I Corinthiens 13 - New Testament in Mitsogo

Nzéane émeetsa Nzambé te éne éetondo

¹ Buéyé mbe neetsô ngudi gôévovo yaanga yôgi divovo oma, me géékédu yangô, na dôta dine divovo asi g’ôba, ôkô me tsiba na étondo éaNzambé gô môtémami, mavovia mami mbe te gandé ôgi angomo na ône egenge ôsookanôni, te nzongodi étévo.

² Buéyé mbe nabéyee na môgôô epandôéda ndongi diviga gôndé Nzambé, na me ôkô tsiba n’etondo éaNzambé gô môtémami me mbe te môma abobo. Buéyé mbe nabéyee n’eodo gôémenya metso moongôa môma émenya vawaa môma na vadônga môma na mavétô metso, na ôkô tsiba n’etondo éaNzambé gô môtémami me mbe te môma abobo. Okô nandé môtémovo na Nzambé gétsumé ngudi yedi paga navovo na môkôdie mbe: nôtôga vane na angô te nôtôga, na me ôkô tsiba n’etondo éaNzambé gô môtémami me mbe te môma abobo.

³ Buéyé mbe nakabéké ôkitie wami wetso, na buéyé mbe neetséké ôtôe wami gôébéku gô soto ôgondoku, ôkô me tsiba n’etondo éaNzambé gô môtémami, me mbe natsôgô te bobo.

⁴ Etondo étôdiia gôndé Nzambé étôétsa ngeba. Etondoe éne ényepa na ésamenya ngusu. Na dôta ésaba na nyemo na tsoki.

⁵ Etondo éndé n’egoba. Esasinga môma ayanza ébégô éngatubéda akedi tsoyi. Etondoe ésaba na matamba na ôpaka. Na ésasinga migianganô. Etondoe ésanyôngéô pigaga gô môtéma.

⁶ Etondoe étôétsô na Nzambé ésatsôkéa mane madagéô muene môma, ivô étsôkéa mane mapie mamuene Nzambé.

⁷ Okô ôndé n’etondo éaNzambé gô môtémoo ôsangadagéô gôésingéa môkoo kokoo. Na ôsangatsuma môkoo paga gôémôénda mbe: Ewe môpati. Na étondoe éangô étôétsa môténdéda na ôbibô.

⁸ Etondo émabaka na éndéké, na éngaba môbô na môbô. Ndongi dimeetsa Nzambé gôépandôédu dindé na tsoongo te g’ôtangô apitsi. Môgôô ôétsiô môma gôévovo gô aanga ôgi ôngoota. Eodo gôémenya mabégô metso éngakôdéa.

⁹ Wa n’anyô tômenya te vipesu. Tôpandôéda te mavo mabégô mandé na Nzambé.

¹⁰ Vangatsutsuga éne émadugani, tôngeena éne ésidugéni éngadimbana.

¹¹ G’ôanéngée wami namatasaka, na namatanganédaka na namavovoko geenda muanéngé. Ivô vamoongôga me naka mômôgôô, namatsika metso mane meenda muanéngé.

¹² Ene étôenani na éne étômenyani éaNzambé pitsi yedi te gatôbono gô géeno géndé na bobé. Ivô nyovo tôngamôena na va miso. Deo noo tsabômu te ébégô évo ivô nyoone nangamenya te metso mônongovo gamenyanganô me n’amuene Nzambé.

¹³ Endé te nane. Gôndé mabégô matatô mandé môgunanza. Mangô te gôéba môtémovo na Nzambé gémôtsumé paga, na gôémenya mbe tsoongone yoo te Nzambé na gôédigaa na môtéma ômayôa n’etondo éaNzambé. Na va gatse amangô matatô, éne éôtéani te étondoe éviga gôndé Nzambé.