I Corinthiens 12 - New Testament in Mitsogo

Migôô miétsa Gédidi SaNzambé

¹ Eva tôka gô mene mabégô. Tôtaséni gô migôô, kaka mine miviga gô ébuyi, ivô gô mine miétsa Gédidi SaNzambé wa n’anyô géenza. Ana aTéta n’ami asi mbumu éaNzambé nanyôngéô mbe nônigôgéô na vede mane mamigôô miétsa Gédidi SaNzambé wa n’anyô.

² Anye nôsabômu mônongovo gamabakanye madeo nôsigobeda Nzambé. Anye nômasinganaka te n’egobeda mbuma disamenya évovoni, gékékôé. Nômeekaganô énigôa mabégô maô.

³ Na deo noo nômeengéa gôndé Nzambé tsanyôngéô mbe nôbé na buétsé, gémenyé mbe éne évovo môma te éapie na te éaNzambé. Okô môma atoko Jésus géneegede inedi, menyani mbe angô asaba na Gédidi SaNzambé. Okô môma aneegeda ina aJésus mbe: Jésus te Kumu, menyani mbe angô atômu na Gédidi SaNzambé.

⁴ Gôndéké minongo na minongo miamigôô miétsa Nzambé wa n’anyô. Na tômidiia gô Gédidi gévo, te géne saNzambé.

⁵ Gôndéké minongo na minongo gôndé wa n’anyô gôéyanzéa Nzambé ivô Kumune éyanziôni te épo, te Kumu Jésus.

⁶ Na gôndéké ésima éyékani éamisôba ébumba Nzambé gô môtéma amôma, na Nzambéne éne te épo.

⁷ Gédidi SaNzambé géviga na gô mitéma miasô n’anyô gôétôétsa môma na môma môgôôe wedi mbe ayanza n’angô gôényepeda mbumu éaNzambé muetso.

⁸ Gédidi SaNzambé géétsa môma môvo môgôô eodo éenigôa ébégô ga te amuene Nzambé anigôa éangô. Na môvo eetsô môgôô eesupua ébégô mbe môma angayavôga éôkô. Migôômie te mibaé ivô Gédidige gémeetsani te gévo.

⁹ Na Gédidige sangô dôta géétsa gôndé môma môvo môgôôe wedi te gôéba gétsumé ngudi yaNzambé paga gô éne ényôngéô Nzambé éyanza. Na gôndé môvo, Gédidi géétsa môgôô enyangee éédôngéda abeeyi.

¹⁰ Gédidi SaNzambé géétsa dôta môma môvo ôtômu gôéyanza mabégô mamisôba manyônganéôni matsapéô môma masoongôa angô énigôa. Na géétsa gôndé môvo gôépandôéda ndongi diviga gôndé Nzambé. Môvo dôta eetsô môgôô gôésevoa va gatse édidie mbe egé te gébévani na egé te SaNzambé. Môvo eetsô môgôô gôévovo waanga ôgi ôsiikédu angô. Môvo eetsô môgôô eodo gôékoa mane mavovo môkedi mbe éngookanô gô éongo éedi.

¹¹ Migôômie mietso mine miétsô te na Gédidi gévo te géne SaNzambé. Gékaba miangô ôvo ôvo géenza, ganyôngéô amuene Gédidi.

Otô ôvo ôndé na éeme éyekani

¹² Oôkôni édué. Tôkanéga Christ ga ôtô ôndé n’eeme éyekani. Géeme na géeme gésagono na môkedi ivô éangô éetso éndé te g’ôtô ôvo.

¹³ Na wa n’anyô muetso tôbéyee Ajuif, tôsabéyee Ajuif, tôbéyee avéga tôsabéyee avéga, tômeetsô bateme gôékanda g’ôtô ôvo gô ngudi yaGédidi gévo, te géne SaNzambé. Na wa n’anyô muetso tôdônga gô ngudi yaGédidige géne.

¹⁴ Otô amôma ôsaba géeme gévo gétévo. Ondéké na éeme éyekani.

¹⁵ Okôdô ôvovoyee mbe: Me kaka ôgogo, tambô me tsaba g’ôtô. Buéyé mbe avovoyee nane asanganôtôga g’ôtô.

¹⁶ Eatôe évovoyee mbe: Me kaka éso, tambô tsaba g’ôtô. Buéyé mbe avoveyee nane angô andé te g’ôtô.

¹⁷ Otôe wetso mbe te éso étévo ?ôngookô nzongodi nayee? Otôe wetso mbe te éatô étévo ?ôngookô mbônga nayee?

¹⁸ Menyami mbe Nzambé amakaba éeme éetso g’ôtô te gamanyôngéô amuene.

¹⁹ Môma mbe andé na géeme gévo, mbe gôsaba ôtô.

²⁰ Na gô pie gôndéké éeme éyekani ivô ôtôe te ôvo.

²¹ T’ebandô éso ésoongôa évovo n’ogogo mbe: Tsaba na tsôvé n’ewe. Na môtsé ôsoongôa évovo na makôdô mbe: Tsaba na tsôvé n’ewe.

²² Nômenya mbe évo éeme ésaba na tsoongo, tambô éangô édôngéda ôtôe wetso.

²³ Eeme éne ésakumédu pepe te éangô éôtéa we ékenea kabaga éena maguga. Gôndéké na évo éeme éotô ésatetuku va gatse oma na éangô éôtéa ékeneo te gô waô mônongo.

²⁴ Na éeme éeanô na vede ésakeneoko nane. Nzambé amakônza yôtô yasô n’anyô gômbe géemege géndé sabobo te sangô géôtéa éneegeduni.

²⁵ Vane ôtô ôsaba na tatô. Na éeme éetso ékenanea anguene n’anguene.

²⁶ Gôwangô môpéndé, môtanda ôôkô pievia. Na dôta ôkô géema gévo gékumédu, na éeme éetso éndé gôétsôkéa.

²⁷ Wa n’anyô muetso tôndéké te ôtô aJésus‐Christ. Môma na môma te géeme gévo.

²⁸ Vane tôena mônongovo gamakônza Nzambé mbumune yedi. Amapanga te ane amasevouni na amatômukuni na Jésus. Va ngimaô te apandôédi andongi yedi. Na va ngimaô te eekédi. Na vane te ane atubéda émbégéa éangudi yaNzambé gô mabégô mamisôba manyônganéôni matsapéô môma masoongôa angô énigôa. Va mbene vane te ane andé na ngudi yeedôngéda abeeyi, na ane awedéa akaô, na étômbiatômbia, na ane avovo waanga ôgi ôsiikédu angô.

²⁹ Kaka muetso tômatômuku na Jésus. Kaka muetso tôndé apandôédi andongi. Kaka muetso tôndé eekédie. Kaka muetso tôndé na ngudi yetubéda émbégéa éangudi yaNzambé gô mane manyônganéôni matsapéô môma masoongôa angô énigôa.

³⁰ Kaka muetso tôndé na ngudi yeedôngéda abeeyi. Kaka muetso tôvovo aanga ôgi ôsiikédu we. Kaka muetso tômenya ékoa éne évovuni g’ôgi ôsiikédu we.

³¹ Butani édiia gôndé Nzambé migôômie mine miôtéa na ngudi. Ivô n’atsatsee me Paul nanônigôa nyene nzéa éôtéa nzéaye yetso buéyé n’ene éamigôômie.