évovo anye éndé kuanakue, tambô n’amuene Jésus‐Christ asikundugé g’ôwa.

¹⁴ Okô mbe Christ asikundugé g’ôwa tambô tôsaba na mabégô gôéékéda. N’anye nômamôétsa mitémamie te bobo gébé na tsoongo.

¹⁵ Na va ngongone vane, we eekédi tôpata te pataga vatôvovo mane maNzambé mbe, na gô pie amakundua Christ g’ôwa, tambô anye nôvovo mbe asimôkundué. Metso mane, ôkô mbe te na gô pie tambô ane amawani asangakunduga.

¹⁶ Tambô ôkô mbe ane amawani asangakunduga g’owa eembe na amuene Christ asikundugé.

¹⁷ Okô mbe Christ asitimôgé g’ôwa gôéba na monyo, anye mbe nômamôétsa mitémamie te bobo gébé na tsoongo. Na anye nôgébaka nômadimbana gô ébévee éanyô.

¹⁸ Na buéyé n’ane amawa amasinga Christ, tambô ahngô dôta amakea gôébungana.

¹⁹ Okô mbe tsoongone éasô n’anyô étôdiiani gôtôvamba na Christ ébandôa na ékôdéa te gô monyoe ava tsina ôtévo tambô wa n’anyô te asi maguga na maguga, na asi ngeba na ngeba.

²⁰ Tôtsika vita pagaye. Tôôta na gô édué. Jésus‐Christ amatimôga na gô pie g’ôwa gôéba na monyo. Vane te gémbégéa gématôtubédu na Nzambé mbe: Gamakundua me Jésus g’ôwa, nanganôkundua muetso nômawani te mônongovo.

²¹ Endé te nane. Owa ômaviga na gô tsina na môma môvo. Na gékundugéô sowa gémaviga na gô tsina na môma môvo.

²² Wa n’anyô muetso tôwa te gômatôvamba n’Adam. Na wa n’anyô muetso tôngakunduga gômatôvamba na Jésus‐Christ.

²³ Ivô ékundugéôe éndé gô ngéko na ngéko. Mapangame te amuene Christ. Va ngimedi te wa n’anyô oma aJésus‐Christ gô ndéône énganikangô na gô tsina.

²⁴ Va mbenene vane te ékôdéô éatsinane. Vane te ndéône éngabunzéda Christ manyangame metso, na ditômuye yetso na ngudiye yetso yedidie éasagô. Na Christ anganikéda ôkumue na gôndé Tétedi Nzambé.

²⁵ Tambô ôtômue ôbaké na Kumu Jésus‐Christ gôétôma ngu na vangatseda Nzambé adudeo muetso aka gô tsina amatambé maJésus.

²⁶ Môdudeone angayusumédu ébunzuni te ôwee.

²⁷ Endéké te gatônigôu na Matendeo MaNzambé mbe: Nzambé amavumba éetso gô tsina amatambé maJésus gôéyetu. Vatôtanga mbe: éetso évumbu mbe éyetu na Christ, ivô kaka Nzambé amuene andé gô tsina amatambé maJésus. Gôébégô Nzambé te môétsine na Christ te môyetine.

²⁸ Vangasugédu éôma éetso g’ôtômu aChrist vane amuene Muana ANzambé, Jésus‐Christ angaasugéda amuene vandé Tétedi Nzambé, ône amamôétsa éôma éetso. Tambô ôtômue n’okumaka wetso ôngaba na amuene Nzambé.

²⁹ Anye nôdigaa gô paga yagékundugéô. Tasani gô gésima géndéké n’avo gôédiia bateme gôényepeda ane amawani. Okô mbe ane amawani asangakunduga ?bateme nene tsoongo ndé? ?Gôébégô ndé abuta édiia bateme gôényepeda ane asangadôkundugani?

³⁰ ?Okô mbe ane amawani asangakunduga, tambô we eekédie tôbuta ôwa gôndé? ?Tôbambana ndéô yetso n’owa gôndé?

³¹ Ana aTéta n’ami, me nanôbeenda mbe me Paul pitsi yetso navétsu n’owa. Nanônigôa gôébégô anye te anami atsôkéa me, na tôndéké monyo ôvo gô vitoone éndé wa n’anyô na Kumu asô n’anyô Jésus‐Christ.

³² Vagenya me nandé gô Ephèse môgenye ôvôni gandé môma agenya na gémbungu ?te gôéba na monyo ava tsina éva ôtévo‐a? ?Buéyé mbe nadiia vagenya me, tsoongo ndé? Okô mbe va mbene owa gôsaba gékundugéô tambô tsava égunyuni ésapata. Tsavane eendô mbe: ôka deo noo tôaakéni na tônyuakéni. Mene tôngawa.

³³ Tômbiabômédu. Mavamba mabévani mabévéda midigédi miamisôba.

³⁴ Anye tsikani diyunga yasagô ganôsaba na mitéma. Tsikani matasa mabévani. Nanôbeenda mbe avo va gatse anyô nôsamenya Nzambé ta na pesu. Te tsoyi épôni gôndé wa n’anyô.

Otôe ôngaba n’ane angakundugani

³⁵ Mavooe nôndé na nyivô mbe: ?Ane amawani angakunduga nayéé? ?Yôtôye yaô dingaba yamônongo ndé?

³⁶ Anye ti asi éboki. Tôkanéga gatôgaaba môbie. Vagaabô môbie ôsangakanda éne édôngani ta môbie madeo ôsiboo gô tsina.

³⁷ Ene étôgaaba gô toto te môbie ôtévo gandé éso éapôtô na mivo mibie. Géétété sapôtô tôsagaaba môkubee wetso gôépika na toto mbe géômba ékanda sene géétété ivô tôpika na toto te môbie ôtévo.

³⁸ Nzambé eetsa gô môbie na môbie wedi môkubee ôngakandangô ganyôngéô amuene Nzambé.

³⁹ Eôma éetso évégumani ésaba éetso ôtô ôvo na môsoyi ôvo. Môma andé na wedi mônongo otô. Nyama andé na wedi mônongo amôsoyi. Nyoyi na ône wedi mônongo na nyama yagô mbéyi na waô mônongo.

⁴⁰ Gôndéké dôta ôtô ag’ôba na ôtô agô tsina. One ag’ôba ônyepa n’obébayi awene mônongo na ône agô tsina.

⁴¹ Kômbéne étanéda te wedi mônongo obébayi. Ngondene étanéda te wedi mônongo. Na minangamie te waô mônongo. Buéyé minangamie misatana mietso mônongovo.

⁴² Edué étubéda gangaba wa n’anyô vangatôkunduga g’ôwa. Vangunyu môma aka nzumbi, ôtô edi te sôma gémadônga va tsina g’ôtangô apitsi. Vangakunduga angô ôsabadô ava tsina, ôsangadôtanga pitsi.

⁴³ Vagunyu ôtô gô ngii ôndé gékonzo na ôsanyepa. Vangakunduga angô ôngaba n’ondômbee na ngudi.

⁴⁴ Vagunyu ôtô gô ngii ôndé ôbandôni na ôôkanôni. Vangakunduga angô ôngabaka sôma sagétsutsuku. Tôsabômu mbe gôndéké ôtô ôbandôni na ôôkanôni tambô menyani dôta mbe gôndéké na ôtô ôsangoongôa môma énigôa.

⁴⁵ Endé te gatônigôu na Matendeo MaNzambé mbe: Mômane amapanga Adam, amavangô sôma gévégumani. Na Adamene amôyusumédu te Gédidi SaNzambé gétôétsa monyo.

⁴⁶ Mapangame, kaka géne sag’ôba te géne sava tsina. Môbaé te géne sag’ôba.

⁴⁷ Adamene amapanga amavangô na toto. Adamene amôbaé te Kumu amaviga g’ôba.

⁴⁸ Muetso asi tsinane agono n’one amavangô na totone éava tsina. Muetso asi g’ôba agono n’one amaviga g’ôba.

⁴⁹ Tambô wa n’anyô tôgono deo noo n’one amavangô na totone na tôngagono dôta n’one amaviga g’ôba.

⁵⁰ Oôkôni éne ébuta me énônigôa ana aTéta. Ene émavangôni éndé éotô na nzina ésaba na tsoongo g’ôkumu aNzambé. Géne sapitsi yatangaga, gésaba n’evamba na géne samôbô na môbô.

⁵¹ Nanôtsutsuéa éne éav’esooe ésinigôganéôni édué. Wa n’anyô tôsangawa muetso, ivô muetso tôngakou te kogu.

⁵² Tôngakou tsina na tsina, ôgi yadingani, gémbômbage samôyusumédu géndé gôétoongu. Vangatoongu gémbômbage ane amawani angakunduga na yene yôtô disangadôomba ébooni, na wa n’anyô tôgédôngakani tôngakou.

⁵³ Engaba te nane. Ene ébooni, éngakou éka éne ésabookoni. Ene éawaakaga, éngakou éka éne ésaviwaani.

⁵⁴ Vangaba yôtô yasô n’anyô édi dibooni dimakou dika disabooni, na yôtô yasô n’anyô édi diwaakani, dimakou dika disaviwaani, te vangaduga éne émavovo Nzambé gô Matendeo medi mbe: Monyo ôngatseda ôwa.

⁵⁵ ?Owa ôtômue woo ôndé gôni? ?Owa miangaga mioo mindé gôni?

⁵⁶ Ebéva éamôma te éangô éétsa ôwa miangaga. Mige miaNzambé te miangô miitsa ébéva ngudi gô môtéma amôma.

⁵⁷ Tôkumédékéni Nzambé atôétsa ngudi gô ina aJésus‐Christ gôétseda ôwa.

⁵⁸ Ana aTéta n’ami amôtéma, t’ebandô me Paul nanôongô mbe oodoni gô mabégô mema kabaga nôsasipa. Bakani na géviôviô gôéyanzéa Kumu gôébégô éagékundugéô. Nôsabômu mbe éne éyanzanye pitsi yedi éndé anye na vitoo na Kumu Jésus, éndéké na tsoongo.